ގދ ގައްދޫ ރައްޔިތުން ދެކެމުން އަންނަ ޒަމާނީ ހޮސްޕިޓަލުގެ ހުވަފެން ހަގީގަތަކަށް ހައްދަވާދެއްވާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވައުދުވެވަޑައިގެންފި އެވެ.
އެމަނިކުފާނު މިފަދައިން ވިދާޅުވެފައި ވަނީ ގދ އަތޮޅަށް ކުރައްވާ ކެމްޕޭނު ދަތުރުފުޅުގައި ގައްދޫއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. ޑރ މުއިއްޒު ވިދާޅުވީ ގައްދޫގައި ސިއްޙީ ޚިދުމަތް ފުޅާވެގެން ދިއުމަކީ ރައްޔިތުން އެންމެ ބޭނުންވާ ކަންތައް ކަމަށެވެ.
އެގޮތުން ރަށުގައި ތިބެގެން އެކަށީގެންވާ ސިއްހީ ޚިދުމަތްތައް ލިބުމުގެ ލުއި ފަސޭހަކަން ފަހިވެގެން ދިއުމަކީ ރައްޔިތުން ޒަމާނުއްސުރެ ދެކެމުންއަންނަ ހުވަފެނެއް ކަމަށާއި، ވެރިކަން ލިބިވަޑައިގެންފި ނަމަ އެ ހުވަފެން ހަގީގަތަކަށް ހައްދަވާދެއްވާނެ ކަމަށް ޑރ މުއިއްޒު ވިދާޅުވި އެވެ.
އޭގެ އިތުރުން އެމަނިކުފާނު ވިދާޅުވީ ގައްދޫ އެއާޕޯޓު ތަރައްގީކޮށް، އެ އެއާޕޯޓަކީ އެކަށީގެންވާ ޚިދުމަތްތަކެއް ފޯރުކޮށްދެވޭނެ ތަނެއްގެ ގޮތުގައި ތަރައްގީކުރާނެ ކަމުގެ ޔަގީންކަން ވެސް ދެއްވާކަމަށެވެ. އަދި ހަަމަ އެއާއެކު އެ ރަށުގެ ރައްޔިތުންގެ ފުދުންތެރިކަން އިތުރުކުރުމަށް ވިޔަފާރިއާއި ފަތުރުވެރިކަމުގެ ސިނާއަތް ފުޅާކުރެވޭނެ މަޝްރޫއުތައް ހިންގަވާދެއްވާނެ ކަމުގެ ޔަގީންކަން ވެސް ދެއްވާކަމަށް ޑރ މުއިއްޒު ވިދާޅުވި އެވެ.
އެކަން ފާހަގަކުރައްވާ ޑރ މުއިއްޒު ވިދާޅުވީ ސެޕްޓެމްބަރު މަހުގެ 9 ގައި ވޯޓުލާން ދާއިރު، ރައްޔިތުންގެ އުންމީދުތަކުގައި ކުލަ ޖައްސާދޭނެ ބައެއް އިޚްތިޔާރުކުރުން މުހިންމު ކަމަށެވެ. ރައްޔިތުން އެދޭ ތަރައްގީ ގެނެސްދެވޭނީ ކޮން ބަޔަކަށް ތޯ ބަލައި، އެފަދަ ބަޔަކާއި ގައުމުގެ ހިންގުން ހަވާލުކުރެއްވުމަށް އެދިވަޑައިގަންނަވާކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކުފާނު ވިދާޅުވީ ރައްޔިތުން އިތުބާރު ކުރައްވާ ޕްރޮގްރެސިވް ކޮންގްރެސް ކޯލިޝަނަށް ރައްޔިތުންނަށް ޚިދުމަތްކުރުމުގެ ފުރުސަތު ދެއްވައިފިނަމަ މުޅި ޓީމު ރެއާއި ދުވާލު ވަރުބަލިކަމެއް ނެތި މަސައްކަތްކުރަމުން ގެންދާނީ ރައްޔިތުންނަށް ބޭނުންވާ ކަންކަން ފުރިހަމަކޮށްދިނުމަށް ކަމަށެވެ. އަދި ރައްޔިތުންނަށް އުފާވެރި ދިރިއުޅުމެއް ހޯދާދިނުމަށް ކަމަށެވެ.
Advertisement
This content is created and paid for by advertisers and does not involve Voice Journalists
