އެމަނިކުފާނު ތާއީދު ކުރައްވަނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް، ޑރ. މުޙައްމަދު މުޢިއްޒު އަށް ކަމަށާއި، މި އިންތިހާބުގައި ޑރ. މުއިއްޒު ރައީސުލްޖުމްހޫރިއްޔާގެ މަގާމަށް ހޮއްވަވަން ނުހަނު ބޮޑަށް ބޭނުންފުޅުވާކަމަށް، ޕީޕީއެމްގެ ލީޑަރ ރައީސް ޔާމީން އަބްދުލްގައްޔޫމް ވިދާޅުވެފައިވާ ކަމަށް އެމަނިކުފާނުގެ ވަކީލުގެ ޓީމުން ވިދާޅުވެއްްޖެއެވެ.

ރައީސް ޔާމީންގެ ތާއީދު ޑރ. މުއިއްޒަށް ނެތް ކަން ދޭހަވާ ފަދަ މޭރުމުން، ޑރ. މުއިއްޒަށް އެމަނިކުފާނު ނުހުރުމުގެ ބަސްފުޅުތަކެއް އަމާޒު ކުރައްވާފައިވާ ކަމަށް ނޫހަކުން ލިޔެފައިވާ ލިޔުމަކާއި ގުޅިގެން ޔާމީންގެ ވަކީލުންގެ ޓީމުން ނެރުނު ބަޔާނެއްގައި ބުނީ، އެ ހަބަރުގައި ލިޔެފައިވާ ފަދަ އެއްވެސް ވާހަކައެއް، އަދި، ރައީސް ޔާމީންގެ ނޯޓެއް ކަމަށް ބަޔާންކޮށް މީސްމީޑިއާގައި ދައުރުކުރަމުންދާ ނޯޓުގައި ބަޔާންކޮށްފައިވާ ފަދަ އެއްވެސް ވާހަކައެއް، ހައިކޯޓުގެ ތެރޭގައި ރައީސް ޔާމީން ވިދާޅުވެފައި ނުވާ ކަމަށެވެ.

އަދި، މި ރިޔާސީ އިންތިހާބުގައި ރައީސް ޔާމީން ތާއިދުކުރައްވާ ކެންޑިޑޭޓަކީ ޑރ. މުއިއްޒު އަދި ރަނިންގ މޭޓް ހުސައިން މުހައްމަދު ލަތީފް (ސެމްބެ) ކަމަށްވެސް އެ ބަޔާނުގައި ވެއެވެ.

Advertisement

"އެންމެހައި މެންބަރުންނާއި ރައީސް ޔާމީނަށް ތާއިދުކުރައްވާ އެންމެހައި ސަޕޯޓަރުން ވެސް ވޯޓު ލުމަށް އެމަނިކުފާނު އެދިވަޑައިގަންނަވަނީ ޑރ. މުޙައްމަދު މުޢިއްޒު އަށް ކަމަށާއި، މި އިންތިހާބުގައި ޑރ. މުއިއްޒު ރައީސުލްޖުމްހޫރިއްޔާގެ މަގާމަށް ހޮއްވަވަން އެމަނިކުފާނު ނުހަނު ބޮޑަށް ބޭނުންފުޅުވާކަމަށް ވިދާޅުވެފައިވެއެވެ.". ވަކީލުންގެ ބަޔާނުގައި ވެއެވެ.

ޔާމީންގެ ވަކީލުންގެ ޓީމުން ބުނީ، އެފަދަ ދޮގު ވާހަކަތައް ފަތުރަމުންދަނީ ރައީސް ޔާމީނަށް ނަފްރަތުކުރާ، އަދި އެމަނިކުފާނަށް ނުހައްގުން އަނިޔާދެމުން ގެންދާ ފަރާތްތަކުގެ ރޭވުމެއްގެ ދަށުން ކަމަށެވެ. އަދި އެއީ އެ ކޯލިޝަންގެ މެންބަރުންނާއި ރައީސް ޔާމީނަށް ތާއިދުކުރައްވާ ޢާންމު ރައްޔިތުންގެ މެދުގައި ފިތުނަ އުފައްދައި، ބައިބައިކޮށް، މި ރިޔާސީ އިންތިހާބު އެ ކޯލިޝަނަށް ކާމިޔާބުވިޔަ ނުދިނުމަށްޓަކައި ކުރާ ވަރަށް ފިނޑި އަމަލުތަކެއް ކަމަށްވެސް އެ ބަޔާނުގައި ވެއެވެ.

"އެފަދަ ވާހަތައް ގަބޫލުނުކުރުމަށާއި، ހުރިހާ ފަރާތްތަކެއް ވެސް އިތުރު ހިތްވަރެއްލައި، މި ރިޔާސީ އިންތިހާބު ޕީޕީއެމް/ޕީއެންސީގެ ކެންޑިޑޭޓް ޑރ. މުއިއްޒު އަދި ސެމްބެ ކާމިޔާބުކޮށްދިނުމަށް ވީ އެންމެ ބޮޑަކަށް މަސައްކަތް ކޮށްދެއްވުމަށް ޕީޕީއެމް/ޕީއެންސީގެ މެންބަރުންނާއި ރައީސް ޔާމީންގެ ސަޕޯޓަރުންގެ ކިބައިން އެމަނިކުފާނު އެދިވަޑައިގަންނަވައެވެ.". އެ ބަޔާނުގައި ވެއެވެ.