ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ރާ ޒޯނުގެ ގްރޫޕް އޭގައި މިއަދު ހަވީރު ކުޅެވުނު ފުރަތަމަ މެޗުގައި ކޯރާ ކޯރާ މޯލްޑިވްސް އާއި އެމެރަލްޑް މޯލްޑިވްސް ވާދަކުރި މެޗު 6-1 ގެ ތަފާތުބޮޑު ނަތީޖާއަކުން ކާމިޔާބުކޮށް އެމެރަލްޑް މޯލްޑިވްސް އިން މުބާރާތުގެ ސެމީފައިނަލްގެ އުންމީދު ދަމަހައްޓައިފި އެވެ.

މުބާރާތުގައި އެމެރަލްޑް މޯލްޑިވްސް އިން ކުޅުނު ފުރަތަމަ މެޗުގައި ޖޯލި މޯލްޑިވްސް އަތުން 7-0 ގެ ތަފާތުބޮޑު ނަތީޖާއަކުން ބަލިވެފައިވާއިރު، މިއީ ކޯރާ ކޯރާ އިން މުބާރާތުގައި ކުޅުނު ފުރަތަމަ މެޗެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އެމެރަލްޑް މޯލްޑިވްސް އިންނެވެ. މިލަނޑު ފުރަތަމަ ހާފުގެ 9 ވަނަ މިނެޓުގައި ކާމިޔާބުކޮށްދިނީ އެޓީމުގެ އިބްރާހިމް އަޒްމޫން އެވެ. އަދި އޭގެ ދެމިނެޓު ފަހުން އެޓީމުގެ އަބްދުﷲ އަލީ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

އެމެރަލްޑް މޯލްޑިވްސްގެ ކެޕްޓަން އަބްދުﷲ މާދިހް (ވ) އަތުން ބޯޅަ ހޯދުމަށް ކޯރާ ކޯރާގެ ކުޅުންތެރިއަކު މަސައްކަތް ކުރަނީ

ނަމަވެސް ފުރަތަމަ ހާފު ނިމުމުގެ ކުރިން ކޯރާ ކޯރާ މޯލްޑިވްސް އިން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ކެޕްޓަން އާދަމް ތައުފީގް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އެމެރަލްޑް މޯލްޑިވްސް ކުރީގައި އޮވެގެންނެވެ.

އެމެރަލްޑް މޯލްޑިވްސް ކެޕްޓަން އަބްދުﷲ މާދިހް ލަނޑުޖެހުމަށް ފަހު އުފާފާޅުކުރަނީ 

މެޗުގެ ދެވަަނަ ހާފުގައި އެމެރަލްޑް މޯލްޑިވްސް އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރި އިރު މި ހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އެގޮތުން މިހާފުގައި އެޓީމުގެ ކެޕްޓަން އަބްދުﷲ މާދިހް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ. އަދި އެޓީމުގެ ފަހު ލަނޑު މެޗު އެންމެ ފަހު މިނެޓްގައި ކާމިޔާބުކޮށްދިނީ އަބްދުﷲ އަލީ އެވެ. މިއާއެކު މެޗުގެ ކުޅުން ނިމިގެންދިޔައީ 6-1 ގެ ނަތީޖާއަކުން އެމެރަލްޑް މޯލްޑިވްސް ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނު އެމެރަލްޑް މޯލްޑިވްސްގެ ކެޕްޓަން އަބްދުﷲ މާދިހް 

މި މެޗުގެ މޭން އޮފް ދަ މެޗަކަށް ހޮވުނީ އެމެރަލްޑް މޯލްޑިވްސްގެ ކެޕްޓަން އަބްދުﷲ މާދިހް އެވެ. އަދި މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން އެޓީމަށް ތިން ޕޮއިންޓް ލިބިފައިވާއިރު، މިގުރޫޕްގެ އެއްވަނައިގައި މިވަގުތު އޮތީ ކުޅުނު ދެ މެޗުން ވެސް މޮޅުވެ ހަ ޕޮއިންޓާއެކު އޮތް ޖޯލި މޯލްޑިވްސް އެވެ. 

ރިސޯޓް ލީގު ފުޓްސަލް މުބާރާތުގެ ރާ ޒޯނުގައި މިއަހަރު 7 ޓީމަކުން ބައިވެރިވެފައިވާއިރު، މި ޒޯނުގެ ހުރިހާ މެޗެއް ވެސް ކުޅުމަށް ހަމަޖެހިފައިވަނީ ޖޯލި މޯލްޑިވްސް ގައެވެ. އަދި މި މުބާރާތް ކުރިއަށް ދަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެންނެވެ.

އެގޮތުން ގްރޫޕް އޭގައި ހަތަރު ޓީމު އަދި ގުރޫޕް ބީގައި ތިން ޓީމު ހިމެނޭއިރު، ގުރޫޕް އޭގެ އެއްވަނަ އަދި ދެވަނަ ޓީމުގެ އިތުރުން ގްރޫޕް ބީގެ އެއްވަނަ ޓީމަށް މުބާރާތުގެ ސެމީފައިނަލްގެ ޖާގައެއް ލިބިގެންދާއިރު، ސެމީ ފައިނަލުގެ ހަތަރުވަނަ ޖާގަ ލިބިގެންދާނީ ގްރޫޕް ބީގެ ދެވަނަ ޓީމާއި ތިންވަނަ ޓީމުގެ މެދުގައި ޕްލޭއޮފް މެޗެއް ކުޅުމަށްފަހު އެމެޗުން މޮޅުވާ ޓީމަކަށެވެ.