ވަކި މީހަކު ނަމާދު ކުރީމާ އެ ކަން ކުރާ މީހާއަށް ފުރައްސާރަ ކޮށްފައި, ތިމާ ތާއީދު ކުރާ މީހާ ނަމާދު ކުރީމާ އެމީހާއަށް ސަނާ ކިޔުމުން އެނގެނީ އެމީހާގެ އަދުލުވެރި ކަމެެއް ނެތްކަން ކަމަށް ދާރިސް ޓީގެ ސްޓޭޝަން މެނޭޖަރ ޢަލީ ރަމީޒު ވިދާޅުވެއްޖެއެވެ. 

ޢަލީ މިއަދު ފޭސްބުކުގައި ކުރެއްވި ޕޯސްޓެއްގައި ވިދާޅުވީ، ވަކި މީހަކު ނަމާދުކުރާ މަންޒަރު ފެނުނީމާ އޭނާ އަށް ފާޑުކިޔައި، ފުރައްސާރަ ކޮށްފައި، ތިމާ ސަޕޯޓުކުރާ މީހާ ނަމާދުކުރާ މަންޒަރު ފެނުނީމާ، މާތް الله އަށް ހަމްދުކޮށް، އޭނާއަށް މަދަހަ ސަނާ ކިޔާ މީހާގެ އެއްވެސް އަދުލުވެރިކަމެއް ނެތް ކަމަށެވެ. އަދި އެފަދަ މީހަކު ދައްކާ އެއްވެސް ވާހަކައެއް ގަބޫލުކުރަން ހެޔޮވެސް ނުވާނެ ކަމަށް އޭނާ ވިދާޅުވި އެވެ. 

ޢަލީ ރަމީޒު މިފަދައިން ވިދާޅުވެފައި މިވަނީ، އިދިކޮޅު ޕީޕިއެމް-ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު އިމާމުވެ ބަޔަކާއިއެކު ނަމާދުކުރައްވާތަން ފެންނަ ފޮޓޯ އެއް ޓުވީޓާގައި ހިއްސާކުރައްވަމުން، އަދާލާތު އިލްމްވެރިންގެ މަޖިލީހުގެ ނާއިބް ރައީސް ޑރ.މުޙައްމަދު އިޔާޒު އާއި އަދިވެސް އެޕާޓީ އަށް ނިސްބަތްވާ ބައެއް އެކްޓިވިސްޓުން މުޢިއްޒަށް ފާޑުކިޔައި ވާހަކަދައްކާފައިވާ ދަނޑިވަޅެއްގަ އެވެ. 

Advertisement

އެގޮތުން، މުޢިއްޒަށް ފާޑުވިދާޅުވެ އިޔާޒު ކުރެއްްވި ޓުވީޓެއްގައި ވިދާޅުވީ، 2023 ސެޕްޓެމްބަރު 9 ވަނަ ދުވަހު އޮންނަ އިންތިޚާބަކީ ދިވެހި ރައްޔިތުން ގޮވައިގެން އިމާމްވެ ނަމާދުކުރާނީ ކާކުތޯ ބަލަން ބާއްވާ އިންތިޚާބެއް ނޫން ކަމަށެވެ. އަދި އެއީ ކުރިޔަށް އޮތް ފަސް އަހަރު ދުވަހު ޤައުމުގެ ހުރިހާކަމެއް ބަލަހައްޓާ ހިންގުމުގެ ހުންގާނު ޙަވާލުކުރާނީ ކާކާތޯ ބަލަން ބާއްވާ އިންތިޚާބެއް ކަމަށް ޑރ.އިޔާޒު ވިދާޅުވިއެވެ.

"ނަމާދުގެ އިމާމްގެ ކިބައިގާ ހުންނަންޖެހޭ ޝަރްޠުތަކަކީ ތަފާތުކަމެއް" އިޔާޒު ވިދާޅުވި އެވެ. 

މީގެ އިތުރުން އިޔާޒު ކުރެއްވި އެހެން ޓުވީޓެއްގައިވެސް އެކަމަށް ފާޑުވިދާޅުވަމުން، އިމާމްވެ ނަމާދު ކުރަން ޖެހޭނީ އެޖަމާޢަތަކަށް ޙާޟިރުވެހުރި އެންމެ ބޮޑަށް ޤުރްއާން ހިތުދަސް، އަދި ނަމާދުގެ ފިޤްހީ މައްސަލަތައް އެންމެ ބޮޑަށް ދަންނަމީހަކު ކަމަށް ވަނީ ވިދާޅުވެފަ އެވެ. އަދި އެއީ ފޮޓޯ ނަގަން ކުރަންޖެހޭ ކަމެއް ނޫން ކަމަށްވެސް ވިދާޅުވި އެވެ. 

އިޔާޒުގެ މިފަދައިން ވިދާޅުވެފައި ވާއިރު، އޭނާ އާއި އަދާލަތު ޕާޓީއަށް ނިސްބަތްވާ ދީނީ އިލްމުވެރިންގެ ނަމުގައި ތިބި ސިޔާސީ އެކްޓިވިސްޓުންނަކީ މި ސަރުކާރު ގެނައުމަށާ، ދެމެހެއްޓުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ސަނާ ކިޔުމާއި، ތައުރީފް ކުރުމުގައި އަބަދުހެން އުޅުއްވާ ބޭފުޅުން ކަން ފާހަގަކޮށްލަންޖެހެއެވެ. ނަމަވެސް މިސަރުކާރު އައި ފަހުން ފާހިޝް ކަންކަން އިންތިހާއަށް އިތުރުވެ، އެޑިޔުކޭޝަން ސިސްޓަމްގެ ތެރެއިން ދަރިވަރުން ދުރުހެލިކުރުވުމަށް ކުރާ ކަންކަމާއި ދެކޮޅަށް އެފަދައިން އަޑު އުފުލާފައި ނުވާކަންވެސް ފާހަގަކޮށްލަން ޖެހެއެވެ.