މި އަހަރުގެ ރިޔާސީ އިންތިހާބު ކާމިޔާބުވެވަޑައިގެން ވެރިކަމަށް އާދެވިއްޖެ ނަމަ ޕާކިންގ ސްޓިކަރ ތަކުގެ ހުރިހާ ޖޫރިމަނާއެއް މައާފުކޮށްދެއްވާނެ ކަމަށާ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވައުދުވެވަޑައިގެންފިއެވެ. 

ޕާކު ކުރާނެ ޖާގައެއް ނުދައްކައި ޕާކިން ސްޓިކާ ނުޖެހުމަކީ މި ސަރުކާރުގެ ވައުދެއް ކަމަށާއި އެހެން ނަމަވެސް އެކަމަށް އެއްވެސް ގޮތަކަށް އަމަލުކުރަމުން ނުދިއުމަކީ އަދުލުވެރިކޮށް ކުރެވޭ ކަމެއް ނޫން ކަމުގައި ވިދާޅުވެ ށ ފުނަދޫގައި ރޭ ބޭއްވި އެ މަނިކުފާނުގެ ރިޔާސީ އިންތިހާބުގެ ކެމްޕެއިން ޖަލްސާގައި ވަނީ ކަންބޮޑުވުން ފާޅުކުރައްވައިފައެވެ. 

މުއިއްޒުގެ ވާހަކަފުޅުގައި ވިދާޅުވީ، ޖޫރިނަމާކުރުނުގެ ކަންކަން ކުރެވެމުން އަންނަނީ ބަޖެޓުގެ ތެރޭގައިވެސް ހިމެނިގެން ކަމަށާއި އެއީ ހަމަހަމަކަމާއި އިންސާފުން ބެރޭން ކުރެވެމުން އަންނަ ކަމެއްކަމަށެވެ. އެހެންކަމުން އެ މަނިކުފާނުގެ ވެރިކަމެއްގައި ޕާކިންގ ސްޓިކާގެ ހުރިހާ ޖޫރިމަނާއެއް މައާފުކޮށްދެއްވާނެ ކަމުގައި ޑރ މުއިއްޒުވަނީ ވައުދުވެވަޑައިގެންފައެވެ. 

Advertisement

އަދި މީގެ އިތުރުން މާލެއަށް ދިމާވެފައިވާ ޕާކިންގ ގެ ދަތިކަމަށް އިޝާރާތް ކުރައްވައި ޑރ މުއިއްޒު ވިދާޅުވީ އެ ދަތިތަކަށް ހައްލެއް ގެނައުމުގެ ގޮތުން މަލްޓި ސްޓޯރީ ޕާކިން އިމާރާތްތަކެއް އަޅުއްވައިދެއްވާނެ ކަމަށެވެ. 

އަދި ހަމަ އެޔާއި ވިދިގެން މުއިއްޒު ވިދާޅުވީ، ސިޓީ ކައުންސިލްގެ ފަރާތުންވެސް އެފަދަ މަޝްރޫއެއް ހިންގުމަށް މަސައްކަތްކުރެވުނު ނަމަވެސް ސަރުކާރުން އެކަމަށް ހުއްދަ ދީފައި ނުވާކަމަށެވެ. 

މީގެ އިތުރުން ވެސް ރޭގެ ޖަލްސާގައި މުއިއްޒުވަނީ ވެރިކަމަށް ވަޑައިގެން ފުނަދޫއަށް ކޮށްދެއްވާނެ އިތުރުކަންތައްތަކެއްވެސް އިއުލާންކުރައްވައިފައެވެ. 

އޭގެ ތެރޭގައި، ފުނަދޫގެ މަގުތައް ޒަމާނީ ފެންވަރަށް ތަރައްގީކުރުމާއި، އެ ރަށުގައި ސަރަހައްދީ ފެންވަރުގެ ޒުވާނުންގެ މަރުކަޒެއް ގާއިމުކުރުމުގެ އިތުރުން، ރަށަށް ދިމާވެފައިވާ ބިމުގެ ޖާގައިގެ ދަތިކަން ހައްލުކުރުމަށް އެރަށުގައި ބިން ހިއްކައިދެއްވާނެ ކަމިގައިވެސް މުއިއްޒު ވައުދުވެވަޑައިގަތެވެ. 

މީގެ އިތުރުން އިކޯ ޓޫރިޒަމްގެ މުހިންމު މަންޒިލަކަށް ފަރުކޮޅު ބަދަލުކުރާނެ ކަމަށް މުއިއްޒު ވައުދުވެވަޑައިގެންނެވިއެވެ.