ޕްރޮގްރެސިވް ކޮންގްރެސް ކޯލިޝަން (ޕީޕީއެމް-ޕީއެންސީ ކޯލިޝަން) ގެ ވެރިކަމެއް ހިނގާނީ ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމުގެ ލަފާފުޅާއި އިރުޝާދާއި އެއްގޮތަށްކަމަށް، އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައި ވަނީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ވެރިކަމެއްގައި ރައީސް ޔާމީން އެކަހެރިކުރައްވާނެ ކަމަށް، ބައެއް ފަރާތްތަކުން ދައްކަވަމުން ގެންދަވާ ވާހަކަތަކަށް ވިލިގިލީގައި ބޭއްވި ޑރ މުއިއްޒުގެ ކެމްޕޭނު ޖަލްސާގައި ރައްދުދެއްވާ ވާހަކަފުޅުދައްކަވަމުން ނެވެ. 

އެގޮތުން އަބްދުއްރަހީމް ވިދާޅުވީ އެ މޭރުމުން ބައެއް ބޭފުޅުން ވާހަކަދައްކަވަމުން ދަނީ ރައީސް ޔާމިނާއި ޑރ މުއިއްޒާއި ޖައްސާ، އެ ދެބޭފުޅުންގެ ގުޅުމަށް ބުރުއެރުވުމުގެ ނިޔަތުގައި ކަމަށެވެ. 

އެހެން ނަމަވެސް އެއީ އެ ފަރާތްތަކުން ކުރައްވާނެ ވަރަށް ބޭކާރު މަސައްކަތްޕުޅެއް ކަމަށާއި، ޑރ މުއިއްޒާއި ރައީސް ޔާމިނާއި ދެބޭފުޅުން ސިޔާސީގޮތުން ޖެއްސުމަކީ ކުރެވޭނެ ކަމެއް ނޫންކަމަށް އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވީ ރައީސް ޔާމިނަކީ ކޮން ބޭފުޅެއް ކަމަށާއި، އެމަނިކުފާނުގެ ޚިދުމަތަށް މި ގައުމު ބޭނުންވެފައިވާ މިންވަރު ޑރ މުއިއްޒަށް ވަރަށް ރަނގަޅަށް ވިސްނިވަޑައިގަންނަވާ ކަމަށެވެ.

ރައްޔިތުންނާއި މުޚާތަބުކުރައްވާ ވާހަކަދައްކަވާ ކޮންމެ ފަހަރަކު ރައީސް ޔާމީނުގެ ޚިދުމަތުގެ ހަނދާންތައް އާކުރައްވާ، އެމަނިކުފާނު މިނިވަންކުރާނެކަމުގެ ޔަގީންކަން ރައްޔިތުންނަށް ޑރ މުއިއްޒު ދެއްވަނީ ރައީސް ޔާމިނުގެ މުހިންމުކަން އެނގިވަޑައިގަންނަވާތީ ކަމަށް އޭނާ ވިދާޅުވި އެވެ. 

އެ ވާހަކައާއި ގުޅުވާ އަބްދުއްރަހީމް ވިދާޅުވީ ޕީޕީއެމް-ޕީއެންސީގެ ވެރިކަމެއް ހިނގާނީ ރައީސް ޔާމިނުގެ ލަފާފުޅާއި އިރުޝާދާއި އެއްގޮތަށް ކަމަށެވެ. ޑރ މުއިއްޒުގެ ވެރިކަމުގައި ވެސް އެކަން ހިނގާނީ އެ އުސޫލުންކަން އޭނާ ފާހަގަކުރެއްވި އެވެ. 

ގއ ވިލިގިލީގައި ބޭއްވި ޑރ މުއިއްޒުގެ ކެމްޕޭނު ޖަލްސާގެ ތެރެއިން

ރިޔާސީ އިންތިޚާބުގެ ކެމްޕޭނު ކުރައްވާއިރު، ބައެއް ފަރާތްތަކުން ޑރ މުއިއްޒާއި އެމަނިކުފާނުގެ އަނބިކަނބަލުންގެ އަބުރުފުޅަށް ހުތުރުވާގޮތަށް ދައްކަވަމުންދާ ވާހަކަތަކަށް ވެސް އަބްދުއްރަހީމް ވަނީ ރައްދުދެއްވާފަ އެވެ. 

އެގޮތުން އޭނާ ވިދާޅުވީ، އެފަދައިން އެ ވާހަކަތައް ދައްކަވަނީ އިންތިޚާބުން ބަލިވާނެކަން ޔަގީންކުރެވޭތީ ކަމަށެވެ. އެހެން ނޫން ނަމަ، އެހެން ސިޔާސީ ޕޯޑިއަމްތަކުގައި ޑރ މުއިއްޒުގެ ވާހަކަ ދައްކަވަން ޖެހިވަޑައިނުގަތީސްކަމަށް އަބދުއްރަހީމް ވިދާޅުވި އެވެ. 

އޭނާ ވަނީ އިންތިޚާބުގައި ބާކީ މިއޮތް މަދު ދުވަސްކޮޅު ޑރ މުއިއްޒުގެ އަބުރުފުޅު ކަތިލުމަށް ވާހަކަދެއްކެވުމުގެ ބަދަލުގައި، ކެމްޕޭނު ކުރައްވާ ރައްޔިތުންގެ ތާއީދު ހޯއްދެވުމަށް މަސައްކަތްޕުޅު ކުރެއްވުމަށް ސިޔާސީ ޕާޓީތަކަށް ގޮވާލައްވާފަ އެވެ.