ފުލެޓް ލިސްޓުގައި ނަން ހިމެނިފައިވާ ހުރިހާ ފަރާތްތަކުންވެސް، ގެރެންޓަރ ފޯމް، ގެރެންޓަރ ކުރެޑިޓް ރިޕޯޓް އަދި ޕާސަނަލް ކުރެޑިޓް ރިޕޯޓް ހުށައެޅުވުމުން ކަނޑައެޅިފައިވާ އުސޫލުތަކުގެ މަތިން ފުލެޓް ގެ ތަޅުދަނޑި ހަވާލު ކުރެވިގެން ދާނެ ކަމަށް އާބަންކޯއިން ބުނެފިއެވެ. 

ހުޅުމާލޭގައި ތަރައްޤީކޮށް އާއްމުނަށް ހުޅުވާލެވިފައިވާ ވިނަރެސް ފްލެޓްތަކުގެ ތަޅުދަނޑި ހަވާލު ކުރުމުގެ މަސައްކަތް މިހާރު އާބަންކޯއިން ފަށާފައިވާއިރު، ހިޔާ، ސީލައިފް އަދި ގުޅީފަޅުން ބަދަލުވި ފަރާތްތަކަށް މިހާރު ތަޅުދަނޑި ހަވާލު ކުރެވިފައިވާ ކަމަށް އެ ކުންފުނިން ބުނެއެވެ.

އަދި މިނިސްޓްރީ އޮފް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން އެކުލަވާލައިފައިވާ ލިސްޓުގައި ހިމެނިފައިވާ ފަރާތްތަކާއި އެކު އެއްބަސްވުމުގައި ސޮއިކޮށް ތަޅުދަނޑި ހަވާލު ކުރުމަށް މިހާރު މަސައްކަތް ކުރަމުންދާ ކަމަށްވެސް ބުނެފައިވެއެވެ. 

އަދި މިކަމުގައި ލިސްޓުގައި ހިމެނިފައިވާ އެއްވެސް ފަރާތެއް އުނި ނުވާނެ ގޮތްތަކެއް ހޯދައި ދިނުމަށް، އެ ކޯޕްރޭޝަނުން 'ލީސް.ޓު.އޯން މޮޑެލް' ގައި ވިނަރެސް ފްލެޓް ގަތުމަށް މާލީ ޤާބިލިއްޔަތުކަން ސާބިތުކޮށްދެވިފައިނުވާ ފަރާތްތަކަށް މާލީ ޤާބިލިއްޔަތުކަން ފުރިހަމަކުރުމުގެ އިތުރު ފުރުޞަތެއް ހޯދައިދީ ލުއިތަކެއް މިހާރު ހޯދައިދެވިފައިވާ ކަމަށްވެސް އާބަންކޯއިން ބުނެއެވެ.

"މިގޮތުން، އާމްދަނީ ސާބިތުކުރުމަށް ބޭނުންވާ އިތުރު ލިޔެކިޔުންތައް ހުށަހެޅުން، އެމް.އެމް.އޭ ގެ ކްރެޑިޓް ރިޕޯޓް ހުށަހަޅާފައިނުވާ ފަރާތްތަކުން މި ރިޕޯޓް ހުށަހަޅެން، އެލިޖިބަލް އީ.އެމް.އައި ސާބިތުނުވާނަމަ، ފޯމު މެދުވެރިކޮށް ގެރެންޓަރ އެއް ހަމަޖެއްސުމުގެ ފުރުސަތު އަދި މިގޮތުން ގެރަންޓަރ ގެ ކްރެޑިޓް ރިޕޯޓާއި އެކު އައިލީ ގުޅުން ނެތް ފަރާތްތައްވެސް ހަމަޖެއްސުމުގެ ފުރުސަތު ވަނީ ހުޅުވާލެވިފައެވެ. އަދި މިކަމުގައި ބޭނުންވާ ފޯމުތައް ފުރުމަށް މި ކޯޕަރޭޝަންގެ ޓީމްތަކުން އެހީތެރިވާނެއެވެ." އާބަންކޯއިން ބުނެފައިވެއެވެ. 

އާބަންކޯއިން އިތުރަށް ބުނީ، އެފަދައިން ބަދަލު ގެނެސް ހުޅުވާލުމުގެ އެންމެ ބޮޑު ބޭނުމަކީ، ވީހާވެސް ގިނަ ފަރާތްތަކަށް ވިނަރެސް އެޕާޓްމަންޓްތައް ބައްލަވައިގަތުމުގެ ފުރުސަތު ފަހިކޮށްދީ، ބޯހިޔާވަހިކަން ކަށަވަރު ކުރުމަށް ކުރެވެމުންދާ މަސައްކަތްތަކާއި ފުރުސަތުތައް ރައްޔިތުންނަށް ވީހާވެސް ފަސޭހައިން ހޯދޭނެ މަގު ފަހިކޮށްދިނުން ކަމަށެވެ.