ހިންދޫ ދީނުގެ 'ގުރޫ'އެއް އިންތިޒާމް ކޮށްގެން ބާއްވާ އެ ދީނުގެ ދީނީ ހަރަކާތެއް މާލޭގެ ހޮޓަލެއްގައި ބޭއްވި މައްސަލަ ފުލުހުންގެ އިދާރާއަށް މިހާރު ހުށަހަޅާފައިވާނެ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ. 

ހިންދޫ ދީނުގެ ބޮޑު ފާދިރީއެއް ކަމުގައިވާ ގަނޭޝް ޑުބޭ ނަމަކަށް ކިޔާ ގުރޫއެއް މާލޭގައި ހުންނަ އުނިމާ ގުރޭންޑުގައި، އެ ދީނުގެ ދީނީ ކުލާސްތަކެއް ނަގައިދޭ މައްސަލައެއް ފެންމަތިވުމާއި ގުޅިގެން ގިނަ ބައެއްގެ ފާޑުކިޔުންތައް ސަރުކާރަށް އަމާޒުވަމުން ދަނިކޮށް، މިނިސްޓަރު ކުރެއްވި ޓްވީޓެއްގައި ވިދާޅުވީ، މާލޭގެ ހޮޓެލެއްގައި "ސްޕިރިޗުއަލް ހީލާސް" ގެ ނަމުގައި ރާއްޖޭގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނާއި ޚިލާފު އަމަލުތަކެއް ހިންގައި އިޝާތިހާރު ކުރާ ކަމުގެ މައުލޫމާތު ލިބިފައިވާ ކަމަށެވެ.

އަދި އެ މައްސަލަ ބަލައި ދިނުމަށް ފުލުހުންގެ ކިބައިން އެދިފައިވާ ކަމަށްވެސް މިނިސްޓަރު ވިދާޅުވި އެވެ. 

Advertisement

މި މައްސަލާގައި ފުލުހުންގެ ބަހެއް ހޯދަން ވޮއިސް އިން މަސައްކަތް ކުރަމުންދާއިރު، މީހާތަނަށްވެސް ލިބިފައެއް ނުވެއެވެ. 

އެހެންނަމަވެސް، ދީނީ ކުލާސް ނަގައިދޭ ފާދިރީ ފުލުހުންގެ ހިމާޔަތުގައި އެ އިދާރާގެ ބެލުމުގެ ދަށަށް ގެންގޮސްފައިވާ ކަން ވޮއިސް އަށް ވަނީ ކަށަވަރުވެފައެވެ. 

ހިންދޫ ގުރޫގެ ކުލާސް ނެގުމާއި ގުޅިގެން ގިނަބައެއްގެ ނުރުހުން އަމާޒުވެފައި ވަނިކޮށް، އޭނާގެ ރަސްމީ ފޭސްބުކް ޕޭޖުގައި، ކޮށްފައިވާ ޕޯސްޓެއްގައި ވަނީ އެ ކޯހުގެ މަގުސަަދާއި ގުޅޭ މައުލޫމާތު ވެސް ދީފައެވެ.

އަދި އޭނާ ބުނީ އެ ހިންގު ކުލާސްތަކާއި، އެ ހިންގަމުންދާ ހޮޓެލާއި އެއްވެސް ގުޅުމެއް ނޯންނަ ކަމަށެވެ. އަދި އެއީ އެއްވެސް ސިޔާސީ އަދި ދީނީ ބަޔަކާއި ގުޅިގެން ހިންގި އެއްޗެއް ނޫން ކަމަށްވެސް ބުނެފައި ވެއެވެ. 

މިއާއެކު އޭނާ ބުނީ، އޭނާގެ މަގުސަދަކީ ދީނާއި، ފިކުރާއި، އަގީދާ އަށް ބެލުމެއް ނެތި އޭނާގެ އެ ފިލާވަޅައި، އޭނާގެ ތަރުބިއްޔަތު އެންމެނަށްވެސް ފޯރުކޮށްދިނުން ކަމަށެވެ.