ރައީސުލްޖުމްހޫރިއްޔާ ކަމުގެ މަގާމަށް އަންނަ މީހެއްގެ ކިބާގައި މުހިންމު ތިން ސިފައެއް ހުންނަންޖެހޭ ކަމަށާ، އެ ހުރިހާ ސިފައެއްވެސް ގާސިމްގެ ކިބާގައި ހުންނެވި ކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެއެވެ.
ރިޔާސީ ކެންޕެއިނަށް ޖުމްހޫރީ ޕާޓީން އަރިއަތޮޅަށް ކުރައްވަމުންދާ ދަތުރުފުޅުގައި އއ. ބޮޑުފޮޅުދޫގެ ރައްޔިތުންނާ މުހާތަބް ކުރައްވާ ވާހަކަ ދައްކަވަމުން ޑރ މުޙައްމަދު ވަހީދު ވިދާޅުވީ އެމަނިކުފާނުވެސް ރައީސުލްޖުމްހޫރިއްޔާ ކަމުގެ މަގާމުގައި ގާތްގަނޑަކަށް 2 އަހަރު ދުވަހު ހުންނެވި ކަމަށާ، އެއީ ވަރަށް ދަތި ދުވަސްތަކެއް ކަމަށެވެ. އަދި އެމަގާމުގެ މަސްއޫލިއްޔަތަކީ ކޮންމެ ކޮންމެ މީހަކަށް އަދާކުރެވޭނެ ކަމެއް ނޫން ކަން ފާހަގަކުރައްވައި ރައީސް ވަހީދު ވަނީ ވެރިއެއްގެ ކިބާގައި ހުންނަންޖެހޭ މުހިންމު ތިން ސިފައެއް ވިދާޅުދެއްވާފައެވެ.
"އޭގެ ތެރެއިން އެންމެ މުހިންމު އެއް ކަމަކީ އަމާނާތްތެރިކަން. ރައްޔިތުންގެ މުދަލަށް، ރައްޔިތުންގެ ފައިސާއަށް އަމާނާތްތެރިވާނެ މީހަކު. ހިޔާނާތްތެތި ނުވާނެ މީހަކު."
ޑރ. މުހައްމަދު ވަހީދު
ރައީސް ވަހީދު ވިދާޅުވީ، މިހާރު ފެންނަމުންދާ މަންޒަރަކީ ވެރިން، ރައްޔިތުންގެ ފައިސާގައި ޖެހި، އެ ފައިސާ އެމީހެއްގެ ގާތް ތިމާގެ މީހުންނާ، އެ ނޫން މީހުންނަށް، މިލިއަނުން ބިލިއަނުން ބަހަމުންދާ ކަމަށެވެ. އެހެންކަމުން، ރައްޔިތުންގެ ފައިސާއަށް ޚިޔާނާތްތެރި ނުވާނެ މީހަކު ޚިޔާރު ކުރަން ޖެހޭކަން ފާހަގަކުރައްވަމުން ރައީސް ވަހީދު ވަނީ އެ ސިފަ ގާސިމްގެ ކިބާގައި ހުރިކަމަށް ވިދާޅުވެފައެވެ.
ދާދިފަހުން ނެރުނު ރިޕޯޓެއްގައި، ޖަޕާނުން ނެރުނު ރިޕޯޓެއްގައި، ވަރަށް މުއުތަބަރު ފަރާތަކުން މި ބުނަނީ، ދަރަނި ދަންތުރައިގެ ލިސްޓުގައި ހިމެނޭ ގައުމު ތަކުގެ ތެރޭގައި ދިވެހި ރާއްޖެވެސް ހިމެނެއޭ. މިއީ އަޅުގަނޑު ދައްކާ ވާހަކައެއްނޫން. މިއީ ދުނިޔޭގެ މުއުތަބަރު ފަރާތްތަކުން މިބުނަނީ ދިވެހިރާއްޖެވެސް އެ ލިސްޓުގައި ހިމެނެއޭ.
ޑރ. މުހައްމަދު ވަހީދު
ރައީސް ވަހީދު ވިދާޅުވީ، ދަރަނި ދަންތުރާގައި ޖެހިދާނެ ކަމަށް ބެލެވޭ ގައުމު ތަކުގެ ތެރޭގައި ރާއްޖެ ހިމެނޭ އިރު، އެކަމުން ސަލާމަތް ކޮށްދެވޭނެ މީހެއް ވެރިކަމަށް ގެންނަން ޖެހޭ ކަމަށެވެ. އަދި އެ ގާބިލުކަން ހުރީ ގާސިމް ގެ ކަމަށްވެސް އެމަނިކުފާނު ވިދާޅުވި އެވެ.
ބޮޑުފޮޅުދޫ ބައްދަލުވުނުގެ ތެރެއިން
ރައީސުލް ޖުމްހޫރިއްޔާގެ މަގާމަށް އަންނަ މީހެއްގެ ގައިގައި ހުންނަންޖެހޭ މުހިންމު ތިން ސިފައެއް ހިމެނޭ ކަމަށާއި އެއީ އަމާނާތްތެރިވުމާއި، ވެރިކަންކުރުމުގެ ގާބިލްކަން ހުރުމާއި، ރައްޔިތުންނަށް ޚިދްމަތްކުރުމުގެ ރަގަޅު ރެކޯޑެއް ކަމަށެވެ.
މިއާއެކު ރައީސް ވަހީދު ވަނީ ރައީސުލްޖުމްހޫރިއްޔާ ކަމަށް އަންނަ މީހަކީ ހިތްހެޔޮ، މާޒީގައިވެސް ގައުމަށް ޚިދުމަތް ކޮށްދީފައިވާ މީހަކަށް ވާންޖެހޭ ކަމަށާ، ގާސިމްގެ ކިބާގައި އެ ސިފަ ވެސް ހުންނެވި ކަމަށެވެ.
ވަހީދު ވިދާޅުވީ ރައްޔިތުންގެ ފައިސާގައި ނުޖެހި ހުރުމާއި، ގައުމަށް ކުރިމަތިވެފައިވާ މުހިންމު މައްސަލަތައްހައްލުކުރުމުގެ ގާބިލްކަމާއި ތަޖްރިބާ ހުރުމާއި، އަމިއްލަ އާމްދަނީ އިން ރައްޔިތުންނަށް ހިދްމަތްކޮށް އެކަމުގައި ދެމިހުރުމަކީ، ރައީސް ކަމަށް، އެންމެ ގާބިލް މީހަކީ ގާސިމްކަން ކަށަވަރުކޮށްދޭ ކަންކަން ކަމަށެވެ.
Advertisement
This content is created and paid for by advertisers and does not involve Voice Journalists
