އެމްޑަބްލިއުއެސްސީ ދިވެހި ޕްރެމިއާ ލީގުގައި މިރޭ ކުޅެވުނު މެޗުގައި ބުރު އަތުން މޮޅުވެ ކުލަބު އީގަލްސް އިން ލީގު ތާވަލުގެ ދެވަނައަށް ކުރިއަށް ޖެހިލައިފިއެވެ. މި މެޗު އެޓީމުން ކާމިޔާބުކުރީ 5-0 ގެ ނަތީޖާއަކުންނެވެ.

މިދިޔަ ހަފްތާގައި އޭއެފްސީ ކަޕް ޕްލޭއޮފްގައި ބަންގްލަދޭޝަގެ އަބަހާނީ ލިމިޓެޑް އަތުން ބަލިވެ، މުބާރާތުގެ ގުރޫޕް ސްޓޭޖުން ފުރުސަތު ގެއްލުނު އީގަލްސް އިން ދެހަފްތާގެ ބްރޭކަކަށް ފަހު ލީގުގެ ކުޅުން އަލުން ފެށިއިރު، އެޓީމު ފެނުނީ މާބޮޑަށްވެސް ވަރުގަދަކޮށެވެ.

އެގޮތުން މިމެޗުގެ ފުރަތަމަ ހާފުގައި އެޓީމުން ވަނީ ދެލަނޑުގެ ލީޑެއް ނަގާފައެވެ. އީގަލްސްގެ ފުރަތަމަ ލަނޑު ފުރަތަމަ ހާފުގެ 15 ވަނަ މިނެޓުގައި އެޓީމުގެ ބިދޭސީ ކުޅުންތެރިޔާ އިވާން ކާމިޔާބުކޮށްދިންއިރު، ދެވަނަ ލަނޑު 35 ވަނަ މިނެޓުގައި ކާމިޔާބުކޮށްދިނީ އިބްރާހިމް މަހުދީ އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އީގަލްސް ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފުގައި އީގަލްސް އިން އިތުރު ތިން ލަނޑު ކާމިޔާބުކުރިއިރު، އެޓީމުގެ ތިންވަނަ ލަނޑު ފަހުހާފުގެ ފެށިގެން ހަތަރުވަނަ މިނެޓުގައި ކާމިޔާބުކޮށްދިނީ ކެޕްޓަން އަހުމަދު ރިޒްވާން އެވެ. އަދި އެޓީމުގެ ހަތަރުވަނަ ލަނޑު 55 ވަނަ މިނެޓުގައި އިބްރާހިމް މަހުދީ ކާމިޔާބުކުރިއިރު، ފަހު ހާފުގެ 83 ވަނަ މިނެޓުގައި މަހްދީ ވަނީ އިތުރު ލަނޑެއް ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 5-0 ގެ ނަތީޖާއަކުން ކްލަބު އީގަލްސް ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ކްލަބް އީގަލްސް އަށް ތިން ލަނޑު ކާމިޔާބުކޮށް މި މެޗުގައި ހެޓްރިކް ހެދި އިބްރާހިމް މަހުދީ އެވެ.

މި މެޗުން ލިބުނު ތިން ޕޮއިންޓާއެކު އެކު ކުޅުނު 8 މެޗުން ލިބުނު 20 ޕޮއިންޓާއެކު ކުލަބު އީގަލްސް މިވަގުތު އޮތީ ލީގު ތާވަލްގެ ދެވަނައިގައެވެ. އަދި މި މެޗުން ބަލިވި ބުރު ސްޕޯޓްސް ކްލަބް 9 މެޗު ކުޅެފައިވާއިރު އެޓީމަށް ލިބިފައިވަނީ 12 ޕޮއިންޓެވެ. އަދި މި ވަގުތު އެޓީމު އޮތީ ލީގު ތާވަލްގެ ފަސްވަނައިގައެވެ.