ޕްރޮގްރެސިވް ކޮންގްރެސް ކޯލިޝަންގެ ސަރުކާރެއްގައި ގެމަނަފުށީގައި ތަރައްގީގެ ގިނަ މަޝްރޫއުތަކެއް ހިންގުމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވައުދުވެވަޑައިގެންފި އެވެ.

އެމަނިކުފާނު ގއ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި ގއ ގެމަނަފުއްޓަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ވަނީ ގެމަނަފުއްޓަށް ކޮށްދެއްވާނެ ކަންކަމަށް އަލިއަޅުވާލައްވާފަ އެވެ.

ގެނަމަފުށީގެ ބަނދަރު ބޮޑުކުރުމާއި، ބިން ހިއްކުމާއި، އަދި ނެޝަނަލް ހައުސިން ޕޮލިސީގެ ދަށުން އެ ރަށުގައި ގެދޮރުވެރިކަމުގެ މަޝްރޫއެއް ހިންގުމުގެ އިތުރުން، މަސްވެރިކަމަށް ޚާއްސަ މަޝްރޫއުތަކެއް ގެމަނަފުށީގައި ހިންގަވާދެއްވާނެ ކަމަށް ޑރ މުއިއްޒު ވިދާޅުވި އެވެ. 

އޭގެ އިތުރުން ގެމަނަފުށީ ކައިރީގައި އޮންނަ މާހިރާ ރިސޯޓެއްގެ ގޮތުގައި ތަރައްގީކުރުމަށް އިންވެސްޓަރުންނަށް ހުޅުވާލުމުގެ އިތުރުން، ބޭންކު ބުރާންޗެއް ގެމަނަފުށީގައި ގާއިމުކޮށް، ސުކޫލުގައި މަލްޓި ޕާޕަސް ހޯލެއް އަޅުއްވާދެއްވާނެކަމަށް ޑރ މުއިއްޒު ވިދާޅުވި އެވެ. 

ހަމައެއާއެކު ސިއްހީ ޚިދުމަތްތައް ފުޅާކުރުމަށް އެކްސްރޭގެ ޚިދުމަތް ފޯރުކޮށްދެެއްވާނެކަމަށް ޑރ މުއިއްޒު ވިދާޅުވި އެވެ. 

ގެނެމަފުށީގެ އިތުރުން ކޮނޑޭގެ ރައްޔިތުން ބޭނުންވާ ގޮތަށް ބަނދަރު ބޮޑުކުރުމާއި ދަނޑުވެރިކަމާއި ގުޅުންހުރި މަސައްކަތްތައް ކުރުމަށް އެ ރަށުގައި މަޝްރޫއުތައް ހިންގަވާދެއްވާނެ ކަމުގެ ޔަގީންކަން ވެސް ޑރ މުއިއްޒު ދެއްވިއެވެ. 

އެކަންކަން ހިއްސާކުރައްވާ ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަނުން އުފައްދާނީ ރައްޔިތުން ބޭނުންވާ ކަންކަމަށް އިޖާބަދޭ ސަރުކާރެއް ކަމަށެވެ.

ތަރައްގީގެ މަޝްރޫއުތައް ހިންގާނީ ރައްޔިތުން އެދޭގޮތަށް ކަމަށާއި، އަދި ތަރައްގީގެ މަޝްރޫއުތައް ހިންގުމުގައި ތަފާތު ނުކުރައްވާނެ ކަމުގެ ޔަގީންކަން ވެސް ދެއްވާކަމަށް ޑރ މުއިއްޒު ވިދާޅުވި އެވެ.