ނެޝަނަލް އިންޓަގްރިޓީ ކޮމިޝަންގެ މެންބަރުން ޝުޢައިބު އަބްދުއްރަހްމާނު ސިޔާސީ ހަރާކާތެއްގައި ބައިވެރިވެވަޑައިގެންފިއެވެ. 

ޝުޢައިބު ބައިވެރިވެވަޑައިގަތީ، ރައީސް އިބްރާހިމް މުހައްމަދު ޞާލިހަށް ތާއިދު ކުރައްވާ އިލްމުވެރިން އެމަނިކުފާނަށް ތާއީދުކުރައްވާކަން ހާމަކުރައްވައި މިއަދު ބޭއްވި ނޫސްވެރިންގެ ބައްދަލުވުމުގައެވެ. 

އިލްމުވެރިން މިއަދު ހެނދުނު ބޭއްވި ބައްދަލުވުމުގައި އެބޭފުޅުން ވަނީ ރައީސް ޞާލިހަށް ތާއީދުކުރާ ސަބަބުތައް ހާމަކޮށް، ރައްޔިތުން ވެސް ރައީސް ޞާލިހަށް ވޯޓު ދިނުމަށް އިލްތިމާސްކޮށްފަ އެވެ.

Advertisement

މިނިވަން މުއައްސަސާއެއް ކަމުގައިވާ އެންއައިސީގެ މެންބަރެއްގެ ގޮތުގައި ހުންނަވައި، ޝުއައިބު ވަނީ ރިޔާސީ ކެންޑިޑޭޓަކަށް ތާއިދުކޮށް ބޭއްވި އެ ބައްދަލުވުމުގައި ބައިވެރިވެވަޑައިގެންފައެވެ.

އެހެންނަމަވެސް މިނިވަން މުއައްސަސާއެއްގެ މެންބަރަކު އެގޮތަށް ސިޔާސީ ކަންކަމުގައި ބައިވެރިވުމަކީ މަނާކަމެކެވެ.

ރައީސް ޞާލިހަށް ތާއީދުކުރާ އިލްމުވެރިން މިއަދު ބައްދަލުވުމެއް މި ބޭއްވީ، ރާއްޖޭގެ ގިނަ އަދަދަކަށް ދީނީ އިލްމުވެރިން ހިމެނޭ "އިލްމުވެރިންގެ ގުޅުން" ހަރަކާތަށް ނިސްބަތްވާ އިލްމުވެރިންގެ ތާއީދު އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް އޮތްކަން އިއްޔެ ހާމަކޮށްފައި ވަނިކޮށެވެ.

އިލްމުވެރިންގެ ގުޅުމުގެ ފަރާތުން މިއަހަރުގެ ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން ތާއީދުކުރައްވާނެ ކެންޑިޑޭޓަކު ކަނޑައެޅުމަށް އެ ގުޅުމުގެ ވައިބަރ އޮޅިގައި ނެގި ވޯޓުން 86 ޢިލްމުވެރިއަކު ވަނީ ޑރ މުއިއްޒަށް ތާއިދު ކުރެއްވުމަށް ވޯޓު ދެއްވައިފައެވެ. އަދި އުމަރު ނަސީރަށް ތާއީދު ކުރެއްވުމަށް 6 ޢިލްމުވެރިއަކު ވޯޓު ދެއްވި އިރު، ރާއީސް ޞާލިހަށް ތާއިދު ކުރެއްވުމަށް ވޯޓު ދެއްވީ 4 ޢިލްމުވެރިންނެވެ.