އަތޮޅުތަކާއި މާލެ ސަރަހައްދުގައި 4000 ސޯޝަލް ހައުސިންގ ޔުނިޓް ތަރައްގީކުރުމަށް ފަހި ދިރިއުޅުން ކޯޕަރޭޝަން ލިމިޓެޑް (އެފްޑީސީ) އާއި އެމެރިކާގެ ސްޓްރަކްޗާސް އަންލިމިޓަޑްއާއި ދުމެދު އިންޖިނިއަރިން، ޕްރޮކިއުމަންޓް އެންޑް ކޮންސްޓްރަކްޝަން (އީ.ޕީ.ސީ) އެއްބަސްވުމެއްގައި މިއަދު ސޮއިކޮށްފިއެވެ.

މި އެއްބަސްވުމުގައި އެފްޑީސީގެ ފަރާތުން ސޮއިކުރެއްވީ، އެފްޑީސީގެ މެނޭޖިންގ ޑިރެކްޓަރ ސަލްފިޔާ އަންވަރެވެ. އަދި ސްޓްރަކްޗާސް އަންލިމިޓަޑްގެ ފަރާތުން ސޮއިކުރެއްވީ އެ ކުންފުނީގެ ޗެއާމަން ކަރީމް ޖަމަލް އަބްދުސް-ސަލާމެވެ.

އެފްޑީސީން ބުނީ، މިއެއްބަސްވުމުގެ ދަށުން، ރާށްޖޭގެ 5 ސަރަހައްދެއްގައި ސޯޝަލް ހައުސިންގ ޔުނިޓްތައް ތަރައްގީކުރުމަށް އެއްބަސްވެފައިވާ ކަމަށެވެ.

Advertisement

އެގޮތުން އައްޑޫ އަތޮޅުގައި 750 ހައުސިންގ ޔުނިޓް، ގދ. ތިނަދޫގައި 500 ހައުސިންގ ޔުނިޓް، ލ. ގަމުގައި 1000 ހައުސިންގ ޔުނިޓް، ހދ. ކުޅުދުއްފުށީގައި 1000 ހައުސިންގ ޔުނިޓް އަދި ގްރޭޓާ މާލެ ސަރަހައްދުގައި 750 ހައުސިންގ ޔުނިޓް ތަރައްގީކުރުމަށް ހަމަޖެހިފައިވާ ކަމަށް އެ ކޯޕަރޭޝަނުން މައުލޫމާތު ދެއެވެ. 

މީގެ އިތުރުން އެ ކޯޕަރޭޝަނުން ބުނީ، މި މަޝްރޫއުގެ ޖުމްލަ އަގަކީ 249 މިލިއަން އެމެރިކާ ޑޮލަރު ކަމަށާއި، މިއެއްބަސްވުމުގެ ދަށުން ތަރައްގީކުރާ ހައުންސިންގ ޔުނިޓްތައް ނިންމުމަށް ހަމަޖެހިފައިވަނީ މަޝްރޫއުގެ އަމަލީ މަސައްކަތް ފަށާތާ 36 މަސް (ތިން އަހަރު) ދުވަހުގެ ތެރޭގައި ކަމަށެވެ.