ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ވެރިކަން އަލުން އަނބުރާ އިޔާދަކުރުމުގެ ޖޯޝު ރައްޔިތުންގެ ތެރޭގައި އިތުރުވެފައިވާކަމަށް އެ ޕާޓީގެ އެޑްވައިޒަރު އަދި ކުރީގެ އިސްލާމިކް މިނިސްޓަރު ޑރ މުޙައްމަދު ޝަހީމު އަލީ ސައީދު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ ޕީޕީއެމް-ޕީއެންސީ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ގދ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅު ހޯޑެއްދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. 

ގދ އަތޮޅުގެ ރަށްތަކަށް ޑރ މުއިއްޒާއި އެމަނިކުފާނުގެ ކެމްޕޭނު ޓީމު ވަޑައިގަތުމުން ސަޕޯޓަރުން ވަނީ ހޫނު މަރުހަބާއެއް ކިޔާފަ އެވެ. އަދި އެމަނިކުފާނުގެ އިސްތިގުބާލަށް ގިނަ ބަޔަކު ނިކުތް މަންޒަރުވެސް ފެނިގެން ދިޔައެވެ.

ގދ އަތޮޅުން ފެނުނު ތާއީދަށް އިޝާރާތްކުރައްވާ ޑރ ޝަހީމު ވިދާޅުވީ 2018 ވަނަ އަހަރުގެ ރިޔާސީ އިންތިޚާބުގެ ކެމްޕޭނަށް އެ ރަށްތަކަށް ޕީޕީއެމްގެ ޓީމު ވަޑައިގަތުމުން ކީ މަރުހަބާއަށް ވުރެ މާ ހޫނު މަރުހަބާއެއް މިއަދު ކިޔާފައިވާ ކަމަށެވެ. 

އެކަމުން ފެނިގެންދަނީ ޕީޕީއެމްގެ ވެރިކަން އިޔާދަކުރަން ރައްޔިތުން ބޭނުންވެފައި ތިބި މަންޒަރު ކަމަށާއި، އެ ރޫހާއި ޖޯޝު ރައްޔިތުންގެ ތެރޭގައި އިތުރުވަމުން އަންނަ މަންޒަރުކަމަށް ޑރ ޝަހީމު ވިދާޅުވި އެވެ. 

ޑރ ޝަހީމު ވިދާޅުވީ އެ ޖޯޝު އިތުރުވުމުގެ މާނައަކީ ރައްޔިތުން ޕީޕީއެމްގެ ވެރިކަން ބަލައިގެންފައިވާކަން ކަމަށެވެ. 

އެގޮތުން އޭރު ރައީސް ޔާމިނު ހައްޔަރުކުރަން ގޮވާލި މީހުން މިހާރު އެމަނިކުފާނު މިނިވަންކުރުމަށް ގޮވަމުންދާކަމަށް ޑރ ޝަހީމު ވިދާޅުވި އެވެ. އަދި މިހާރު ރައީސް ޔާމިނު ކުރެއްވި ފަދަ ވެރިކަމެއް އަނބުރާ ގެނައުމަށް އޭރު ރައީސް ޔާމިނުގެ ވެރިކަމަށް ފާޑުކީ ފަރާތްތައް ގޮވަމުންދާކަން ވެސް ޑރ ޝަހީމު ފާހަގަކުރެއްވި އެވެ. 

ޑރ ޝަހީމު ވިދާޅުވީ ރައީސް ޔާމިނުގެ ވެރިކަން ބަދަލުކުރުމަކީ ހެދުނު ގޯހެއްކަމަށް މިއަދު ގިނަ ރައްޔިތުން ގަބޫލުކުރައްވާ ކަމަށެވެ. އަދި އެ ވެރިކަން އިޔާދަކުރަން ގިނަ ބަޔަކު ނިކުމެ މަސައްކަތް ކުރަމުންދަނީ އެ ގޯސް ރަނގަޅުކޮށް ގައުމުގެ މިސްރާބު ރަނގަޅު ދިމާލަކަށް ބަދަލުކޮށް، ރައްޔިތުންނަށް ލިބެމުންދިޔަ ތަރައްގީ އިޔާދަކުރުމަށް ކަމަށް ޑރ ޝަހީމު ވިދާޅުވި އެވެ. 

އެއާއެކު އެމަނިކުފާނު ވަނީ އެފަދައިން މަސައްކަތްޕުޅު ކުރައްވާ ރައްޔިތުންނަށް ހިތްވަރުދެއްވާ ސާބަސް ދެއްވާފައެވެ. އަދި ކުރިއަށް މިއޮތް ދުވަސްތަކުގައި ކެމްޕޭނު ހަރަކާތްތައް ވަރުގަދަކޮށް، އެއްބުރުން މި އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ހޮއްވަވާދެއްވުމަށް ޑރ ޝަހީމު ވަނީ ރައްޔިތުންގެ ކިބައިން އެދިވަޑައިގެންފަ އެވެ.