"އުފާވެރި މާލެ" މެނިފެސްޓޯގެ ދަށުން މާލެ ސަރަހައްދުގައި ޒަމާނީ ޕަބްލިކް ޓްރާންސްޕޯޓް ތަޢާރަފްކުރާނެ ކަމަށް އެމްޑީޕީ ކޯލިޝަނުން ބުނެފިއެވެ.
ރޭ އެމްޑީޕީއިން މާލެ ސިޓީގައި ބޭއްވި ޖަލްސާގައި ނެރުނު "އުފާވެރި މާލެ" މެނިފެސްޓޯގައި ބުނެފައިވަނީ މާލެ ސަރަހައްދުގެ ކާރޫބާރު ބޮޑު މަގުތަކުން މިންޖުވުމަށް ހިނގާ މީހުންނަށް އިސްކަންދެވޭނެ، ޕެޑެސްޓްރިއަން ފްރެންޑްލީ ރޯޑްސް ތަރައްޤީކުރާނެ ކަމަށެވެ.
މީގެއިތުރުން މާލެ ސަރަހައްދުގެ މަގުތައް ޒަމާނީ ފެންވަރަށް ތަރައްޤީކުރުމުގެ ޕްރޮޖެކްޓް ކުރިއަށް ގެންދާނެ ކަމަށާއި، މާލެ ސަރަހައްދުގައި ވެހިކަލް ފޭސްއައުޓް ކުރުމަށް މާސްޓަރ ޕްލޭނެއް ތައްޔާރުކޮށް، ޕަބްލިކް ޓްރާންސްޕޯޓަށް އަހުލުވެރިކުރާނެ ކަމަށް ބުނެފައިވެއެވެ.
ހަމަމިއާއިއެކު މާލޭގައި ޒަމާނީ ޕަބްލިކް ޓްރާންސްޕޯޓް ސިސްޓަމެއް ތަޢާރަފްކުރާނެ ކަމަށާއި، މާލެ، ހުޅުލެ އަދި ހުޅުމާލެ ބްރިޖަށް ދެ ލޭން އިތުރުކޮށް ލައިޓް ރެއިލް ތަޢާރަފްކޮށް، އަދި މިރެއިލް މާލެ ސަރަހައްދުތަކަށް ފުޅާކުރާނެ ކަމަށެވެ.
"އުފާވެރި މާލެ" މެނިފެސްޓޯ ގައި ބުނެފައިވަނީ ސްކޫލް ދަރިވަރުންނަށް ސްކޫލް ބަސް ތަޢާރަފް ކުރާނެ ކަމަށާއި، ދުވަސްވީ ވެހިކަލްތައް މަދުކުރުމަށްޓަކައި އުޅަނޑުގެ ވެރިފަރާތް ކަށަވަރުކުރުމަށްފަހު ޕަބްލިކް ޓްރާންސްޕޯޓު ނިޒާމަށް ރިބޭޓް ނިޒާމެއް ގާއިމްކުރަނެ ކަމަށް ބުނެފައިވެއެވެ.
މިއާއި އެކު މާލެ ސަރަހައްދުގައި ބޭނުންކުރެވޭނެ އުޅަނދުތަކަށް ކެޕް ކަނޑައެޅުމާއި، ތޮއްޖެހުން ކުޑަކުރުމަށް މަގުތަކުން ޕާކިން ހުސްކޮށް، 4 ފުރޮޅުލީ އުޅަނދުތަކަށް ޚާއްސަ ޕާކިންފެސިލިޓީ ހެދުމާއި، މޮޓޯ ސައިކަލުތަކަށް ޚާއްސަ ނެއިބަރހުޑް ޕާކިންގ ތަޢާރަފްކުރާނެ ކަމަށް ބުނެފައިވެއެވެ.
އަދި މާލެ ސަރަހައްދުގެ މަގުތަކަކީ ރައްކާތެރި ތަންތަނަށް ހެދުމަށްޓަކައި ޓްރެފިކް އެންފޯސްމަންޓް ޓެކްނޮލޮޖީ ބޭނުންކުރާ މިންވަރު އިތުރުކުރާނެ ކަމަށް ބުނެފައިވެއެވެ.
މީގެ އިތުރުންވެސް މާލެ ސަރަހައްދަށް ޚާއްސަ ކަންކަން މި މެނިފެސްޓޯގައި ބަޔާން ކޮށްފައިވެއެވެ.
Advertisement
This content is created and paid for by advertisers and does not involve Voice Journalists
