ޖޯޒީ އެމްވީގެ ފަރާތުން އިންތިޒާމްކޮށްގެން ލ.ހިތަދޫގައި އޮކްޓޫބަރު މަހުގެ 02 ދުވަހު ފެށުމަށް ހަޖެހިފައިވާ "އެސްޓީއޯ ޖޯޒީ އެމްވީ ފުޓްސަލް ޗެލެންޖް 2023" ގެ ބައިވެރިވުމުގެ ފުރުސަތު ސެޕްޓެމްބަރ މަހުގެ 15 ވަނަ ދުވަހާއި ހަމަޔަށް އިތުރުކޮށްފި އެވެ.

ވޮއިސް އަށް މައުލޫމާތު ދެއްވަމުން ޖޯޒީ އެމްވީގެ ވެރިޔާ އިދުރީސް މަހްފޫޒު ވިދާޅުވީ މި މުބާރާތަކީ ޖޯޒީ އެމްވީގެ ފަރާތުން އިންތިޒާމްކޮށްގެން ބާއްވާ ފުރަތަަމަ ފުޓްސަލް މުބާރާތެވެ. އަދި މިއީ ލ.އަތޮޅުގެ ޒުވާނުންނަށް ޚާއްސަކޮށްގެން ބާއްވާ މުބާރާތެކެވެ. މިއަތޮޅުގެ ކޮންމެ ރަށަކުން ވެސް ޓީމުތައް ބައިވެރިކުރެވިދާނެއެވެ. އަދި ކޮންމެ ޓީމެއްގައި އަތޮޅުން ބޭރުގެ ދެކުޅުންތެރިން ބައިވެރިކުރުމުގެ ފުރުސަތު އޮނާނެއެވެ.

އިތުރަށް ވާހަކަ ދައްކަމުން އިދުރީސް ވިދާޅުވީ މިފަދަ މުބާރާތެއް ލ.އަތޮޅުގެ ޒުވާނުންނަށް ޚާއްސަކޮށްގެން ބޭއްވުމުގެ އެންމެ ބޮޑު މަގުސަދަކީ މިއަތޮޅުގެ ޒުވާނުންގެ މެދުގައި ކުޅިވަރުގެ ރޫހް ދިރުވައި އެކުވެރިކަމާއި އެއްބައިވަންތަކަން އާލާކޮށް ކުޅިވަރުގެ ތެރެއިން ކުށް މަދު މުޖުތަމައެއް ބިނާކުރުމަށް ބާރުއެޅުމާއެކު، ދުޅަހެޔޮ ސިއްހަތަކަށް މަގުފަހިކުރުމުގެ ފުރުސަތު ތަނަވަސް ކޮށްދިނުމެވެ.

ޖުމްލަ 12 ޓީމަށް ބައިވެރިވުމުގެ ފުރުސަތު ހުޅުވާލާފައިވާ މިމުބާރާތުގެ ޗެމްޕިއަން ޓީމަށް 20،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މުބާރާތުގެ މެއިން ސްޕޮންސަރ އަކީ އެސްޓީއޯ އެވެ. އަދި މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.

މުބާރާތުގައި ބައިވެރިވުމުގެ ސުންގަޑި އަކީ:

15 ސެޕްޓެމްބަރު 2023 ވަނަ ދުވަހުގެ 18:00 އެވެ.