ދިވެހި ދައުލަތް މިނިވަން ދައުލަތެއްގެ ގޮތުގައި ބޭއްވުމަށް ރާއްޖޭގެ ރައްޔިތުންނަށް ރާއްޖޭގައި މިނިވަން ކަމާއި ހަމަހަމަކަމާއި އެކު އުޅެވޭނެ ގޮތް ހަދަން ޖެހޭ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ އެމަނިކުފާނު ލ.އަތޮޅަށް ކުރައްވަމުން ގެންދަވާ ކެމްޕޭނު ދަތުރުފުޅުގައި އެއަތޮޅު މުންޑުއަށް ވަޑައިގެން ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.

ރައީސް ޞާލިޙް ވިދާޅުވީ ކޮންމެ ސިޔާސީ ލީޑަރަކުވެސް ދައްކަވަނީ ޤައުމު މިނިވަންކަންމަތީ ދެމެހެއްޓުމުގެ ވާހަކަކަމަށެވެ. އަދި ދިވެހިން ބޭނުންވަނީ ދިވެހިރާއްޖެ އަބަދުވެސް މިނިވަންކަން މަތީ ތާއަބަދަށް ދެމި އޮންނަން ކަމަށާއި، އެކަން ކުރުމަށްޓަކައި ކުރަންޖެހޭ ކަންތައްތަކެއް ހުންނަ ކަމަށެވެ.

Advertisement

އެގޮތުން ފުރަތަމަ ކަމަކަށް ޤައުމެއް ޤައުމެއްގެ ގޮތުގައި އޮންނަނީ ކީއްވެގެންތޯއާއި އެތަނެއްގައި ދިރިއުޅޭ ބަޔަކު އެބައެޅެން ޖެހޭ ކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ އެންމެ އިސް އަމާޒަކީ ރައްޔިތުން ކަމަށާއި ރައްޔިތުންނަށް ޚިދްމަތްކުރުން ކަމަށެވެ. އަދި ރައްޔިތުންނަށް މިނިވަންކަންމަތީގައި އުޅެވޭނެ ގޮތް ހަދައިދިނުން ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ އަމާޒަކީ އެބަޔަކު ދިރިއުޅެން ބޭނުންވާ ރަށެއްގައި މަޖުބޫރު ކަމެއްނެތި، ދައުލަތުން ފޯރުކޮށްދޭން ޖެހޭ ޚިދްމަތްތައް ހަމަހަމަކޮށް އެބަޔަކަށް ފޯރުކޮށްދިނުންކަމަށެވެ.

"އޭރުން ޤައުމެއްވެސް އޮންނާނީ، އޭރުން މިނިވަން ޤައުމެއްވެސް އޮންނާނީ" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ބޭނުންވަނީ ރާއްޖެ މިނިވަން ޤައުމެއްގެ ގޮތުގައި ބާއްވާށޭ، އަޑަށް ބާރުލާފަ ބުނެވިދާނެކަމަށެވެ. ނަމަވެސް އެކަން ކުރެވޭނީ މިދެންނެވި ކަންކަން ކުރެވިގެންކަމަށް ރައީސް ވިދާޅުވިއެވެ. އަދި ހިތުގެ އަޑިން މިކަން ޤަބޫލުކޮށްގެން ކަމަށް ވެސް ރައީސް ވިދާޅުވިއެވެ.

ރައީސް ވިދާޅުވީ ހަމަހަމަކަން ނުހިފެހެއްޓޭނަމަ ދުނިޔޭގެ އެއްވެސް ޤައުމެއް ނޯންނާނެ ކަމަށާއި، ޤައުމުތަކުގައި ދާޚިލީ ހަނގުރާމަތައް ފެށެނީވެސް ރައްޔިތުންގެ މެދުގައި ތަފާފުކުރުންތައް ގެންގުޅޭތީ ކަމަށެވެ.

މުންޑުއަށް ރައީސް ޞާލިޙް ވަޑައިގަތުމުން އެރަށުގެ ގިނަ ބަޔަކުވަނީ އެމަނިކުފާނަށް މަރުޙަބާ ކިޔައިފައެވެ.