އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ނޮޓިންހަމް ފޮރެސްޓާއި ދެކޮޅަށް ޗެލްސީ ކުޅުނު މެޗުން 1-0 ގެ ނަތީޖާއަކުން އެޓީމު ބަލިވެއްޖެ އެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރީ ޗެލްސީ އިންނެވެ. އަދި މި ހާފުގައި އެޓީމުން ވަނީ ނޮޓިންހަމްގެ ގޯލަށް 10 ހަމަލާއެއް ފޮނުވާލާފައި ވާއިރު، އޭގެ ތެރެއިން ގޯލާއި އަމާޒުވެފައި ވަނީ އެންމެ ހަމަލާއެކެވެ.

މިހާފުގައި ނޮޓިންހަމްގެ ފަރާތުން ޑިފެންސިވް ކުޅުމެއް ފެނިގެންދިޔަ އިރު، މިހާފުގައި ޗެލްސީގެ ގޯލާއި އަމާޒުކޮށް އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފު ވަރުގަދަކޮށް ފެށީ ނޮޓިންހަމް އިންނެވެ. އެގޮތުން މިހާފު ފެށިގެން ތިންވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އެންތޮނީ އެލަންގާ އެވެ.

ނޮޓިންހަމްގެ ލަނޑަށްފަހު ޗެލްސީ އިން ވަނީ އެޓީމުގެ އެޓޭކުތައް އިތުރަށް ވަރުގަދަކޮށް ލަނޑެއްޖެހޭތޯ ވަރަށް މަސައްކަތް ކޮށްފައެވެ. އަދި މިހާފުގައި އެޓީމުގެ ފޯވާޑް ނިކޮލަސް ޖެކްސަންގެ އިތުރުން ޑިފެންޑަރު ތިއާގޯ ސިލްވާއަށް ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ލިބި ބޭނުންނުކުރެވިފައެވެ.

މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ނޮޓިންހަމް ފޮރެސްޓް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ހަތަރު މެޗުން ފޮރެސްޓަށް 6 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 9 ވަނައިގައެވެ. އަދި މި މެޗުން ބަލިވި ޗެލްސީ އަށް ހަތަރު މެޗުން ލިބުނު ހަތަރު ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ 11 ވަނައިގައެވެ.