ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ ވެރިކަމެއްގައި ކުޅިވަރުގެ ހުނަރުވެރިން އާ ހަރުފަތަކަށް ގެންގޮސްދެއްވާނެ ކަމުގެ ޔަގީންކަން ދެއްވާކަމަށް ޤާސިމްގެ އިންތިޚާބީ އޭޖެންޓު އަދި މި ސަރުކާރުގެ ފުރަތަމަ ޓުއަރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ. 

އަލީ ވަހީދު މިފަދައިން ވިދާޅުވެފައިވަނީ ޤާސިމް އިބްރާހިމް އދ މަހިބަދޫއަށް ކުރެއްވި ރިޔާސީ ކެމްޕޭނު ދަތުރުފުޅުގައި އެ ރަށުގައި ބޭއްވި ބައްދަލުވުމެއްގައި ވާހަކަދައްކަވަމުން ނެވެ. 

އެ ބައްދަލުވުމުގައި ވާހަކަދައްކަވަމުން އަލީ ވަހީދު ވަނީ މަހިބަދޫއިން އުފެއްދި ޤައުމީޓީމު ތަމްޞީލުކުރި ފުޓްބޯޅަ ކުޅުންތެރިންނަށް ތައުރީފްކުރައްވާ އެކުޅުންތެރިން ގައުމަށް ހޯދާދީފައިވާ ކާމިޔާބީތަކުގެ ހަނދާން އައު ކުރައްވާފައެވެ.

އަލީވަހީދު ވިދާއަޅުވީ ޒުވާނުންނާއި ކުޅިވަރަށް އެންމެ ފުރިހަމަ މެނިފެސްޓޯއެއް ގެނެސްދީފައިވަނީ ގާސިމް އިބްރާހިމް ކަމަށާއި މަހިބަދޫފަދަ ކުޅިވަރުގެ ހުނަރުވެރިން އުފައްދާ މަރުކަޒަކުން ގާސިމް އިބްރާހިމްގެ ވެރިކަމެއްގައި އައު ހަރުފަތްތަކަށް ދިއުމުގެ ފުރުޞަތު ތަނަވަސްވާނެ ކަމަށެވެ.

މަހިބަދޫއަކީ މަސްވެރި ރަށަކަށްވުމާއެކު ޤާސިމްގެ ވެރިކަމެއްގައި ހުރި ފުރުޞަތުތަކާއި ބެހޭ ގޮތުން އަލީ ވަހީދު ވަނީ މަހިބަދޫގެ ރައްޔިތުންނަށް މައުލޫމާތު ދެއްވާފައެވެ. ރާއްޖެއަކީ ކަނޑުގެ ސަރަހައްދު ބޮޑު ގައުމަކަށްވުމާއެކު ކަނޑުރޯދިން ނަފާ ހޯދުމަށް ފުރުޞަތު ގާސިމްގެ ވެރިކަމެއްގައި އިތުރު ވަސީލަތްތަކާއެކު ފުރިހަމަކޮށްދެއްވާނެ ކަމަށް އަލީ ވަހީދު ވިދާޅުވިއެވެ.

އަލީ ވަހީދު ވިދާޅުވީ "އިބޫ ޞާލިހު" ނޫންގޮތެއް ހޯދާއިރު ދެވަނަ އިބޫ ޞާލިޙެއް ގެނެވިދާނެ ކަމަށް ރައްޔިތުން ސަމާލުވަންޖެހޭ ކަމަށެވެ. ޕީޕީއެމްގެ އެންމެ ގިނަ މެމްބަރުން ލޯބިވާ ރައީސް ޔާމީން އޮންނެވީ ޖަލުގައި ކަމަށާއި އެމަނިކުފާނު މިނިވަންކުރުމަށް ގިނަ ބޭފުޅުން މަސައްކަތް ކުރަވަމުންދަނިކޮށް ޕީޕީއެމްގެ ތެރެއިން ޑިމޮކްރެޓިކް ޕްރޮސެސްއެއްނެތި ޕީޕިއެމް ބޭނުންވާ ކެންޑިޑޭޓަކުނެރުމުގެ ފުރުޞަތު ނުލިބި އެހެން ޕާޓީއަކަށް ޓިކެޓް ލިބި ތާއީދު ކުރަންޖެހުނު ގޮތާއިމެދު ވިސްނަންޖެހޭ ކަމަށް އަލީ ވަހީދު ވިދާޅުވި އެވެ.

ވެރިކަމެއް ގެނެސްދިނުމުން ގާސިމް ބޭކާރުވެ ވަނީ ސޭޓަށް ކަމަށާއި ދެވަނަ ބުރަކަށްދާންޖެހުމުން އެއީ ގައުމީ ބަތަލުކަމަށާއި، އެއީ ބޮޑު ތަކުރުފާނު ކަމަށާއި، ކުނޫޒާއި މާފަންނުވިލާ ކައިރިން ސިޔާސީ ލީޑަރުން ފިލާނުދާކަން އަލީ ވަހީދުގެ ވާހަކއިގައި ފާހަގަކުރެއްވި އެވެ. 

އެހެންކަމުން މި އިންތިޚާބުގައި ރައްޔިތުން މި ކަންކަމާއި ދޭތެރޭ ފުންކޮށް ވިސްނެވުމަށްފަހު ގޮތެއް ނިންމެވުމަށް އަލީ ވަހީދު ވަނީ އެދިވަޑައިގެންފަ އެވެ.