ލ.އަތޮޅުގައި ހޮޓެލް ސްކޫލެއް އަޅުއްވައި ދެއްވާނެ ކަމަށް ޕީއެންސީ ޕީޕީއެމްގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.
ރޭ ލ.ފޮނަދޫގައި ބޭއްވުނު ޖަލްސާގައި ވާހަކަދައްކަވަމުން ޑރ މުޢިއްޒު ވިދާޅުވީ ލ.އަތޮޅު ހުޅިމެންދޫއަކީ ރިސޯޓެއް އެޅުމަށް ވަރަށް އެކަށީގެންވާ ރަށެއް ކަމަށެވެ.
"ދެން މީގައި އަޅުގަނޑު ދަންނަވާލަން ބޭނުންވަނީ ޓޫރިޒަމްއަށް ވަރަށް މުހިންމު ކަމެއް އެބެއް، އެއީ މީހުން ބިނާ ކުރުން ދިވެހި ޒުވާނުން ދިވެހި ރައްޔިތުންނަށް ކިޔަވައިދީގެން ސީދާ ފީލްޑްގަ މަސައްކަތްކޮށްގެން، މާނައަކީ ރިސޯޓެއްގަ އިންޓަރނޭޝަނަލް މާކެޓަށް ހުޅުވާޅެވިފައިވާ ރަނގަޅު ފެންވަރުގެ ރިސޯޓެއް ހަދަން، އެރިސޯޓަކީ ހޮޓަލް ސްކޫލަކަށް ހަދަން"
ޑރ މުޙައްމަދު މުޢިއްޒު
ޑރ މުޢިއްޒު ވިދާޅުވީ އެ ހޮޓެލް ސްކޫލްވެގެންދާނީ ތަމްރީނުދޭ ތަމްރީނުލިބުމާއި އެކު ވަޒީފާވެސް އަދާކުރެވޭ ތަނަކަށް ހައްދަވާނެ ކަމަށެވެ. އޭރުން ތަމްރީނު ކުރެވި ވަޒީފާ އަދާކުރެވި އިތުރު މީހުން ތަމްރީނުވެސް ކުރެވިގެން ދާނެ ކަމަށެވެ.
ފޮނަދޫ ގައި ރޭ ބޭއްވުނު އިދިކޮޅު ކޯލިޝަންގެ ޖަލްސާ. ފޮޓޯ: ޕީޕީއެމް
މީގެ އިތުރުން ލ.އަތޮޅަށް އެއް އެއަރޕޯޓުން ނުފުދޭނެ ކަމަށާއި އެއަތޮޅުގައި ދެވަނަ އެއަރޕޯޓެއް އަޅައިދެއްވާނެ ކަމަށް ޑރ މުޢިއއްޒު ވަނީ ވިދާޅުވެފައެވެ. މީގެ އިތުރުންވެސް ލ.އަތޮޅުގެ ތަރައްޤީއާއި ގުޅޭ ގިނަ ވަޢުދުތަކެއް ރޭ ޑރ މުޢިއްޒު ވަނީ ވެވަޑައިގެންފައެވެ.
ރޭ ލ.ފޮނަދޫގައި ބޭއްވުނު ޖަލްސާގައި ގިނަ ޢަދަދެއްގެ ޢާންމުން ވަނީ ބައިވެރިވެފައެވެ.
Advertisement
This content is created and paid for by advertisers and does not involve Voice Journalists
