ސްޕެނިޝް ލަލީގާގައި މިރޭ އަމިއްލަ ދަނޑުގައި ގެޓާފޭ އާއި ދެކޮޅަށް ކުޅުނު މެޗުން ހަނިގޮތަކަށް މޮޅުވެ ލީގު ތާވަލުގެ އެއްވަނައިގައި ރެއާލް މެޑްރިޑުން ހަމަޖެހިލައިފި އެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ރެއާލް މެޑްރިޑުން މެޗު ޑޮމިނޭޓުކުރި ނަމަވެސް މި މެޗުގައި ފުރަތަަމަ ލަނޑުޖަހައި ކުރިހޯދީ ގެޓާފޭ އިންނެވެ. މިލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ އެޓީމުގެ ތަޖުރިބާކާރު ފޯވާޑް މަޔޮރާލް އެވެ. މިއީ ރެއާލްގެ ފަހަތުން ހެދުނު ގޯހެއްގެ ފައިދާ ނަގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި ރެއާލް މެޑްރިޑުން އެންމެ ހުސް ފުރުސަތެއް ލިބުނީ ކެޕްޓަން ލޫކާ މޮޑްރިޗް އަށެވެ. ގެޓާފޭގެ ޕެނަލްޓީ އޭރިއާ ތެެރެއިން ވެއްޓިގެންފައި ބޮލުން މޮޑްރިޗް ކުރިއަށް ފޮނުވާލި ބާރު ހަމަލާ ގެޓާފޭގެ ކީއްޕަރު ދިފާއުކުރި އިރު، އޭގެ ފަސް މިނެޓު ފަހުން ރެއާލްގެ ފޯވާޑް ޖޯސޭލޫ މުޅިން ހުސްކޮށް ހުރެ ފޮނުވާލި ބޯޅަ ވެސް އޭނާ ވަނީ ހުޝިޔާރުކަމާއެކު ދިފާއުކޮށްފައެވެ.

Advertisement

މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ގެޓަފޭ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ރެއާލް މެޑްރިޑުން އެޓީމުގެ އެޓޭކުތައް އިތުރަށް ވަރުގަދަކުރި އިރު، އެޓީމުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފު ފެށިގެން ދެވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ޖޯސޭލޫ އެވެ. މީގެ އިތުރުން މިހާފުގައި ރެއާލްގެ މިޑްފީލްޑަރު ޓޯނީ ކްރޫސް އާއި ޑިފެންޑަރު ކަވަހާލް ފޮނުވާލި ދެ ހަމަލާއެއް ގޯލުގެ ދަނޑިއަށް އަމާޒުވިއިރު، މިހާފުގައި ރެއާލް މެޑްރިޑުން ފޮނުވާލި ގިނަ ހަމަލާތަކެއްގެ ހުރަހަކަށްވީ މި މެޗުގައި މޮޅު ކުޅުމެއް ދެއްކި ގެޓާފޭގެ ކީއްޕަރު ޑޭވިޑް ސޮރިއާ އެވެ.

މިމެޗުން ރެއާލް މެޑްރިޑް މޮޅުވި ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ އިގިރޭސި މިޑްފީލްޑަރު ބެލިންހަމް އެވެ. މިއީ ލީގުގައި އެޓީމު ކުޅުނު ހަތަރު މެޗުގައި ބެލިންހަމް ކާމިޔާބުރި ފަސްވަނަ ލަނޑެވެ. އަދި މި ލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު މިވަގުތު ލީގު ތާވަލުގެ އެއްވަނައިގައި އޮތީ ރެއާލް މެޑްރިޑެވެ. އަދި މި މެޗުން ބަލިވި ގެޓާފޭ ލީގުގައި ކުޅުނު ހަތަރު މެޗުން ލިބުނު ހަތަރު ޕޮއިންޓާއެކު މިވަގުތު އޮތީ ލީގު ތާވަލްގެ 14 ވަނައިގައެވެ.