2004 ވަނަ އަހަރު ރާއްޖެއަށް ކުރިމަތިވި ސުނާމީ ކާރިސާގެ ސަބަބުން ގެދޮރު ގެއްލި ހާލުގައި ޖެހުނު މީހުންގެ މައްސަލަތަކަށް ދާއިމީ ޙައްލެއް ހޯއްދަވާދެއްވީ ކުރީގެ ރައީސް  ޔާމީން އަބްދުލްގައްޔޫމުގެ ޒައާމަތުގައި ކަމަށާއި، އެ ވެރިކަމުގައި އެކަން ކޮށްދެއްވީ އެންމެ 100 ދުވަސްތެރޭގައި ކަމަށް ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމު އަލީ ސައީދު ވިދާޅުވެއްޖެ އެވެ. 

ޑރ ޝަހީމު މިފަދައިން ވިދާޅުވެފައިވަނީ ގއ ވިލިގިލީގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުގެ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ޑރ ޝަހީމު ވިދާޅުވީ ގއ އަތޮޅަކީ ސުނާމީގެ އަސަރު ވަރަށް ބޮޑަށް ކުރި އަތޮޅެއްކަމަށެވެ. އަދި އެ ކާރިސާއަށްފަހު ހާލުގައި ޖެހުނު މީހުންތަކެއް އުޅެމުން އައިސްފައިވާ އަތޮޅެއްކަމަށެވެ. ރައީސް ޔާމީން ވެރިކަމާއި ހަވާލުވެވަޑައިގަތީ ސުނާމީ ކާރިސާއަށް 10 އަހަރަށް އޮއްވައެވެ. އޭރު ވެސް ދާއިމީ ބޯހިޔާވަހިކަން ނުލިބޭ ފަރާތްތައް ރާއްޖޭގެ އެކި ކަންކޮޅުތަކުގައި އުޅެމުން ދިޔަކަން ޑރ ޝަހީމު ފާހަގަކުރެއްވި އެވެ. 

އެއާއެކު އެމަނިކުފާނު ވިދާޅުވީ ރައީސް ޔާމިނުގެ ވެރިކަމުގައި ސުނާމީގައި ހާލުގައި ޖެހި، ގެދޮރުގެ ދަތިކަން ދިމާވެފައިވާ ފަރާތްތައް ބަލައި، އެ މައްސަލަ 100 ދުވަސްތެރޭ ޙައްލުކުރުމަށް، އެމަނިކުފާނުގެ ސަރުކާރުގެ ހައުސިން މިނިސްޓަރު ޑރ މުހައްމަދު މުއިއްޒަށް އެންގެވިކަމަށެވެ. 

އެއާއެކު ރައީސް ދެއްވި އެ މުއްދަތުގެ ތެރޭގައި އެ މައްސަލަ ޙައްލުކޮށް ސުނާމީގައި ހާލުގައި ޖެހި ރައީސް ޔާމިނުގެ ވެރިކަމާއި ހަމަޔަށް އައިރު ގެދޮރަށް ބޭނުންވެފައި ތިބި ހުރިހާ ފަރާތްތަކަށް އެންމެ 100 ދުވަސްތެރޭ ބޯހިޔާވަހިކަން ފޯރުކޮށްދީ އެ މައްސަލައަށް ދާއިމީ ޙައްލު ހޯއްދަވާދެއްވިކަމަށް ޑރ ޝަހީމު ވިދާޅުވި އެވެ. އަދި އެކަން ކުރެއްވީ ރައީސް ޔާމިނުގެ އެންގެވުމަށް ހައުސިން މިނިސްޓަރުގެ މަގާމުގައި ހުންނަވާ ޑރ މުއިއްޒުކަން ޑރ ޝަހީމު ފާހަގަކުރެއްވި އެވެ. 

ޑރ މުހައްމަދު ޝަހީމު އަލީ ސައީދު 

ޑރ ޝަހީމު ވިދާޅުވީ ސުނާމީ ކާރިސާގައި ގެދޮރުގެ ދަތިކަން ދިމާވެފައިވާ ފަރާތްތަކަށް ރައީސް ޔާމިނުގެ ޒައާމަތުގައި، ޑރ މުއިއްޒު ހައުސިން މިނިސްޓަރަކަށް ހުންނަވައިގެން ޙައްލު ހޯއްދަވާދެއްވި ގޮތުގެ މިސާލު ނެންގެވީ މާޒީގައި ހިނގާފައިވާ ކަންކަމުގެ ވާހަކަތައް ތިލަކުރުމުގެ މަގްސަދުގައި ނޫން ކަމަށެވެ. 

އެހެން ނަމަވެސް އެއީ އިބުރަތް ހާސިލްކުރަން ޖެހޭފަދަ ވާހަކަތަކެއްކަމަށް ޑރ ޝަހީމު ވިދާޅުވި އެވެ. 

ރައީސް ޔާމިނުގެ ޒައާމަތުގައި ރައްޔިތުންނަށް ގިނަ ޚިދުމަތްތަކެއް ފޯރުކޮށްދެވުނީ ތައުލީމީ ކެބިނެޓަކާއި އެކު، ކަންކަން ކުރައްވާނެ ގޮތް ރަނގަޅަށް އެނގިވަޑައިގެން ތިއްބަވާ ސަރުކާރު ހިންގެވުމުގެ މަސައްކަތް ކުރެއްވުމުންކަމަށް ޑރ ޝަހީމު ވިދާޅުވި އެވެ. 

އެހެން ކަމުން އަލުން އަނބުރާ އެފަދަ ޒައާމަތެއް އިޔާދަކުރުމަށް ރައްޔިތުން ބުރަކޮށް މަސައްކަތްޕުޅު ކުރެއްވުމަށް ޑރ ޝަހީމު ވަނީ އެދިވަޑައިގެންފަ އެވެ.