އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ފުލަމް އާއި ދެކޮޅަށް އަމިއްލަ ދަނޑުގައި އާސެނަލް އިން ކުޅުނު މެޗު 2-2 ގެ ނަތީޖާއަކުން ދެޓީމް އެއްވަރުވެއްޖެ އެވެ.

މެޗު ފެށިގެން ފުރަތަމަ މިނެޓުގައި ފުލަމް އިން ލަނޑެއް ކާމިޔާބުކޮށް މެޗުގެ ލީޑު ހޯދިއިރު، މިލަނޑު އެޓީމަށް ކާމިޔާބުކޮށްދިނީ ބްރެޒިލްގެ މިޑްފީލްޑަރު އަންދްރޭސް ޕެރެއިރާ އެވެ. ފުލަމްގެ ލަނޑަށްފަހު މިހާފުގައި އާސެނަލް އިން މެޗު ޑޮމިނޭޓުކޮށް ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް ފުރަތަަމަ ހާފު ކުޅުން ނިމިގެންދިޔައީ 1-0 ގެ ނަތީޖާއަކުން ފުލަމް ކުރީގައި އޮވެގެންނެވެ.

މެޗުގެ ދެވަަނަ ހާފުގައި އާސެނަލް އިން އެޓީމުގެ އެޓޭކުތައް އިތުރަށް ވަރުގަދަކުރި އިރު، އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 70 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ އިގިރޭސި ފޯވާޑް ބަކަޔޯ ސަކާ އެވެ. އަދި މި މެޗުގައި އާސެނަލް އިން ފުރަތަަމަ ފަހަރަށް ލީޑު ހޯދި ލަނޑު އޭގެ ދެމިނެޓު ފަހުން ކާމިޔާބު ކޮށްދިނީ އެޑީ އެންކެޓިއާ އެވެ. މިއީ އެޓީމުގެ ޕޯޗުގަލް މިޑްފިލްޑަރު ފަބިއޯ ވިއޭރާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ފުލަމްއަށް އިތުރު މައްސަލަތަކެއް ކުރިމަތިވީ ފަހުހާފު 83 ވަނަ މިނެޓުގައި ރެފްރީ އެޓީމުގެ ނައިޖީރިއާ ޑިފެންޑަރު ކެލްވިން ބާސޭއަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލުމުންނެވެ. ނަމަވެސް އޭގެ ހަތަރު މިނެޓު ފަހުން އެޓީމުގެ ޕޯޗުގަލް މިޑްފިލްޑަރު ޖޮއާއޯ ޕަލްހިންހާ ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެގެންނެވެ. މި މެޗުން ލިބުނު އެއް ޕޮއިންޓާއެކު ކުޅުނު ތިން މެޗުން ލިބުނު 7 ޕޮއިންޓާއެކު އާސެނަލް މިވަގުތު އޮތީ ލީގު ތާވަލްގެ 2 ވަނައިގައެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ތިން މެޗުން ލިބުނު ހަތަރު ޕޮއިންޓާއެކު ފްލަމް މިވަގުތު އޮތީ ލީގު ތާވަލްގެ 11 ވަނައިގައެވެ.