ރިޔާސީ އިންތިޚާބުގެ ކެމްޕޭއިންގެ ތެރެއިން، އެންޓި ކެންޕެއިން ކުރާ މައްސަލަ އިލެކްޝަންސް ކޮމިޝަން (އީސީ) އިން ބަލާނީ، އެ މައްސަލަ އެ ކޮމިޝަނަށް ހުށަހެޅުމުން ކަމަށް އީސީގެ ނާއިބު އިސްމާއިލް ހަބީބު ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިންގެ ތެރެއިން، ވެރިކަން ކުރާ މައި ޕާޓީ، އެމްޑީޕީ އާއި، އެ ޕާޓީ ހިމެނޭ ކޯލިޝަންގެ ބޭފުޅުން އަންނަނީ، އިދިކޮޅުު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒަށް ވަރަށް ބޮޑަށް ފާޑުވިދާޅުވެ އެންޓި ކެންޕެއިން ކުރަމުންނެވެ. 

ޚާއްޞަކޮށް، ރައީސް ޞާލިހު ގެ ކެންޕެއިން ތަރުޖަމާނު، މާރިޔާ އަހުމަދު ދީދީ އަންނަނީ ކޮންމެ ދުވަހަކުހެން ބާއްވަމުން އޮންނަ ނޫސްވެރިންގެ ބައްދަލުވުމުގައި، މުޢިއްޒަށް ވަރަށް ބޮޑަށް އެންޓި ކުރައްވަމުންނެވެ. 

Advertisement

ނަމަވެސް އެ މައްސަލާގައި މިހާތަނަށްވެސް އީސީން ވަކި އެއްޗެއް ބުނެފައި ނުވާއިރު، އެކަމާއި ގުޅިގެން 'ވޮއިސް' އިން ކުރި ސުވާލަކަށް ޖަވާބު ދެއްވަމުން ހަބީބު ވިދާޅުވީ، އެފަދައިން، ޖަލްސާ ތަކާއި އެނޫންވެސް ތަންތަނުގައި އެންޓި ކެންޕެއިން ކުރުމުގެ ސަބަބުން، ކެންޑިއޭޓެއްގެ އިންތިޚާބީ ހައްގަކަށް އުނިކަމެއް އަންނަ ކަމަށް ފެންނަ ނަމަ، އެކަން ކޮމްޕްލެއިންސް ބިޔުރޯ އަށް ހެއްކާއި އެކު ހުށަހެޅުމުން ބަލާނެ ކަމަށެވެ. 

"އެފަދަ މައްސަލަތަކަކީ ބްރޯޑްކާސްޓިންގ އާއި ގުޅޭ ކަމެއް ނަމަ، އެކަން ބަލާނީ ބްރޯޑް ކާސްޓިންގ ކޮމިޝަނުން. ކޮރަޕްޝަނާއި ގުޅޭ ކަމެއް ނަމަ، އެންޓި ކޮރަޕްޝަން ކޮމިޝަނުން ބަލާނެ. އެނޫން ކަންކަން އިލެކްޝަންސް ކޮމިޝަނުން ބަލާނެ. އެކަމަކު ވަކި ވަކިން ޖަލްސާތަކުގައި ދައްކާ ވާހަކަ އަޅުގަނޑުމެން ބަލާފަ އެފަދަ ކަންކަން ނުބެލޭނެ. ޖެހޭނީ ކޮމްޕްލެއިންސް ބިޔުރޯ އަށް، ހެއްކާއި އެކު މައްސަލަ ހުށަހަޅަން." ހަބީބު ވިދާޅުވި އެވެ.