މި ސަރުކާރުން ޝަރުޢީ ދާއިރާއަށް ގެނެވުނު ބަދަލާއި އެކު ސްޕްރީމް ކޯޓަށް ރައްޔިތުން ކުރާ އިތުބާރު ބޮޑުވެއްޖެ ކަމަށް ރައީސް ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ރ.އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅު މީދު އަށް ވަޑައިގެން ވާހަކަފުޅު ދައްކަވަމުންނެވެ.

"އެމްޑީޕީ ވުޖޫދުވެގެން އައީ އެބިންގަލުގެ މައްޗަށް، އެއިންސާފު ރައްޔިތުންނަށް ހޯދައި ދިނުމަށް، އިންސާފު ނުލިބި ތިބި އެތައް ބަޔަކަށް އިންސާފުން މަހްރޫމްވެފައި ތިބި އެތައް ބަޔަކަށް އެފުރުސަތު ހޯދައި ދިނުމަށް، އަނިޔާވެރިކަން އިންތިހާއަށް ގޮއްސައި އޮތް އޮތުން ބަދަލުކޮށްލުމަށް" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ އެތައްބަޔަކު ޙުކުމެއް ނެތި އެތައް ދުވަހަކު ހޭދަކުރަން ޖެހުނު ކަމަށެވެ. އިންސާފު ނުލިބި ވެރިންގެ ގާތަށް ހިނގަން ޖެހުނު ކަމަށެވެ. މިފަދަ އެތައް ކަމެއް ތަހައްމަލު ކޮށްފައިތިބި އެތައް ބަޔަކު ރާއްޖޭގެ އެކި ކަންކޮޅުތަކުގައި އެބަތިބިކަމަށްވެސް ރައީސް ވިދާޅުވިއެވެ.

"އިންސާފު ޤާއިމް ކުރުމަކީ އެމްޑީޕީގެ ކޮންމެ ވެރިކަމެއްގައިވެސް އެންމެ އިސްކަން ދޭނެ އެއް ސިޔާސަތު" ރައީސް ޞާލިޙް ވިދާޅުވިއެވެ.

ކުރިއަށް އޮތް ތަނުގައިވެސް ތަންފީޒުވެގެންދާނެ ސިޔާސަތަކީ އިންސާފުގެ ދާއިރާ މިނިވަންކަންމަތީގައި ބޭއްވުންކަމަށް ރައީސް ޞާލިޙްވިދާޅުވިއެވެ.

މިފަދައިން ރައީސް ޞާލިޙް މީދުއަށް ވަޑައިގެން ވާހަކަދައްކަވާފައިވާއިރު، ރައީސް މީދުއަށް ވަޑައިގެންނެވި ވަގުތު މީގެ ހަތް އަހަރު ކުރިން މަރުވި އެރަށުގެ ޒުވާނެއްކަމަށްވާ މުޙައްމަދު އަނަސްގެ މަރުގެ މައްސަލައިގައި އޭނާގެ އާއިލާއަށް މިއަދާއި ހަމައަށްވެސް އިންސާފު ލިބިފައިނުވާތީ ހިމޭން އިޙްތިޖާޖެއް ދިޔައީ ކުރެވެމުންނެވެ.

މީދޫގެ ބަޔަކު އަނަސްގެ މަރަށް އިންސާފު ނުލިބި ވާތީ ހިމޭން އިޙްތިޖާޖު ކުރަނީ

ރައީސްގެ ވާހަކަފުޅުގައި ވިދާޅުވީ  ސުޕްރީމް ކޯޓާ ދޭތެރޭ ކުރިން ރައްޔުތުންގެ ހިތްތަކިގައި އޮތް ޝައްކު ފިލާ، ސުޕްރީމް ކޯޓަށް އޮތް އިތުބާރު ބޮޑުތަނުން އިތުރުވެއްޖެ ކަމަށެވެ. އަދި އިންސާފް ޤާއިމްކުރުމުގެ ތެރޭގައި އަންހެނުންގެ ދައުރު، އަންހެން ފަނޑިޔާރުންގެ ދައުރު މިވަނީ ފުރަތަމަ ފަހަރަށް އިތުރުކުރެވިފައި ކަމަށާއި ޚާއްސަކޮށް ސުޕްރީމް ކޯޓުގެ ބެންޗަށް މިއަދު ވަނީ އަންހެން ފަނޑިޔާރުން އައްޔަނު ކުރެވިފައި ކަމަށް ރައީސް ވިދާޅުވިއެވެ. އަދި މިއީ ގެނެވުނު ވަރަށް ބޮޑު އިންޤިލާބީ ބަދަލެއްގެ ގޮތުގައި ދެކެވަޑައިގަންނަވާ ކަމަށް ރައީސް ވިދާޅުވި އެވެ.