ސެޕްޓެމްބަރ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބު ކާމިޔާބު ކުރައްވާނީ ބޮޑު ތަފާތަކުން އެއްބުރުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ތ.އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅު މަޑިފުއްޓަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ދެއްކެވި ވާހަކަ ފުޅުގައެވެ.

ރައީސް ވިދާޅުވީ 2018 ވަނަ އަހަރު ރިޔާސީ އިންތިޚާބަށް ކުރިމަތިލެއްވީ ވަރަށް ބޮޑެތި ގޮންޖެހުން ތަކަކާއި އެކުގައި ކަމަށެވެ. އޭރުއޮތް ސަރުކާރުގެ ކަންކަން ހުރިގޮތުން ރައްޔިތުންގެ ހިތުގައި އެތައް ކަންބޮޑުވުންތަކަކާއި ބިރުވެރިކަމެއް އޮތް ކަމަށް ރައީސް ވިދާޅުވިއެވެ.

Advertisement

އަދި އަނިޔާވެރިކަން އޭރު އޮތީ އިންތިހާއަށް ގޮސްފައި ކަމަށާއި، ސަރުކާރާއި ޚިޔާލު ތަފާތުވެ ބަސްބުނާމީހުންނާއި ދެކޮޅަށް އައީ ފިޔަވަޅުތައް އަޅަމުންކަމަށެވެ.

ރައީސް ވިދާޅުވީ އެދަތިތަކާއި އެކުވެސް ދިވެހިން ނުކުތީ އެކަން ބަދަލުކުރަން ކަމަށާއި، ގާތްގަނޑަކަށް މުޅި ރާއްޖެ ނުކުމެ ބޮޑު ތަފާތަކުން އެދުވަހު ވަނީ އެކަން ބަދަލުކޮށްފައި ކަމަށެވެ.

މީގެ އިތުރުން ރައީސް ވިދާޅުވީ އޭރު ރައްޔިތުން ބޭނުންވީ އެއަނިޔާވެރިކަމާއި އެބިރުވެރިކަން މާޒީގެ ތެރެއަށް ދޫކޮށްލަން ކަމަށާއި، އޭރު ރައްޔިތުން ނިންމެވި ނިންމެވުމާއި އެކު މަސައްކަތް ފަށައިގަތް ކަމަށެވެ. މީގެކުރިން ފާއިތުވި އަހަރުތަކާއި މި ފަސްއަހަރާއި އަޅައި ބަލާއިރު ރާއްޖޭގައި ހަމަޖެހުން ޤާއިމް ކުރެވިއްޖެ ކަމަށާއި ސުލްޙަ ޤާއިމް ކުރެވިއްޖެ ކަމަށް ރައީސް ވިދާޅުވިއެވެ.

ރައީސް ވިދާޅުވީ ކުރިއަށް އޮތް ތަނުގައިވެސް ކަންކުރަމުން ގެންދާނީ އެގޮތައް ކަމަށެވެ. ރައީސް ވިދާޅުވީ މިއަދު މިފެންނަ ތަރައްޤީ ގެނެވުނީ އެގޮތައް ފުރުސަތު ދީގެން ކުރިއަށް ދިއުމުން ކަމަށެވެ.

ރައީސް ވިދާޅުވީ ކޮވިޑްއާއި ގުޅިގެން ޕްރޮޖެކްޓްތަކަށް ލަސްކަމެއް އައި ނަމަވެސް ވެވަޑައިގެން ވަޢުދުތަކުގެ 90 ޕަސެންޓް ވަނީ ފުރިހަމަވެފައި ކަމަށެވެ. އަދި އެއީ ރަނގަޅު "އެޗީވްމެންޓެއް" ކަމަށް އެމަނިކުފާނު ޤަބޫލުކުރައްވާ ކަމަށް ވިދާޅުވިއެވެ.

 ދެން ކުރިއަށް އޮތީ އޭރު ފެށި މަސައްކަތްތައް މުޅިން ނިންމާލުން ކަމަށާއި، އަދި އެއާއި އެކު އުފާވެރި އަމާން ރާއްޖެއެއް ހޯދުމަށްޓަކައި ދެން ކުރަންޖެހޭ މަސައްކަތްތައް ކުރުންކަމަށް ރައީސް ވިދާޅުވިއެވެ.

ރައީސް ވިދާޅުވީ އެކަންކަން ކުރެވޭނީ ކުރިއަށް އޮތް ދައުރުގައިވެސް މިސަރުކާރަށް ފުރުސަތު ދެވިގެން ކަމަށާއި، އެހެން ނޫންނަމަ އަނެއްކާވެސް ވަރަށް ބޮޑުތަނުން  މިޤައުމު ފަހަތަށް ހިނގައިދާނެ ކަމަށެވެ.

ރައީސް ވިދާޅުވީ އިރާދަކުރެއްވިޔާ މި އިންތިޚާބު ކާމިޔާބު ކުރައްވާނީ ބޮޑު ތަފާތަކުން އެއްބުރުން ކަމަށެވެ.

ރައީސްގެ ތ.އަތޮޅު ދަތުރުފުޅުގައި އެންމެ ފަހުން ވަޑައިގަތީ ތ.މަޑިފުއްޓަށެވެ. އަދި މިހާރު ވަނީ ލ.އަތޮޅަށް ދަތުރުފުޅު ފައްޓަވައިފައެވެ.