ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގެ 5 އަހަރު ސިއްޙީ ދާއިރާއަށް އިހުމާލުވެ، ދައުލީމީ ދާއިރާއަށް އެއްވެސް ވަރަކަށް އަޅާނުލާ އޮތްކަމުގެ ޝަކުވާތައް ރައްޔިތުން ކުރަމުންދާކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓޫ ޑރ މުހައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައިވަނީ އެމަނިކުފާނު ގދ އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅުގެ ހޯޑެއްދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަފުޅުދައްކަވަމުން ނެވެ. 

އެގޮތުން ޑރ މުއިއްޒު ވިދާޅުވީ އެމަނިކުފާނު ވަޑައިގަންނަވާ ކޮންމެ ރަށަކުން ވެސް އެންމެ ގިނައިން ރައްޔިތުން ކުރައްވާ ޝަކުވާ އަކީ ސިއްޙީ ޚިދުމަތް އެކަށީގެންވާ ރަނގަޅު ފެންވަރެއްގައި ނުލިބޭ ކަމުގެ ޝަކުވާކަމަށެވެ. 

ހޯޑެއްދޫއިން ވެސް އެ ޝަކުވާ ރައްޔިތުންގެ ފަރާތުން އައިސްފައިވާ ކަމަށާއި، ހޯޑެއްދޫ ސިއްހީ މަރުކަޒަކީ 24 ގަޑިއިރު ޚިދުމަތް ދެވޭނެ ތަނަކަށް ހައްދަވާދެއްވާނެ ކަމަށް ޑރ މުއިއްޒު ވިދާޅުވި އެވެ. އޭގެ އިތުރުން އެރަށުގެ ލެބޯޓްރީގެ ޚިދުމަތްތައް ވެސް ފުޅާކުރާނެކަމަށް ވިދާޅުވި އެވެ. 

ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ސިއްޙީ ސިޔާސަތުގެ ދަށުން ކޮންމެ ރަށެއްގައި ވެސް އާބާދީއާއި އެކަށޭނަ ސިއްޙީ ޚިދުމަތްތައް ލިބޭނެ އިންތިޒާމުތައް ހަމަޖައްސައިދީ ސިއްޙީ މަރުކަޒުތަކާއި ހޮސްޕިޓަލުތައް އަޕްގްރޭޑް ކުރައްވާނެ ކަމަށެވެ. އަދި އެއީ ޚާއްސަ އިސްކަމެއް ދީގެން ކުރައްވާނެ ކަމެއްގެ ގޮތުގައި ފާހަގަކުރެއްވި އެވެ.

އޭގެ އިތުރުން ޑރ މުއިއްޒު ވިދާޅުވީ ތައުލީމީ ދާއިރާއެކޭ އެއްގޮތަށް ތައުލީމީ ދާއިރާއަކީ ވެސް މި ފަސް އަހަރު ވަރަށް ބޮޑަށް އަޅާނުލާ ދޫކޮށްލާފައިވާ ދާއިރާއެއްގެ ގޮތުގައި ފާހަގަކުރެވޭ ކަމަށެވެ. 

ޑރ މުއިއްޒު ހޯޑެއްދޫ ޖަލްސާގައި ވާހަކަދައްކަވަނީ

ޑރ މުއިއްޒު ވިދާޅުވީ ހޯޑެއްދޫއިން ވެސް އެ ޝަކުވާ އައިސްފައި ވުމާއެކު، އެ ރަށު ސުކޫލުގައި ޖާގަ އިތުރުކުރެވޭނެ މިންވަރު ބެލުމަށްފަހު، އެ މައްސަލަ ޙައްލުކޮށްދެއްވާނެ ކަމަށެވެ. އަދި ކްލާސް ރޫމު އިތުރުކޮށް މަލްޓިޕާޕަސް ހޯލެއް އަޅުއްވާދެއްވާނެކަމުގެ ޔަގީންކަން ވެސް ޑރ މުއިއްޒު ދެއްވި އެވެ. 

ޑރ މުއިއްޒު ވިދާޅުވީ ރަށްތަކަށް ބޭނުން ޖެހިފައިވާ ކަންކަން ކޮށްދެއްވާނެކަމަށް ވައުދުވެވަޑައިގަންނަވަނީ ފަހަރެއްގައި ވެސް ރައްޔިތުން ހިތް ރުއްސާލަން ނޫން ކަމަށެވެ. ނޫނީ ހަމައެކަނި ވޯޓު ހޯއްދެވުމުގެ ބޭނުމުގައި އެކަނި ނޫން ކަމަށެވެ. 

ރަށްތަކަށް ކުރައްވާ ދަތުރުފުޅުގައި ރައްޔިތުންގެ ފަރާތުން ހުށައަޅަމުންދަނީ ވަރަށް އަސާސީ ކަންކަން ކޮށްދިނުމަށްކަން ފާހަގަކުރައްވާ ޑރ މުއިއްޒު ވިދާޅުވީ ވެރިކަމުގެ 5 އަހަރު ދުވަސް ތެރޭ އެ ކަންކަން ކޮށްދެވޭނެ ކަމުގެ ފުރިހަމަ ޔަގީންކަން އޮތް ކަމަށެވެ. އަދި އެމަނިކުފާނަށް ފުރުސަތު ލިބިވަޑައިގެންފި ނަމަ ރައީސް ޔާމީނުގެ ތަރައްގީ އަނބުރާ އިޔާދަކޮށްދެއްވާނެ ކަމަށް ޑރ މުއިއްޒު ވިދާޅުވި އެވެ.