ޔޫރަޕުގެ ނަން މަޝްޙޫރު ގިނަ ތަރިންތަކެއް ކުޅެމުން އަންނަ ސައުދީ ޕްރޮފެޝަނަލް ލީގުގެ މިދި މަހުގެ މޮޅު ކުޅުންތެރިޔާގެ މަގާމު ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ހޯދައިފިއެވެ.
ސައުދީ ޕްރޮފެޝަނަލް ލީގުގެ އަލް ނަސްރަށް ކުޅެމުން އަންނަ އުމުރުން 38 އަހަރުގެ ރޮނާލްޑޯގެ އިތުރުން މި މަގާމަށް ވާދަކޮށްފައި ވަނީ އަލް ހިލާލްގެ ބްރެޒިލް ފޯވާޑް މަލްކޮމް ގެ އިތުރުން އަލް އަހްލީގެ އަލްޖީރިއާގެ ވިންގަރ މަހްރޭޒް އެވެ.
އޮގަސްޓު މަހު ސައުދީ ލީގުގައި އަލް ނަސްރުގެ ފެށުން ދަށްކޮށް ދިޔައިރު، ލީގުގައި އެޓީމު ކުޅުނު ފުރަތަަމަ ދެ މެޗުން ވަނީ ބަލިވެފައެވެ. އޭގެތެރެއިން ފުރަތަމަ މެޗުގައި ރޮނާލްޑޯ ކުޅެފައި ނުވާއިރު، ދެވަނަ މެޗުގައި އެޓީމުގެ މުހިންމު ބައެއް ކުޅުންތެރިން ކުޅެފައެއް ނުވެއެވެ. ނަމަވެސް ލީގުގައި އެންމެ ފަހުން ކުޅުނު ދެމެޗުން މޮޅުވެ ލީގު ތާވަލުގެ ހަ ވަނައަށް އެޓީމު ކުރިއަށް ޖެހިލާފައިވާއިރު، މި ދެ މެޗުގައި ރޮނާލްޑޯ ވަނީ ފަސް ލަނޑު ޖެހުމުގެ އިތުރުން އިތުރު ދެ ލަނޑު ޖެހުމަށް އެހީތެރިވެދީފައެވެ.
އެގޮތުން ލީގުގައި އަލް ފަތޭހް އާއި ދެކޮޅަށް ކުޅުނު މެޗުގައި ތިން ލަނޑު ކާމިޔާބުކޮށް ހެޓްރިކް ހެދިއިރު، އެމެޗުގައި ރޮނާލްޑޯގެ ފަރާތުން ވާނީ މޮޅު ކުޅުމެއް ފެނިގެން ގޮސްފައެވެ. އަދި ލީގުގައި އެންމެ ފަހުން ކުޅުނު މެޗުގައި އަލް ޝަބާބު އަތުން 4-0 ގެ ނަތީޖާއަކުން އަލް ނަސްރު މޮޅުވިއިރު ރޮނާލްޑޯ ކާމިޔާބުކުރި ހަތަރު ލަނޑުގެ ތެރެއިިން ދެ ލަނޑު ރެފްރީ ވަނީ ބަލައިނުގަނެފައެވެ.
ލީގުގައި މާދަމާ ރޭ 23:00 ގައި އަލް ނަސްރު ރަށުން ބޭރުގައި ނުކުންނާނީ މިސީޒަނުގައި އަލަށް ސައުދީ ޕްރޮފެޝަނަލް ލީގަށް ޕްރޮމޯޓްވި އަލް ހާޒެމް އާއި ދެކޮޅަށެވެ.
Advertisement
This content is created and paid for by advertisers and does not involve Voice Journalists
