މީޑިއާ މެދުވެރިކޮށް، ޕީޕީއެމް/ ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު އަށް އެންޓި-ކެންޕެއިން ކުރި މައްސަލަ އިލެކްޝަންސް ކޮމިޝަނަށް ހުށަހަޅުއްވާނެ ކަމަށް، އެމަނިކުފާނުގެ ތަރުޖަމާނު މުހައްމަދު ތޮލާލް ވިދާޅުވެއްޖެއެވެ. 

ބައެއް އޮންލައިން މީޑިއާތައް މެދުވެރިކޮށް ޑރ. މުޢިއްޒަށް އެންޓި ކެންޕެއިން ކޮށްށ އެމަނިކުފާނުގެ އިސްތަށިފުޅުގައި ދޮގު ތުހުމަތުތައް އަޅުއްވަމުންދާތީށ އެ ތުހުމަތު ތަކަކީ ދޮގުކަން ރޭވެސް ތަރުޖަމާނު ވަނީ ސާފުކޮށްދެއްވާފައެވެ. 

އެގޮތުން، "އަދަދު" ނޫހުގައި "ބިދޭސީ ކުންފުނިތަކަކުން މުއިއްޒުގެ އެކައުންޓަށް ގިނަ އަދަދެއްގެ ފައިސާ" މި ސުރުޚީގެ ދަށުން ލިޔެފައިވާ ޚަބަރާއި ގުޅިގެން މީޑިއާ ތަކަށް މަޢުލޫމާތު ދެއްވަމުން ތޮލާލް ވަނީ، އެކަން ދޮގު ކުރައްވައި އެކަމުގެ ހަގީގަތް ހާމަކޮށްދެއްވާފައެވެ. 

"2015 ވަނަ އަހަރުން ފެށިގެން ޑރ. މުއިއްޒުގެ އެކައުންޓަށް ކޮންމެ މަހަކު ޖަމާވާ ޑޮލަރަކީ އެމަނިކުފާނުގެ ރޯހައުސް އިން ކުއްޔަށް ދެއްވާފައިވާ 2 އެޕާޓްމަންޓުން ކުލީގެ ގޮތުގައި އެފަރާތްތަކުން ދައްކަމުން ގެންދާ ފައިސާ ކަމުގައި ދަންނަވަމެވެ. މީގެ ތަފްސީލުތައް ބޭންކަށްވެސް ޑިކްލެއާ ކުރެވިފައިވާނެއެވެ. އަދި އެއީ 2015ގައި ރޯހައުސް ލިބިވަޑައިގަތް ހިސާބުންފެށިގެން ކުއްޔަށް ނަގައިގެން އުޅޭ ބައެއް. އިންކަމް ޓެސްވެސް ދައްކަވަމުން ގެންދަވަނީ. ކުލީގެ ގޮތުގައި ފުރަތަމަ ޑޮލަރުން ފައިސާ ދެއްކި ނަމަވެސް ފަހުން ފައިސާ ދައްކަމުންގެންދަނީ އެއަދަދަށް ދިވެހި ފައިސާގެ މަގުންނެވެ. ޑރ މުއިއްޒި ފޮރުވަން އަދި ސިއްރު ކުރަން ވެސް އެއްވެސް ކަމެއް ނޯންނާނެ. އެއްވެސް ޝައްކެއް އޮތް ނަމަ ތަހުގީހު ކުރައްވާ. އެއްބާރުލުން ދެއްވާނެ." ތޮލާލް ވިދާޅުވިއެވެ.

އެސުވާލު މިއަދުގެ ނޫސްވެރިންގެ ބައްދަލުވުމުގައި ވެސް އެ ނޫހުން ތަކުރާރު ކުރެއްވުމުން ތޮލާލް ވަނީ، ޑރ.މުޢިއްޒުގެ ބޭންކު އެކައުންޓާއި ގުޅޭ އެފަދަ ސްޓޭޓްމަންޓް ތައް ލީކު ކުރުމަކީ ކަންބޮޑުވެލައްވާ ކަމެއް ކަމަށާ އެއީ ސަރުކާރުން ކޮށްފައިވާ ކަމެއް ކަމަށެވެ. 

އަދި، އެފަދަ އާޓިކަލްތައް މެދުވެރިކޮށް އެންޓި ކެންޕެއިން ކުރާ މައްސަލަ ހުށަނޭޅި ކަމުގައި ވިޔަސް އީސީން އެކަން ބަލަންޖެހޭނެ ކަމަށް އޭނާ ވިދާޅުވި އެވެ. 

މިއާއެކު ތޮލާލް ވަނީ އެ ފަދައިން އެންޓި ކެންޕެއިން ކުރި މައްސަލަ އީސީއަށް ހުށަހަޅުއްވާނެ ކަމަށްވެސް ވިދާޅުވެފައެވެ. 

ތޮލާލް މިފަދައިން ވިދާޅުވެފައި ވާއިރު، އެމްއެމްސީން ވެސް ވަނީ އެފަދައިން ކެންޑިޑޭޓުންނާއި ބެހޭ ގޮތުން ހަގީގަތާ ޚިކާފް ވާހަކަތައް ނުފެތުރުމަށް އެދިފައެވެ. އަދި އީސީން ވަނީ އެފަދަ މައްސަލަ ހުށަހެޅުމުން، މައްސަލަ ބަލައި ފިޔަވަޅު އަޅާނެ ކަމަށް ބުނެފައެވެ.