އިލްމުވެރިންގެ ޖަމުއިއްޔާގެ ފަރާތުން ދިވެހިރާއްޖޭގެ އީއީޒެޑްއާ ބެހޭ ގޮތުން ރައީސުލްޖުމްހޫރިއްޔާގެ އޮފީހުން ހޯދަން އެދުނު މައުލޫމާތު އަންނަ ސެޕްޓެމްބަރު މަހުގެ ނިޔަލަށް ފޯރުކޮށްދިނުމަށް އިންފޮމޭޝަން ކޮމިޝަނަރުގެ އޮފީހުން އަންގައިފިއެވެ.
މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެ މައުލޫމާތު ތައް ހޯދުމަށް އެދި އިލްމުވެރިންގެ ގުޅުން ޖަމިއްޔާއިން ރައީސް އޮފީހަށް ހުށަހެޅީ 17 މެއި 2023 ވަނަ ދުވަހުއެވެ. އެގޮތުން އިލްމުވެރިންގެ ގުޅުމުގެ ފަރާތުން ހޯދަން އެދިފައިވަނީ ދިވެހިރާއްޖޭގެ އީއީޒެޑާއި ކޮންޓިނެންޓަލް ޝެލްފާއި ގުޅޭގޮތުން ރައީސް އޮފީހުގެ ދަށުން މިހާތަނަށް ހިނގާފައިވާ އަދި ކުރެވިފައިވާ ހުރިހާ މުއާމަލާތެއްގެ ތެރެއިން ހިއްސާ ކުރެވެން ހުރި ހުރިހާ މައުލޫމާތެވެ.
ނަމަވެސް އެ އޮފީހުން އެކަމާއި ގުޅޭ އެއްވެސް މައުލޫމާތެއް ހާމަކޮށްފައި ނުވާތީ، އެކަމުގެ ޝަކުވާ، އިލްމުވެރިންގެ ގުޅުމުން ކުރުމާއި ގުޅިގެން އިންފޮމޭޝަން ކޮމިޝަނުން އިއްޔެ ވަނީ ބައްދަލުވުމެއް ބާއްވާފައެވެ.
އެ ބައްދަލުވުމުގައި، އެ މައުލޫމާތު ހާމަކޮށްފައި ނުވަނީ ކީއްވެތޯ ސުވާލުކުރުމުން ރައީސް އޮފީހުގެ ލީގަލް ޓީމުގެ ފަރާތުން ބުނީ އެ މައްސަލާގައި ލީގަލްއިން ނިންމާފައިވަނީ އެކަމާއި ގުޅޭގޮތުން ހާމަކުރެވެން ހުރި ހުރިހާ މައުލޫމާތެއް އިލްމުވެރިންގެ ގުޅުމަށް ދޭން ކަމަށާ އެހެން ނަމަވެސް ހޯދަން އެދިފައިވަނީ ތަންކޮޅެއް ފުޅާ ދާއިރާއެއްގެ މައުލޫމާތުތަކެއްކަމަށް ފާހަގަކުރެވޭތީ އަދިވެސް އިތުރު މުއްދަތެއް ބޭނުންވާ ކަމަށެވެ.
އެއާއެކު ހޯދަން އެދެނީ ވަކި މުއްދަތަކާއި ގުޅޭ މައުލޫމާތު ތޯ އިންފޮމޭޝަން ކޮމިޝަނަރު ސުވާލު ކުރުމުން އިލްމުވެރިންގެ ގުޅުމުން ބުނީ ހޯދަން ބޭނުންވަނީ ރައީސް މައުމޫންގެ ވެރިކަމުގެ ފެށިގެން ނުވަތަ 1978 އިން ފެށިގެން ދިވެހިރާއްޖޭގެ އީއީޒެޑާއި ކޮންޓިނެންޓަލް ޝެލްފާއި ގުޅޭގޮތުން ރައީސް އޮފީހުގެ ދަށުން މިހާތަނަށް ހިނގާފައިވާ އަދި ކުރެވިފައިވާ ހުރިހާ މުއާމަލާތެއްގެ މައުލޫމާތު ކަމަށެވެ.
އެހެންކަމުން އިންފޮމޭޝަން ކޮމިޝަނަރާއި މައްސަލާގައި ހިމެނޭ ދެފަރާތުން މަޝްވަރާ ކުރެއްވުމަށް ފަހު ނިންމީ މިހާރު ހިއްސާކުރެވެން ހުރި މައުލޫމާތު ހިއްސާކުރަމުން ގެންދިއުމަށް ކަމަށެވެ. އަދި އަންނަ ސެޕްޓެމްބަރު މަހުގެ ނިޔަލަށް ހިއްސާކުރެވެން ހުރި ހުރިހާ މައުލޫމާތެއް ހިއްސާކުރުމަށެވެ.
Advertisement
This content is created and paid for by advertisers and does not involve Voice Journalists
