އެމްޑީޕީ ކޯލިޝަންގެ އޮތީ އެންމެ އެޖެންޑާއެއް ކަމަށާއި އެއީ ވަޢުދުތައް ފުއްދުމާއި ރައްޔިތުންނަށް ޚިދްމަތްކުރުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ މިއަދު އދ.އަތޮޅުގެ މަހިބަދޫއަށް ވަޑައިގެން އެރަށު ރައްޔިތުންނާއި އެކު ބޭއްވެވި ކެމްޕޭނު ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސް ޞާލިޙްގެ ވާހަކަފުޅުގައި ވިދާޅުވީ ހިންގުމުގެ ގޮތުންނާއި ތަރައްޤީގެ ގޮތުންވެސް ބޮޑެތި ބަދަލުތަކެއް ދެންއަންނަ ދައުރެއްގައި މަހިބަދޫއާއި މުޅި އދ.އަތޮޅުންވެސް ފެނިގެން ދާނެ ކަމަށެވެ.

Advertisement

"އަޅުގަނޑުމެންގެ އޮތީ ހަމަ އެންމެ އެޖެންޑާއެއް، އެއީ އަޅުގަނޑުކަމަށްވިޔަސް ޢަދާލަތު ކަމަށްވިޔަސް އަދި އެމްޑީއޭ ކަމަށްވިޔަސް އަޅުގަނޑުމެންގެ އޮތީ އެންމެ އެޖެންޑާއެއް، އެއީ ރައްޔިތުންނަށް ޚިދްމަތް ކުރުން، ވެފައިވާ ވަޢުދުތައް ފުއްދުން" ރައީސް ޞާލިޙް ވިދާޅުވިއެވެ.

މީގެ އިތުރުން ރައީސް ޞާލިޙް ވިދާޅުވީ އެމްޑީޕީ ކޯލިޝަންގެ ސިޔާސަތަކީ ރާއްޖޭގެ ހުރިހާ ރައްޔިތުންނަށް އުފާވެރި އަމާން ރާއްޖެ އެއް ހޯދައި ދިނުން ކަމަށެވެ.

އަދި އެކަން ކުރުމަށްޓަކައި ހުރިހާ ދިވެހިންނަށް އުފާވެރި ދިރިއުޅުމެއް ހޯދައި ދޭނެ ކަމަށާއި ޒުވާނުންގެ އައު ޖީލެއް އުފައްދައި އެޒުވާނުން ބާރުވެރިކުރުވައި ވަޒީފާގެ ފުރުސަތުތައް ހޯދައި ދީ ތަޢުލީމު ދީ ތަމްރީނު ކޮށްދިނުމަކީ އެމްޑީޕީ ސިޔާސަތު ކަމަށް ރައީސް ޞާލިޙް ވިދާޅުވިއެވެ.

އދ.އަށް ކުރެއްވެވި ދަތުރުފުޅުގައި މަހިބަދޫގެ އިތުރުން ދިއްދޫ އަދި ދިގުރަށަށްވެސް ވަޑައިގެންފައިވެއެވެ.