ސްޕެނިޝް ލަލީގާގައި ރޭ ރަށުން ބޭރުގައި ސެލްޓަ ވީގޯ އާއި ދެކޮޅަށް ކުޅުނު މެޗުގެ ވަރަށް ކުރީކޮޅު އެޓީމުގެ އިތުބާރު ފޯވާޑް ވިނީޝިއަސް ޖޫނިއަރ އަށް އަނިޔާވެ ބަދަލުކުރަށް ޖެހުނުއިރު، 1-0 ގެ ނަތީޖާއަކުން މޮޅުވެ ރެއާލް މެޑްރިޑް ލީގު ތާވަލުގެ އެއްވަނައަށް ކުރިއަށް ޖެހިލައިފި އެވެ.

ސީޒަން ފެށުމުގެ ކުރިން ރެއާލްގެ އެއް ނަންބަރު ކީއްޕަރު ކޯޓުއާއަށް އަނިޔާވެ، މިސީޒަނުގައި އޭނާ ނުކުޅެވޭނެކަން ކަށަވަރުވެފައިވާ އިރު، ލީގުގެ ފުރަތަމަ މެޗުގައި އެޓީމު އެންމެ މުހިންމު އެއް ޑިފެންޑަރު މިލީޓޯ އަށް އަނިޔާވެ ވަނީ ދިގު މުއްދަތަކަށް ކުޅުމާއި ދުރުގައި ހުންނަންޖެހިފައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ރެއާލް މެޑްރިޑަށް އިތުރު މައްސަލަތަކެއް ކުރިމަތިވީ ފުރަތަމަ ހާފުގެ 18ވަނަ މިނެޓުގައި ވިނީޝިއަސް ޖޫނިއަރ އަށް އަނިޔާވެ ބަދަލުކުރަށް ޖެހުމާއި ގުޅިގެންނެވެ. މިހާފުގައި ރެއާލް އިން އެންމެ ހުސް ފުރުސަތެއް ލިބުނީ ވިނީޝިއަސްގެ ބަދަލުގައި ކުޅެންނުކުތް ޖޯސެލޫ އަށެވެ. ފުރަތަަމަ ހާފުގެ 43 ވަނަ މިނެޓުގައި ލިބުނު ހުސް ފުރުސަތުގައި ޖޯސެލޫ ގޯލުގެ ތެރެއަށް ބޯޅަ ފޮނުވާލި ނަމަވެސް ލައިންސްމަން އޭރު ހުރީ އޮފްސައިޑް ކަމަށް ދިދަ ނަގާފައެވެ.

މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ރެއާލް މެޑްރިޑުން ބަދަލުތަކެއް ގެނެސް އެޓީމުގެ އެޓޭކުތައް އިތުރަށް ވަރުގަދަކުރި އިރު، ފަހުހާފުގެ 66 ވަނަ މިނެޓުގައި ސެލްޓާގެ ޕެނަލްޓީ އޭރިއާ ބޭރުން ތެރެއިިން އެޓީމުގެ ކީއްޕަރު ރެއާލްގެ ބްރެޒިލް ފޯވާޑް ރޮޑްރިގޯ އަށް ކުރި ފައުލަކާއި ގުޅިގެން ރެފްރީ ވަނީ އެޓީމަށް ޕެނަލްޓީއެއް ދީފައެވެ. ނަމަވެސް ރޮޑްރިގޯ ފޮނުވާލި ޕެނަލްޓީ ސެލްޓާގެ ކީއްޕަރު އިވާން ވިލާރ ވަނީ ހުޝިޔާރުކަމާއެކު ދިފާއުކޮށްފައެވެ.

މި މެޗުން ރެއާލް މެޑްރިޑް މޮޅުވި ލަނޑު ދެވަނަ ހާފުގެ 81 ވަނަ މިނެޓުގައި ކާމިޔާބުކޮށްދިނީ އެޓީމުގެ އިގިރޭސި މިޑްފީލްޑަރު ބެލިންހަމް އެވެ. މިއީ މިސީޒަނުގައި ރެކޯޑް ޓްރާންސްފާ ފީއެއްގައި ޖަރުމަނުގެ ބޮރޫޝިއާ ޑޯޓްމަންޑް އިން އެޓީމާއި ގުޅުނު ޒުވާން މިޑްފީލްޑަރު ލީގުގައި ކުޅުނު ތިން މެޗުގައި އެޓީމަށް ކާމިޔާބުކޮށްދިން ހަތަރުވަނަ ލަނޑެވެ. މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ވެސް މޮޅުވެ، 9 ޕޮއިންޓާއެކު ރެއާލް މެޑްރިޑް މިވަގުތު އޮތީ ލީގު ތާވަލްގެ އެއްވަނައިގައެވެ. އަދި މި މެޗުން ބަލިވި ސެލްޓަ ވީގޯ ކުޅުނު ތިން މެޗުން ލިބުނު އެއް ޕޮއިންޓާއެކު މިވަގުތު އެޓީމު އޮތީ ލީގު ތާވަލްގެ 16 ވަނައިގައެވެ.