އެމްޑީޕީ އިން ވަކިވެގެން ދިޔަ އެއްވެސް މެމްބަރަކު އަނބުރާ ޕާޓީއަށް ގެނައުމަށް އެއްވެސް ބާވަތެއްގެ ރިޝްވަތެއް ނުދެއްވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ހައްދުން މައްޗަށް ކުރެއްވެވި ކެމްޕޭނު ދަތުރުފުޅު ނިންމާލައްވައި ނޫސްވެރިންނާއި ބައްދަލު ކުރައްވައި ވާހަކަދައްކަވަމުން ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުންނެވެ.

ރައީސް ވިދާޅުވީ އެފަދަ އެއްވެސް ކަމެއް ހިނގައިފައިނުވާ ކަމަށެވެ.

Advertisement

"އަޅުގަނޑުމެން ހަމަގައިމުވެސް އެއްވެސް މިންވަރަކަށް އެއްވެސް ކަހަލަ ފައިސާގެ މުޢާމަލާތެއް އަދި ރިޝްވަތެއް ތި ވިދާޅުވާ ފުޅާ މާނައިގައި ހިމެނޭ އެއްވެސް ކަމެއް ކޮށްފައެއް ނޯންނާނެ" ރައީސް ވިދާޅުވިއެވެ.

ރައީސް ވިދާޅުވީ އެމްޑީޕީ ދޫކުރައްވައި ދިޔުމަށްފަހު އެނބުރި އެމްޑީޕީއާއި ގުޅިވަޑައިގަތް ފަރާތަކުން އެމްޑީޕީ އާއި ގުޅިވަޑައިގަތީ އެބޭފުޅެއްގެ ދާއިރާގެ ތަރައްޤީ އޮތީ އެމްޑީޕީއާއި އެކީގައި ކުރިއަށް ގޮސްގެން އެބޭފުޅުންނަށް ޤަބޫލުކުރެވިގެން ކަމަށެވެ.

ރައީސް ވިދާޅުވީ އެނބުރި އެމްޑީޕީއަށް ވަޑައިގެންނެވި ބޭފުޅުން ވަޑައިގަތީ އެބޭފުޅެއްގެ ދާއިރާގެ ރައްޔިތުންގެ އެދުމާއި ޝުޢޫރާއި އެއްގޮތައް ކަމަށެވެ. އަދި ރައްޔިތުންގެ މަޖިލީހުގެ މެމްބަރުންނަކީ ރައްޔިތުންގެ އިހްސާސާއި ޝުޢޫރާއި އެއްގޮތައް ޢަމަލުކުރައްވަން ޖެހޭ ބައެއް ކަމަށާއި، ރައްޔިތުންގެ މަޖިލީހުގެ ހަޤީޤީ މެމްބަރުންގެ ގޮތަކީ އެއީ ކަމަށް ރައީސް ވިދާޅުވިއެވެ.

ހައްދުން މައްޗަށް ރައީސް އާއި އެމަނިކުފާނުގެ ޓީމުން ހައްދުންމަތީ ދަތުރު ނިންމަވާލައްވައި މިހާރު ވަނީ މާލެ ވަޑައިގެންފައެވެ.