ޔޫއެސް އޯޕަން ކަޕްގެ ސެމީ ފައިނަލުގެ ފުރަތަމަ މެޗުގައި އެފްސީ ސިންސިނާޓީ އާއި ވާދަކުރި މެޗު 3-3 ގެ ނަތީޖާއަކުން އެއްވަރުވެ، ނަތީޖާ ނެރުމަށްޓަކައި ޖެހި ޕެނަލްޓީގައި 4-5 ގެ ނަތީޖާއަކުން މޮޅުވެ މުބާރާތުގެ ފައިނަލުން އިންޓަ މިއާމީ ޖާގަހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އެފްސީ ސިންސިނާޓީ އިންނެވެ. މިލަނޑު ފުރަތަމަ ހާފުގެ 18 ވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ މިޑްފީލްޑަރު ލޫސިއާނޯ އަކޯސްޓާ އެވެ. މިއީ މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އެފްސީ ސިންސިނާޓީ ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން 53 ވަނަ މިނެޓުގައި އެފްސީ ސިންސިނާޓީގެ ފޯވާޑް ބްރޭންޑަން ވަޒްކުއޭޒް ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

Advertisement

މިމެޗުގައި އިންޓަ މިއާމީ އިން ކާމިޔާބުކުރި ފުރަތަމަ ލަނޑު ދެވަނަ ހާފުގެ 68 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ލިއަނާޑޯ ކޮމްޕާނާ އެވެ. މިއީ އެޓީމުގެ ކެޕްޓަން ލަޔޮނަލް މެސީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އިންޓަ މިއާމީ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ އިތުރު ވަގުތުގެ ގޮތުގައި ދެއްކި ހަމިނެޓްގެ ކުޅުން ހަމަވެ އިތުރަށް ކުޅުނު ތިން މިނެޓުގެ ތެރެއިިން ފުރަތަމަ މިނެޓުގައި ކާމިޔާބުކޮށްދިނީ ވެސް އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ލިއަނާޑޯ ކޮމްޕާނާ އެވެ. މިއީ ވެސް މެސީގެ އެހީތެރިކަމާ އެކު އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ 90 މިނެޓްގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. މިއާއެކު މެޗުގެ ނަތީޖާ ނެރުމަށްޓަކައި ކުޅެވުނު އިތުރު ވަގުތުގެ 15 މިނެޓުގެ ދެ ހާފުގެ ތެރެއިިން ފުރަތަަމަ ހާފުގައި އިންޓަ މިއާމީ އިން ވަނީ ލަނޑެއް ކާމިޔާބުކޮށް މި މެޗުގައި ފުރަތަަމަ ފަހަރަށް ލީޑު ހޯދާފައެވެ.

މިލަނޑު އިތުވަގުތުގެ ފުރަތަމަ ހާފު ފެށިގެން ތިންވަނަ މިނެޓުގައި އެޓީމަށް ކާމިޔާބުކޮށްދިނީ ވެނަޒުއޭލާ ފޯވާޑް ޖޯސެފް މާޓިނޭޒް އެވެ. އެފްސީ ސިންސިނާޓީ އިން މެޗުގެ ނަތީޖާ އެއްވަރުކުރި ލަނޑު އިތުރު ވަގުތުގެ ދެވަނަ ހާފުގެ 9 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖަޕާން ފޯވާޑް ޔޫޔާ ކުބޯ އެވެ. މިލަނޑާއެކު މެޗުގެ 120 މިނެޓުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިއާއެކު މެޗުގެ ނަތީޖާ ނެރުމަށްޓަކައި ޖެހި ޕެނަލްޓީގައި އިންޓަ މިއާމީ އިން ކުރިހޯދީ 4-5 ގެ ނަތީޖާއަކުން ނެވެ. އިންޓަ މިއާމީ އިން ޖެހި ފަސް ޕެނަލްޓީ ވެސް އެޓީމުން ކާމިޔާބުކުރި އިރު އެފްސީ ސިންސިނާޓީގެ ފަސް ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ހަތަރު ޕެނަލްޓީ އެވެ.

މިއީ އާޖެންޓީނާ ކެޕްޓަން ލިއޮނަލް މެސީ އެޓީމާއި ގުޅުނު ފަހުން އިންޓަ މިއާމީ ޖެހިޖެހިގެން މޮޅުވި 8 ވަނަ މެޗެވެ. އަދި މިއީ މީގެ ހަތަރު ދުވަސް ކުރިން ނޯތު އަދި ސެންޓްރަލް އެމެރިކާގެ ލީގު ކަޕް ޗެންޕިއަން ހޯދި އިންޓަ މިއާމީ އިން މި މުބާރަތުގެ ފައިނަލުން ޖާގަ ހޯދީ ފުރަތަމަ ފަހަރެވެ.

މުބާރާތުގެ ފައިނަލްގައި އިންޓަ މިއާމީ ވާދަކުރަން ޖެހޭނީ ސެމީ ފައިނަލުގެ ދެވަނަ މެޗުގައި މިއަދު ހެނދުނު ރިއަލް ސޯޓް ލޭކް އާއި ޑައިނަމޯ ވާދަކުރާ މެޗު މޮޅުވާ ޓީމަކާއި ދެކޮޅަށެވެ.