ރާއްޖެ އޮތީ ބަނގުރޫޓްވެފައި ކަމަށް ބުނެ ދައްކާ ވާހަކަތަކީ ދޮގު ވާހަކަ ތަކެއް ކަމަށާއި، އެވާހަކަތައް ދައްކާ ފަރާތްތަކުން ބޭނުންވަނީ ރައްޔިތުންނަނަށް އޮޅުވާލަން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ރިޔާސީ ކެމްޕޭނަށް ހދ ކުރައްވާ ދަތުރުގެ ތެރެއިން ކުޅުދުއްފުށީގައި ބޭއްވި ޖަލްސާގައި ވާހަކަދައްކަވަމުންނެވެ.
"ވާދަވެރިން އަޅުގަނޑުމެންނަށް އަމާޒުކޮށް އެންމެ ގިނައިން ދައްކާ ވާހަކައަކީ ރާއްޖެ ބަނގުރޫޓްވެފައި އޮތް ވާހަކަ، ދަރަ ވިކިފަ އޮތް ވާހަކަ، ދަންނަވަންތޯ، އެއީ ހަމަ ބުހުތާނު ބޮޑު ދޮގު، އެނގިތިބެ ރައްޔިތުންނަށް އޮޅުވާލަން ދައްކާވާހަކަ، ސިޔާސީ ބޭނުމެއްގަ ދައްކާ ވާހަކަ"
ރައީސް އިބްރާހިމް މުޙައްމަދު ޞާލިޙް
ރައީސް ޞާލިޙް ވިދާޅުވީ އެބޭފުޅުން އެދައްކަވާ ވާހަކައަކީ 2026 ވަނައަހަރު ދައްކަން ޖެހޭ ލޯނު ތަކެއްގެ ވާހަކަކަމަށާއި، އެނުދެއްކޭނެ ވާހަކަ ކަމަށެވެ.
"ސަރުކާރުގެ ޑައިރެކްޓް ބޮރޮއިން 2026 ވަނަ އަހަރު ދައްކަން މިޖެހެނީ 800 މިލިއަން ޑޮލަރު، އޭގެ ތެރޭގަ 100 މިލިއަން ޑޮލަރަކީ އޭޑީއެފްޑީ އިން އަޅުގަނޑުމެން ނަގާފައި ހުރި ލޯނު، އެއީ މިހާރުވެސް އެދެއްކުން ފަސްކުރެވެން އޮތް 100 މިލިއަންގެ ލޯނު، ދެން އޮތް އަނެކެއްޗަކީ ކޮވިޑްގެ ތެރޭގައި އަޅުގަނޑުމެން ނެނގި 500 މިލިއަންގެ ލޯނު، އެކަން ކުރަން ޖެހުނު ސަބަބު ހުރިހާ ބޭފުޅުންނަށް ވަރަށް ސާފުކޮށް އެނގިވަޑައިގަންނަވާނެ"
ރައީސް އިބްރާހިމް މުޙައްމަދު ޞާލިޙް
ރައީސް ވިދާޅުވީ އޭރު ދައުލަތުގައި ފައިސާ ނެތް ކަމަށާއި މުވައްޒަފުންނަށް މުސާރަ ދެވޭނެ ގޮތެއްވެސް ނެތް ކަމަށެވެ. ބޭސް ގަނެ، މުދާ ގަނެ ހެދެން ނެތް ކަމަށާއި ކުރީގެ ސަރުކާރުން ނަގައިފައި އޮތް ބޮންޑަކަށް ދައްކަންޖެހޭ ފައިސާވެސް ނެތް ކަމަށެވެ. އެ ނުދެއްކުނުނަމަ ސަރުކާރު އޮންނާނީ ޑިފޯލްޓަކަށް ގޮއްސައި ކަމަށް ރައީސް ވިދާޅުވިއެވެ.
"ދެންއޮތީ 2026 ވަނަ އަހަރު އަންނައިރު މިދަންނަވާ ލޯނު ފައިސާ ދައްކާނީ ކިހިނެއްތޯ، އެބޭފުޅުންނަކަށް އެކަން ކުރާނެ ގޮތެއް އަދިވެސް ވިދާޅެއް ނުވެވޭ، އެކަމު އަޅުގަނޑުމެންގެ ޕްލޭން އެބައޮތް އޭގަ، އޭގެތެރެއިން ދެބައިކުޅަ އެއްބައި ރިފައިނެންސް ކުރުމަށް އަޅުގަނޑުމެން ވަނީ ނިންމާފަ، މިހާރުވެސް އެމަސައްކަތް ފަށައިގެން ކުރިއަށްއެބަދޭ" ރައީސް ވިދާޅުވިއެވެ.
ރައީސް އިތުރަށް ވިދާޅުވީ ބޭރުގެ ފައިސާ ދޫކުރާ ފަރާތްތަކުން ބޮޑެތި ޢަދަދުތައް ހޯދުމަކީ މިސަރުކާރަށް މިއަދު އުނދަގޫ ކަމެއް ނޫން ކަމަށެވެ. އަދި އެގޮތައް ފައިސާ ދޫކުރަނީ އެފައިސާ އަނބުރާ ދެވޭނެ ކަމުގެ ޔަޤީން ކަން އޮންނާތީ ކަމަށްވެސް ރައީސް ޞާލިޙް ވިދާޅުވިއެވެ.
ކުޅުދުއްފުށީގައި ރޭ ބޭއްވުނު ޖަލްސާގައި ޚާރިޖީ ވަޒީރު ޢަބްދުﷲ ޝާހިދުވެސް ވާހަކަފުޅު ދައްކަވާފައިވެއެވެ.
Advertisement
This content is created and paid for by advertisers and does not involve Voice Journalists
