މާލޭ ސިޓީގައި ތަރައްޤީވެފައިވާ ސިޓީއެއްގައި ހިމެނޭ ހުރިހާ އަސާސީ ކަންކަމެއް ފުރިހަމަ ކުރެވިއްޖެ ކަމަށް އެންވައިރަމެންޓް މިނިސްޓަރ އައިމިނަތު ޝައުނާ ވިދާޅުވެއްޖެއެވެ.
ޝައުނާ މިހެން ވިދާޅުވީ މާލޭގައި ރޭ ހުޅުވި ވޭސްޓް ޓްރާންސްފާ ސްޓޭޝަން ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ޝައުނާ ވިދާޅުވީ ކުނި މެނޭޖުކުރުމަށް މި ސަރުކާރުން ތިލަފުށީގައި ހިންގަމުން އަންނަ ވޭސްޓް މެނޭޖުމަންޓުގެ ބޮޑު ޕްރޮޖެކްޓަކީ މި ސަރަހައްދުގެ ތިމާވެށި ރައްކާތެރިކުރުމަށް ސަރުކާރަކުން މިހާތަނަށް ކުރަމުން އަންނަ އެންމެ މުހިންމު މަސައްކަތް ކަމަށެވެ. އެ މަސައްކަތުގައި ބޮޑު ކާމިޔާބީއެއް ލިބިއްޖެ ކަމަށް އޭނާ ވިދާޅުވި އެވެ.
"ތިލަފުށީގައި ކުރަމުން އަންނަ މަސައްކަތަކީ އާންމުންނަށް ނުފެނުނު ކަމުގައި ވިޔަސް، އޭގެ ސަބަބުން މާލެ ސަރަހައްދުގެ ތިމާވެށި ރައްކާތެރިކުރުމަށްޓަކައި ސަރުކާރަކުން މިހާތަނަށް ކުރަމުންދާ އެންމެ މުހިންމު އެއް މަސައްކަތް،" މިނިސްޓަރު ވިދާޅުވި އެވެ.
އަދި މާލޭ ވޭސްޓް ޓްރާންސްފާ ސްޓޭޝަނަކީ ސަރުކާރުން މާލެ ސަރަހައްދުގެ ކުނި މެނޭޖުކުރުމަށް ގެނެސްދޭ އެންމެ ޒަމާނީ، ފުރިހަމަ ހައްލުކަން ފާހަގަ ކުރައްވާކަމަށް ޝައުނާ ވިދާޅުވިއެވެ.
މާލޭގައި ކުނި ވަކިކޮށްގެން އުކާލުމަކީ އުނދަގޫ ކަމެއް ކަން ގަބޫލުކުރައްވާ ކަމަށާއި ނަމަވެސް ފަރުދީ ފެންވަރުގައި އާންމުންގެ އެއްބާރުލުން ލިބިއްޖެ ނަމަ، އެކަން ކުރެވޭނެ ކަމުގެ ޔަގީން ކަން އެބައޮތް ކަމަށް ވެސް މިނިސްޓަރު ވިދާޅުވި އެވެ.
"ތަރައްގީވެފައިވާ ސިޓީއެއްގައި ހުންނަން ޖެހޭ މުހިންމު ހުރިހާ ޔުޓިލިޓީ ހިދުމަތެއް މިރޭ މާލެ ސިޓީގައި މި ގާއިމްވެ ނިމުނީ،" މިނިސްޓަރު ވިދާޅުވި އެވެ.
ވޭސްޓް ޓްރާންސްފާ ސްޓޭޝަންގެ ބޭނުމަށް ވެމްކޯ ސައިޓުގައި ވަނީ ދެ އިމާރާތެއް ހަދައިފަ އެވެ. އެއީ ކުނި ޖަމާކުރަން ހެދި ތިން ފްލޯގެ އިމާރާތަކާއި މިނިސްޓްރީގެ ވޭސްޓް ޑިޕާޓްމަންޓާއި ވެމްކޯ އަދި އީޕީއޭ ހިންގަން ހެދި ހަތް ބުރީގެ އޮފީސް އިމާރާތެކެވެ.
Advertisement
This content is created and paid for by advertisers and does not involve Voice Journalists
