ސަރުކާރަށް އާމްދަނީ އިތުރުކުރުމަށް މިހާރު ރައްޔިތުން އަތުން ނަގަމުންދާ ޓެކްސްގެ އިތުރުން އިތުރު ޓެކުހެއް ނުނަންގަވާނެކަމަށް މި ރިޔާސީ އިންތިޚާބުގައި ވާދަކުރައްވާ ހުރިހާ ކެންޑިޑޭޓުން ވިދާޅުވެއްޖެ އެވެ. 

ހުރިހާ ކެންޑިޑޭޓުންނަށް ހުޅުވާލައިގެން ކުރިއަށް ގެންދިޔަ ރިޔާސީ ބަހުސުގައި، 8 ކެންޑިޑޭޓުން ބައިވެރިވެވަޑައިގެންފައި ވާއިރު، ޤައުމުގެ އިޤްތިޞާދު ރަނގަޅުކޮށް ސަރުކާރަށް އާމްދަނީ އިތުރުކުރުމަށް ކުރައްވާނެ ކަންކަން ވަނީ ހާމަކޮށްދެއްވާނެ އެވެ. 

އެގޮތުން ދަރަނި ކުޑަކުރުމަށް ގެންގުޅުއްވާނެ ސިޔާސަތުތަކާއި، މިހާރު ނަގާފައިވާ ދަރަނި އަނބުރާ ދައްކާނެ ސިޔާސަތުތައް ވެސް ހުރިހާ ކެންޑިޑޭޓުން ހާމަކުރެއްވި އެވެ. 

އެހެން ނަމަވެސް 8 ކެންޑިޑޭޓުންގެ ވާހަކައަށް ބަލާއިރު އެ ހުރިހާ ބޭފުޅުން ވެސް އިއްތިފާގުވާ އެއްކަމެއް ރިޔާސީ ބަހުސުން ވަނީ ފާހަގަވެގެން ގޮސްފައެވެ. 

އެއީ ސަރުކާރަށް ލިބޭ އާމްދަނީ އިތުރުކުރުމަށް މިހާރު ރައްޔިތުން އަތުން ނަގަމުން އަންނަ ޓެކްސްގެ އިތުރުން، އިތުރު ޓެކުހެއް ނުނެގުމަށެވެ. ރިޔާސީ އިންތިޚާބުގައި ބައިވެރިވެވަޑައިގަންނަވާ 8 ކެންޑިޑޭޓުން ވެސް ވިދާޅުވީ އިތުރު ޓެކުހެއް ރައްޔިތުން އަތުން ނުނަގާނެ ކަމުގެ ޔަގީންކަން ދެއްވާ ކަމަށެވެ. 

އާމްދަނީ އިތުރުކުރުމަށް އެކި ރިޔާސީ ކެންޑިޑޭޓުން ގެންގުޅުއްވާ ވިސްނުންފުޅު ތަފާތު ވި ނަމަވެސް، ރައްޔިތުން އަތުން އިތުރު ޓެކްސް ނަގާ، ދައުލަތަށް އާމްދަނީ އިތުރުކުރުމަށް ރައްޔިތުންގެ ޖީބުތަކުން ދައުލަތަށް އިތުރު ޚަރަދުތައް ކުރުވަން ނުޖައްސަވާނެ ކަމަށް ހުރިހާ ކެންޑިޑޭޓުން ވެސް ވަނީ އެއްބަސްވެވަޑައިގެންފަ އެވެ. 

ސަރުކާރުގެ އާމްދަނީ އިތުރުކުރުމަށް ރައްޔިތުން އަތުން އިތުރު ޓެކުހެއް ނުނެގުމުގެ ސިޔާސަތަކީ ހުރިހާ ކެންޑިޑޭޓުން ވެސް ޤަބޫލުކުރާ އަދި އިއްތިފާގުވާ ސިޔާސަތެއްކަން ފާހަގަކޮށްލެވެއެވެ.