ޖުމްހޫރީ ޕާޓީގެ ސަރުކާރެއްގައި މޫނު ބުރުގާއަޅާ ކަނބަލުންނަށް އެއްވެސް ތަފާތުކުރުމެއް ނުގެންގުޅޭނެ ކަމަށާ، އެ ކަނބަލުންނަށް ހުރިހާ މައިދާނެއްގައިވެސް ހަމަހަމަ ފުރުސަތެއް ދެއްވާނެ ކަމުގެ ޔަގީންކަން ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ދެއްވައިފިއެވެ.
ރިޔާސީ އިންތިހާބުގެ ކެމްޕެއިނަށް ނ އަތޮޅަށް ކުރައްވަމުންދާ ދަތުރުފުޅުގައި ނ. ހެނބަދޫގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުން ގާސިމް ވިދާޅުވީ އެމަނިކުފާނުގެ ސަރުކާރެއްގައި އަބަދުވެސް މަސައްކަތް ކުރައްވާނީ އިސްލާމީ އުސޫލުތަކުގައި ހިފަހައްޓައިގެން ކުރިއަށްދިއުމަށް ކަމަށެވެ.
ގާސިމްވަނީ ތައުލީމީ ދައިރާއަށާއި އަންހެނުން ބާރުވެރިކުރުމަށް އެމަނިކުފާނު އެކަށައަޅުއްވާފައިވާ ވައުދުތަކުގެ ތެރެއަށް މި ވައުދު އިތުރު ކުރައްވާފައެވެ. ގާސިމްވަނީ އެމަނިކުފާނުގެ ސަރުކާރެއްގައި އަބަދުވެސް މަސައްކަތް ކުރައްވާނީ އިސްލާމީ އުސޫލުތަކުގައި ހިފަހައްޓައިގެން ކުރިއަށްދިއުމަށް ކަމަށެވެ.
އެއާއެކު މޫނުބުރުގާ އަޅާ ކަނބަލުންނަށް މި ސަރުކާރުންނާއި ކުރީ ސަރުކާރު ތަކުން ގެންގުޅުއްވި ތަފާތު ކުރުންތައް ގާސިމްގެ ސަރުކާރެއްގައި ނުގެންގުޅުއްވާނެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
އަދި މޫނު ބުރުގާގެ މައްސަލައަކީ އިސްލާމްދީނުގައި އިހުތިލާފް އުފެދިފައިވާ މައްސައެއް ނަމަވެސް ދީނުގެ ބައެއް އުސޫލުތަކަށް ބަލާނަމަ އެއީ ވަރަށް އެދެވިގެންވާ ރިވެތި ސިފައެއްކަމަށްވެސް ގާސިމް ވިދާޅުވި އެވެ.
" އަޅުގަނޑުގެ ވެރިކަމެއްގައި އެއްވެސްތަނެއްގައި މޫނު ބުރުގާ އަޅުއްވައިގެން މަސައްކަތްކުރުމަކަށް ހުރަހެއްނެތޭ. ކިޔަވައިދެއްވުމަށް ނަމަވެސް. އޮފީސްތަކުގެ ވަޒީފާ ނަމަވެސް ހެވޭ. އެބޭފުޅަކު ބޭނުންފުޅުވާ ގޮތަކަށް އެ އިންތިޒާމް ހަމަޖެހިގެން ދާނެ. އެއީ އިސްލާމީ ނަމޫނާއެއް. "
ޖޭޕީގެ ރިޔާސީ ކެންޑިޑޭޓް ގާސިމް އިބްރާހިމް
ގާސިމްގެ މެނިފެސްޓޯގައި ބާރުވެރި އަންހެނާގެ ވައުދުތަކުގެ ތެރެއަށް އެކަށައަޅާފައިވާ އެންމެ މުހިންމު އެއް ވައުދަކީ ވަޒީފާގެ މައިދާނުގައި ހަރަކާތްތެރިވާ އަންހެނުންނަށް ތަފާތުކުރުމެއްނެތި ފުރުސަތު ދިނުން ކަމުގައި ޖޭޕީން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
