ކުރިއަށް އޮތް ދައުރުގައި ރ.އުނގޫފާރަކީ އެއަތޮޅުގެ ވެރިކަން ކުރާ ރަށްކަން އިޙްސާސްވާވަރަށް އެރަށް ތަރައްޤީކޮށްދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރ.އަތޮޅަށް ކުރައްވަމުންދާ ކެމްޕޭނު ދަތުރުފުޅުގައި އުނގޫފާރުގެ ރައްޔިތުންނާއި އެކު ބޭއްވެވި ބައްދަލުވުމުގައި ވާހަކަދައްކަވަމުންނެވެ.
"މިރަށަކީ ރ.އަތޮޅުގެ ވެރިކަން ކުރާ ރަށްވިޔަސް މިރަށަށް އަންނަންޖެހޭ ބަދަލު މިރަށަށް އަނަންޖެހޭ ތަރައްޤީ އައިސައޮތެކޭ ދެންނެވޭކަށްނެތް، އަޅުގަނޑުމެންގެ ވެރިކަމުގައި ކުރިއަށް އޮތްތަނުގައި އިރާދަކުރެއްވިއްޔާ އެބަދަލު އެއިޙްސާސްތައް، މިއީ ވެރިކަން ކުރާ ރަށްކަން، އެއިޙްސާސްތައް ރައްޔިތުނަށް ކުރެވޭވަރަށް މިރަށުގެ ކަންކަން އަޅުގަނޑުމެން ތަރައްޤީކުރާނަން" .
ރައީސް އިބްރާހިމް މުޙައްމަދު ޞާލިޙް
އެގޮތުން އުނގޫފާރުގެ ބިން ހިއްކުމާއި، އެކަން ނިމުމާއިއެކު ރައްޔިތުންގެ ބޯހިޔަވަހިކަމުގެ މައްސަލައަށް ހައްލެއް ގެނައުމަށް ހައުސިންގ ޕްރޮޖެކްޓެއް ކުރިއަށް ގެންދަވާނެ ކަމަށްވެސް ރައީސް ވިދާޅުވިއެވެ.
މީގެއިތުރުން ފުރިހަމަ ވަޞީލަތް ތަކާއިއެކު އުނގޫފާރުގެ ސްކޫލް އަލުން އިމާރާތް ކޮށްދެއްވާނެ ކަމަށް ރައީސް ވިދާޅުވިއެވެ. ހަމައެއާއި އެކު އެރަށުގެ ސްކޫލް އެއްދަންފަޅިއަށް ކިޔަވަ ސްކޫލަކަށް ބަދަލުކޮށްދެއްވާނެ ކަމަށްވެސް ރައީސް ވިދާޅުވިއެވެ.
ފުޓްބޯޅަ ދަނޑުގައި ރޮސްރޫމް އަކާއި އެކު ސިޑިބަރިއެއް އަޅައިދެއްވާނެ ކަމަށް ރައީސް ވިދާޅުވިއެވެ.
މީގެއިތުރުން ހޮސްޕިޓަލާއެކު މުވައްޒަފުންނަށް އެކޮމަޑޭޝަން ބްލޮކެއް އަޅުއްވާނެ ކަމަށް ރައީސް ވިދާޅުވިއެވެ. މިހާރު ކުރިއަށްދާ މަގު ހެދުމުގެ މަސައްކަތް ނިމިގެންދާއިރު ބާކީ ހުރި ހުރިހާ މަގެއްގައި ތާރުއެޅިގެންދާނެކަމަށް ރައީސް ވިދާޅުވިއެވެ.
ހަމަމިއާއި އެކު ބަނދަރަށް ބޭނުންވާ ބަދަލު ގެނެސް ފަސޭހަ ބަނދަރަކަށް ހައްދަވާނެ ކަމަށާއި، އޮޑިދޯނިފަހަރު އެހެލާނެ ތަނަކާއި މޫދަށް އެރޭނެ ސަރަހައްދެއް ޤާއިމްކުރައްވާނެ ކަމަށް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
