ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ހަމަޖެހިފައިވަ ރިޔާސީ އިންތިހާބު ކާމިޔާބު ކުރެވި ވެރިކަމަށް އާދެވިއްޖެނަމަ، ތ އަތޮޅު ދިޔަމިގިއްޔާއި މަޑިފުށި ކޯޒްވޭއަކުން ގުޅުވައިލައްވާނެކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ.މުޙައްމަދު މުޢިއްޒު ވައުދުވެވަޑައިގެންފިއެވެ.

ރިޔާސީ އިންތިހާބުގެ ކެމްޕެއިންގައި އަތޮޅުތެރޭގެ ރަށްތަކަށް ކުރަމުން ގެންދާ ދަތުރުތަކުގައި އިއްޔެ ތ އަތޮޅު  ގުރައިދޫއަށް ވަޑައިގެން އެ ރަށުގައި ދެއްކެވި ވާހަކަފުޅުގައި ޑރ.މުޢިއްޒުވަނީ ނިމެން މިދާ ދައުރަކީ ރައްޔިތުންނަށް މާޔޫސްކަން ގެނުވި ފަސް އަހަރުގެ ގޮތުގައި ސިފަ ކުރައްވައިފައެވެ. އަދި ވެފައިވާ ވައުދުތައް ނުފެއްދޭ ތަން ގުރައިދޫއާއި އެހެން ރަށްތަކުންވެސް ފެންނަމުންދާ ކަމަށް މުއިއްޒުގެ ވާހަކަފުޅުގައި ވަނީ ވިދާޅުވެފައެވެ. 

އަދި ރައްޔިތުން ބޭނުންވާގޮތަށް ރައީސް ޢަބްދުﷲ ޔާމީނުގެ ވެރިކަމުގައި ފެނުނު ތަރައްޤީގެ ކުލަތައް އަނބުރާ ޤައުމަށް އިއާދަކޮށްދެއްވާނެކަމުގައި ވިދާޅުވެ މުއިއްޒުވަނީ،  ގުރައިދޫ ރައްޔިތުން އެ ރަށުގެ ތަރައްޤީއަށް ކުރާ އުންމީދުތައް އެ މަނިކުފާނުގެ ވެރިކަމެއްގައި ހާސިލުކޮށްދެއްވާނެކަމަށް ވިދާޅުވެފައެވެ. 

Advertisement