ސަރުކާރު މިގޮތުގައި ދެމި އޮވެ ވަޢުދުތައް ފުއްދައިދެމުން މިދެވެނީ ކޯލިޝަންގައި މަޝްވަރާ ކޮށްގެން ކުރިއަށްދާތީ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިފަދައިން ވިދާޅުވީ ރ ދުވާފަރުގައި ރޭ ބޭއްވުނު ކެމްޕޭނު ޖަލްސާގައި ވާހަކަދައްކަވަމުންނެވެ.

"އަޅުގަނޑުމެންނަށް، އަޅުގަނޑުމެންނަށް ވެރިކަމަށް އާދެވުނު ގޮތް ވަރަށް ސާފުކޮށް އިނގޭ، އެދުވަހުވީ ވަޢުދާއި އެއްގޮތަށް އަޅުގަނޑުމެން މިދަނީ ސަރުކާރު ހިންގަމުން، ކޯލިޝަންގައި ހިމެނޭ ހުރިހާ ފަރާތްތަކެއްގެ މަޝްވަރާއާއި ލަފަޔާއި އެކީގައި ކަންތައްތައް ނިންމަމުން މިގެންދަނީ، އެހެންވީމަ މިއަދާއި ހަމައަށް މިސަރުކާރު ދެމިއޮވެ، ވީ ވަޢުދުތައް ފުއްދެމުން މިދަނީ" ރައީސް ޞާލިޙް ވިދާޅުވިއެވެ.

Advertisement

ރައީސް ޞާލިޙް ވިދާޅުވީ ވާދަވެރިން ދައްކާވާހަކައަކީ އަރާ ކޮންމެ ރަށަކުން ވަޢުދުވާ ވާހަކަ ކަމަށާއި، އެކަން ކޮށްދޭނީ ކިހިނެއްތޯ އެފަރާތްތަކުން ސުވާލު ކުރައްވާ ކަމަށެވެ.

ޕީއެސްއައިޕީ ބަޖެޓުން މިހާތަނަށް 34 ބިލިއަނަށް ވުރެ ގިނަ ރުފިޔާ ރާއްޖޭގެ ތަރައްޤީގެ މަޝްރޫޢުތަކަށް މިހާތަނަށް ހޭދަ ކުރައްވައިފިކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ 2013 އިން 2018 އާއި ހަމައަށް އެބޭފުޅުންނަށް އެފުރުސަތު ލިބުނު ކަމަށާއި، ރައްޔިތުން ބާރުތައްވެސް ދިން ކަމަށެވެ. ކަންވެގެންދިޔަ ގޮތް ރައްޔިތުންނަށް އެނގޭނެކަމަށާއި، އެންމެ ބޮޑު މައްސަލައަކީ ވެރިކަމަށް އާދެވުނު ގޮތް ހަނދާންނެތުން ކަމަށެވެ. ތިމާ ވެރިކަމަށް ގެނައުމަށްޓަކައި މަސައްކަތް ކުރި މީހުންގެ މަތިން ހަނދާން ނައްތާލީމާ އެހިސާބުން މަގު އޮޅުނީ ކަމަށް ރައީސް ޞާލިޙް ވިދާޅުވިއެވެ.

ދުވާފަރުގައި އެމްޑީޕީ ކޯލިޝަން ޖަލްސާ ކުރިއަށްދަނީ. ފޮޓޯ: އެމްޑީޕީ

ކޯލިޝަންގެ ގޮތުގައި ތިބި މީހުން ފޭކުރަމުންގޮސް ވެރިކަމަކީ ތިމާގެ މިލްކެއްކަމަށް ދެކި ކުރަން ފެށި މަސައްކަތުން މުޅި ޤައުމު ސިޔާސީ ހަލަބޮލިކަމުގެ ތެރެއަށް ވައްޓާލީ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ ކުރީ ސަރުކާރަށް ރައްޔިތުންނަށް ކަންކަން ނުކޮށްދެވުނު އެއް ސަބަބަކީ އެއީ ކަމަށެވެ. މީގެއިތުރުން ރައީސް ޞާލިޙް ވިދާޅުވީ މި އިންތިޚާބު މިހާރުމިއޮތީ ރައްޔިތުން ގޮތަކަށް ނިންމައިފައިކަމަށެވެ.

"އަޅުގަނޑުމެންގެ ތެރޭގައި ތިބި ވާދަވެރިންނަށް އަޅުގަނޑު ދަންނަވާލަން ބޭނުންވަނީ އަދި އިތުރަށް ރުޅި އިސްނުކުރައްވާ ވިސްނާވަޑައިގަންނަވާށޭ، އަދިވެސް އަޅުގަނޑު ދަންނަވާނީ ރުޅި އިސްނުކުރައްވާ ވިސްނުން އިސްކުރައްވާށޭ، އަދިވެސް ފުރުސަތެއް ނުގެއްލޭ" ރައީސް ވިދާޅުވިއެވެ.

 ރައީސް ޞާލިޙް ވިދާޅުވީ ކޮންމެވެސް ގޮތެއް ހަދައިގެން މިއިންތިޚާބު ދެވަނަ ބުރަކަށް ގެންދިޔުމަށް މަސައްކަތް ކުރާ ބަޔަކު އެބައުޅޭ ކަމަށެވެ. އަދި އެބަޔަކު ބޭނުންވަނީ އަމިއްލަ ފައިދާއަށް ކަންތައްތަކެއް ކުރުމަށް ކަމަށްވެސް ރައީސް ޞާލިޙް ވިދާޅުވިއެވެ.

ދުވާފަރުގައި ރޭ ބޭއްވުނު ކެމްޕޭނު ޖަލްސާ ފެނިގެން ގޮސްފައިވަނީ ވަރަށްފޯރި ގަދަކޮށެވެ.