ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ރާ ޒޯނުގެ ގްރޫޕް އޭގައި މިއަދު ހަވީރު ކުޅެވުނު މެޗުގައި ޖޯލި ބީންގ އާއި އެމެރަލްޑް މޯލްޑިވްސް ވާދަކުރި މެޗު 7-5 ގެ ނަތީޖާއަކުން ކާމިޔާބުކޮށް އެމެރަލްޑް މޯލްޑިވްސް އިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މުބާރާތުގެ ފުރަތަަމަ މެޗުގައި ތަފާތުބޮޑު ނަތީޖާއަކުން ޖޯލި މޯލްޑިވްސް އަތުން ބަލިވި، އެމެރަލްޑް މޯލްޑިވްސްގެ ފަރާތުން މޮޅު ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި އެޓީމުން ވަނީ ތިން ލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު މެޗު ފެށިގެން ތިންވަނަ މިނެޓުގައި އެޓީމުގެ އިބްރާހިމް އަޒްމޫން ކާމިޔާބުކޮށްދިންއިރު، މި މެޗުގައި އެޓީމުން ކާމިޔާބުކުރި ދެވަނަ ލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ ކެޕްޓަން އަބްދުﷲ މާދިހް އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިހާފުގެ އިތުވަގުތުގެ ތެރޭގައި އެމެރަލްޑް މޯލްޑިވްސްގެ ތިންވަނަ ލަނޑު ކާމިޔާބުކޮށްދިނީ ވެސް މި މެޗުގައި މޮޅު ކުޅުމެއް ދެއްކި އިބުރާހިމް އަޒްމޫން އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން އެމެރަލްޑް މޯލްޑިވްސްގެ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފުގައި އެމެރަލްޑް މޯލްޑިވްސް އިން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އެގޮތުން މިހާފުގައި އެޓީމުގެ އަބްދުﷲ އަލީ ދެ ލަނޑު ކާމިޔާބުކޮށްދިން އިރު، ކެޕްޓަން އަބްދުﷲ މާދިހް ގެ އިތުރުން އިބްރާހިމް އަޒްމޫން ވަނީ ކޮންމެ ކުޅުންތެރިއެއް އެއް ލަނޑު ކާމިޔާބުކޮށްފައެވެ. އަދި މިހާފުގައި އަޒްމޫން ކާމިޔާބުކުރި ލަނޑާއެކު މިމެޗުގައި އޭނާ ވަނީ ހެޓްރިކް ފުރިހަމަކޮށްފައެވެ.

ޖޯލި ބީންގ ގެ ފަރާތުން މިހާފުގައި ވަރުގަދަ އެޓޭކިންގް ކުޅުމެއް ފެނިގެންދިޔައިރު، މިހާފުގައި އެޓީމުން ފަސް ލަނޑު ކާމިޔާބުކުރިއެވެ. އަދި މި ފަސް ލަނޑު ވެސް ކާމިޔާބުކޮށްދިނީ މި މެޗުގެ ދެވަަނަ ހާފުގައި މޮޅު ކުޅުމެއް ދެއްކި ހަސަން ސޮލާހް އެވެ. ނަމަވެސް މެޗުގެ ކުޅުން ނިމިގެންދިޔައީ 7-5 ގެ ނަތީޖާއަކުން އެމެރަލްޑް މޯލްޑިވްސް ކުރީގައި އޮވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އެމެރަލްޑް މޯލްޑިވްސްގެ އިބްރާހިމް އަޒްމޫން އެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ހަ ޕޮއިންޓް ހަމަކޮށް ގުރޫޕް އޭގެ ދެވަނަ ޓީމުގެ ގޮތުގައި އެމެރަލްޑް މޯލްޑިވްސް މުބާރާތުގެ ސެމީ ފައިނަލުން ޖާގަ ހޯދިއިރު، މި މެޗުން ބަލިވި ޖޯލި ބީންގ ވަނީ ބާކީ އެއް މެޗު އޮއްވައި މުބާރާތުން ކަޓާފައެވެ. 

މުބާރާތުގެ ސެމީ ފައިނަލުގެ ދެވަނަ މެޗުގައި ސެޕްޓެމްބަރު މަހުގެ 3ވަނަ ދުވަހު އެމެރަލްޑް މޯލްޑިވްސް ނުކުންނާނީ ގްރޫޕް ބީގެ އެއްވަނަ ދިގަލި މޯލްޑިވްސް އާއި ދެކޮޅަށެވެ.