ބޫޓާންގައި މިހާރު ކުރިއަށްދާ 16 އަހަރުންދަށުގެ ސާފްޗެމްޕިއަންޝިޕް ފުޓްބޯޅަ މުބާރާތުގެ ގުރޫޕް ބީގައި މިރޭ 2-3 ގެ ނަތީޖާއަކުން ބޫޓާން ބަލިކޮށް ދިވެހި ޓީމު މުބާރާތުގެ ސެމީފައިނަލްގެ ޖާގައެއް ކަށަވަރުކޮށްފިއެވެ.

މުބާރާތުގެ ގުރޫޕް ސްޓޭޖުގައި ރާއްޖެ ކުޅުނު ފުރަތަމަ މެޗުގައި ޕާކިސްތާން އަތުން ބަލިވީ 3-0 ގެ ނަތީޖާއަކުން ނެވެ. ތިން ޓީމު ހިމެނޭ ގުރޫޕްގެ ފުރަތަމަ މެޗުގައި ޕާކިސްތާނުން ވަނީ 2-1 ގެ ނަތީޖާއަކުން ބޫޓާން ބަލިކޮށްފަ އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ރާއްޖެ އިންނެވެ. މިލަނޑު މެޗު ފެށިގެން ހަތަރުވަނަ މިނެޓުގައި ކާމިޔާބުކޮށްދިނީ މުހައްމަދު އިލާން އިމްރާނަށް އެވެ. މިއީ ރާއްޖެ ޓީމުގެ އީތަން އިބްރާޙިމް ޒަކީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބޫޓާނުން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 42 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ސޯނަމް އެވެ .އަދި ފުރަތަމަ ހާފު އިތުވަގުތުގެ ދެވަނަ މިނެޓުގައި ޑޯޖީ ވަނީ އިތުރު ލަނޑެއް ކާމިޔާބުކޮށް އެޓީމަށް ފުރަތަމަ ފަހަރަށް މިމެޗުގައި ލީޑު ހޯދައިދީފައެވެ.

ނަމަވެސް ފުރަތަމަ ހާފުގެ ނިމުމުގެ ކުރިން ރާއްޖެ ޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑަކީ ބޫޓާންގެ ކުޅުންތެރިއެއްގެ އަތުން ބައިކޮޅަށް ވަން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ރާއްޖެ ޓީމުން މޮޅުވި ލަނޑު ދެވަނަ ހާފުގެ 70 ވަނަ މިނެޓުގައި ކާމިޔާބުކޮށްދިނީ އީތަން އިބްރާޙިމް ޒަކީ އެވެ. އަދި މެޗުގެ 82 ވަނަ މިނެޓުގައި ބޫޓާންގެ ޑޯޖީ ރާއްޖެ ޕެނަލްޓީ އޭރިއާ ތެެރެއަށް ޑައިވް ކުރިކަމަށް ބަލައި ރެފްރީ ވަނީ އޭނާއަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލައިފައެވެ. މިއާއެކު މެޗުގެ ފަހުބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

މުބާރާތުގެ ސެމީފައިނަލްގެ ފުރަތަމަ މެޗުގައި ހުކުރު ދުވަހު ދިވެހި ޓީމު ނުކުންނަނީ އިންޑިއާ އާއި ދެކޮޅަށެވެ. މިމެޗު ފެށުމަށް ހަމަޖެހިފައިވަނީ ރާއްޖެ ގަޑިން 14:00 ގައެވެ. އަދި ސެމީ ފައިނަލުގެ ދެވަނަ މެޗުގައި ގުރޫޕް ބީގެ އެއްވަނަ ޕާކިސްތާން ނުކުންނާނީ ގުރޫޕް ބީގެ ދެވަނަ ބަންގްލަދޭޝް އާއި ދެކޮޅަށެވެ.