ހައި ސްޕީޑް އިންޓަނެޓްގެ ހިދުމަތް ރާއްޖެ އަށް ދިނުމަށް ޓެސްލާ އާއި ޓްވިޓާގެ ވެރިޔާ އަދި ދުނިޔޭގެ އެންމެ ބޮޑު އެއް މަހުޖަނު، އިލޮން މަސްކްގެ 'ސްޓާލިންކް' އަށް މިއަދު ލައިސަންސް ދޫކުރަން ސަރުކާރުން ނިންމައިފި އެވެ.
ސްޓާލިންކަށް އައިއެސްޕީ ލައިސަންސް ދިނުމަށް ބާއްވާ އިވެންޓް މިއަދު ހަވީރު އޮންނާނެ ކަމަށް އެންވަޔަރްމަންޓް، ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓްރީން ވަނީ ބުނެފައެވެ.
ނަމަވެސް އެކަމުގެ ތަފްސީލް ދެއްވާފައި ނުވާއިރު، ޓެކްނޮލޮޖީ މިނިސްޓްރީން މިދިޔަ އަހަރުގެ ފެބްރުއަރީ މަހުގެ 22 ވަނަ ދުވަހު އެކަމާއި ގުޅޭ ޓުވީޓެއް ވަނީ ކުރައްވާފައެވެ. އެ ޓްވީޓްގައިވަނީ އެ ޚިދުމަތް ފޯރުކޮށް ދިނުމާ ބެހޭގޮތުން މިނިސްޓަރު ޝައުނާ އާއި ސްޓާލިންކްގެ މާކެޓް އެކްސެސް ޑައިރެކްޓާ ރަޔާން ގުޑްނައިޓާ އެކު މިއަދު މަޝްވަރާ ކޮށްފައިވާ ކަމަށެވެ.
އީލޮން މަސްކުގެ ސްޕޭސް އެކްސް ކުންފުނިން ސެޓެލައިޓް މެދުވެރިކޮށް ހައި ސްޕީޑް އިންޓަނެޓް ދުނިޔޭގެ އެކި ގައުމުތަކަށް ދަނީ ފޯރުކޮށްދެމުންނެވެ.
އެގޮތުން ސްޓާލިންކްގެ އިންޓަނެޓް މިހާރު ލިބޭ 50 އަށް ވުރެ ގިނަ ގައުމު ހިމެނޭއިރު ސްޓާ ލިންކްގެ ސްޕީޑަކީ ސިކުންތަކު 50-150 މެގަބިޓެވެ. އަދި މިދިޔަ އަހަރުގެ ތެރޭގައި ސިކުންތަކު 300 މެގަބިޓް ސްޕީޑަށް ވެސް ހަދާފައިވެއެވެ.
Advertisement
This content is created and paid for by advertisers and does not involve Voice Journalists
