މާލެ ސަރަހައްދުގެ ރައްޔިތުންގެ ތެރެއިން ގޯތި ލިބުނު ފަރާތްތަކަށް ގޯތި ހަވާލުކުރުން މިއަދުން ފެށިގެން ކުރިއަށް ދާނެ ކަމަށް ޕްލޭނިންގެ މިނިސްޓްރީ އިން ބުނެފިއެވެ.

އެމިނިސްޓްރީ އިން ބުނެފައިވަނީ މިއަދު ހަވީރު 4:00 ފެށިގެން ހުޅުމާލެ ސިންތެޓިކް ޓްރެކްގައި އޮންނާނެކަމަށެވެ. ސިންތެޓިކް ޓްރްކަށް ދާ މީހުން ގޯތި ކެނޑުމަށް ހަމަޖެހިފައިވާ ސަރަޙައްދަށް ގެންދިޔުމަށް ހަމަޖެހިފައިވަނީ ބަހުގައި ކަމަށް އެމިނިސްޓްރީ އިން ވަނީ ބުނެފައެވެ.

ހައުސިންގ މިނިސްޓްރީ އިން ނެރެފައިވާ ބަޔާނެއްގައި ބުނެފައިވަނީ ގޯއްޗާ ޙަވާލުވުމަށާއި ގޯއްތި ދޫކުރުމުގެ އެއްބަސްވުމުގައި ސޮއިކުރުމަށް ގޯތި ލިބޭ ފޯމުގައި ހިމެނޭ ގޯތި ލިބޭ ފަރާތްތަކުން ހާޒިރުވާނެ ދުވަހާއި ގަޑި މިނިސްޓްރީގެ ފަރާތުން އަންގަމުން ގެންދާނެ ކަމަށެވެ.

ގޯތި ލިބޭ ފޯމުގައި ހިމެނޭ ގޯތި ލިބޭ ފަރާތަކުން ގޯއްޗާ ހަވާލުވުމަށާއި ގޯތި ދޫކުރުމުގެ އެއްބަސްވުމުގައި ސޮއިކުރުމަށް ބަދަލުގައި އެހެން ފަރާތެއް އައްޔަނުކުރާނަމަ "ގެދޮރުވެރިން ޕޯޓަލް" ގައި އެޓޭޗްކޮށްފައިވާ ޕަވަރ އޮފް އެޓާނީ ފުރިހަމަކުރެއްވުމަށްފަހު ނޮޓޮރައިޒްކޮށް،  ގޯއްޗާ ހަވާލުވުމަށާއި ގޯތި ހަވާލުވުމުގެ އެއްބަސްވުމުގައި ސޮއިކުރުމަށް ފޮނުވާ ފަރާތާއި ޙަވާލުކުރަށްވަން ވާނެ ކަމަށް ވެސް އެމިނިސްޓްރީ އިން ބުނެފައިވެއެވެ.

ގޯއްޗާއި ޙަވާލުވުމަށާއި ގޯތި ޙަވާލުކުރުމުގެ އެއްބަސްވުމުގައި ސޮއިކުރަން ވަޑައިގަންނަވާ ފަރާތްތަކުން ގޯތި ލިބޭ ފަރާތްތަކުގެ އައިޑީ ކާޑުގެ ކޮޕީ، އަދި ބަދަލުގައި ސޮއި ކުރަން ވަޑައިގަންނަވާ ފަރާތެއްނަމަ ގޯތި ދޫކުރުމުގެ އެއްބަސްވުމުގައި ސޮއިކުރުމަށް އައްޔަނުކޮށްފައިވާ ޕަވަރ އޮފް އެޓާނީގެ އަސްލާއި، އައި.ޑީ ކާޑުގެ ކޮޕީ ހިއްޕަވައިގެން ވަޑައިގަތުމަށް އެމިނިސްޓްރީ އިން ބުނެފައިވެއެވެ.

އަދި ގޯތި ޙަވާލުކުރުމުގެ އެއްބަސްވުމުގެ ނަމޫނާ އާއި ޕަވަރ އޮފް އެޓާނީ 27 އޯގަސްޓް 2023 އިން ފެށިގެން "ގެދޮރުވެރިން ޕޯޓަލް" އިން ފެންނަން ހުންނާނެ ކަމަށްވެސް ބުނެފައިވެއެވެ.