އަނެއްކާވެސް ރާއްޖެއިން ހިމަބިހީގެ ކޭހެއް ފެނިއްޖެ ކަމަށް ހެލްތް ޕްރޮޓެކްޝަން އޭޖެންސީ އިން ބުނެފިއެވެ.
އެޗްޕީއޭ އިން ބުނީ ސެޕްޓެމްބަރު 5 ވަނަ ދުވަހު ހިމަބިއްސަށް ޕޮޒިޓިވް ވި މީހަކު ފެނިފައިވާ ކަމަށެވެ. އަދި އެކޭސް އިތުރަށް ތަހްޤީޤް ކޮށް ހިމަބިއްސަށް ޕޮޒިޓިވްވި މީހާއާއި ގާތުން ބައްދަލުވިމީހުން ހޯދުމަށް މަސައްކަތް ފަށައިފައިވާ ކަމަށެވެ.
އަދި މިމަސައްކަތް ކުރަމުން ދާއިރު މީސަލްސްއަށް ޖަހާ ވެކްސިން ފުރިހަމަ ނުވާ މީހަކު ހުރިނަމަ އެމީހަކަށް ވެކްސިން ދޭނެ ކަމަށްވެސް އެޗްޕީއޭއިން ބުނެފައިވެއެވެ.
އެޗްޕީއޭ އިން އިތުރަށް ބުނެފައިވަނީ ބަލިޖެހުނު ފަރާތް ދިރިއުޅޭ ސަރަހައްދުގައި ވެކްސިން ޑޯޒް ފުރިހަމަ ނުވާ ފަރާތްތަކަށް ރިންގް ވެކްސިން ދިނުމުގެ މަސައްކަތްވެސް ކުރިއަށް ގެންދެވޭނެ ކަމަށެވެ.
ހިމަބިއްސަކީ ރާއްޖެއިން ނައްތާލެވުނު ބައްޔެކެވެ. ނަމަވެސް މިފާއިތުވި އޮގަސްޓް މަހާއި ޖުލައި މަހު ވަނީ ރާއްޖެއިން ހިމަބިހީގެ ދެކޭހެއް ފެނިފައެވެ.
ހިމަބިހި ޖެހުމުން ފެންނަ އަލާމާތްތަކުގެ ތެރޭގައި ހުން އައުމާއި، ހަމުގައި ރަތް ބިހިތަކެއް ނެގުމާއި، ކެއްސުމާއި ނޭފަތުން އަރިދަފުސް ފޭބުން ހިމެނެއެވެ. އަދި ލޯ ރަތްވުން ވެސް ހިމެނެއެވެ..
އެއްވެސް ފަރާތަކުން އެފަދަ އަލާމާތެއް ފެނިއްޖެނަމަ ލަސް ނުކޮށް ސިއްހީ ހިދުމަތްތެރިއެއްގެ ލަފާ ހޯދުމަށް އެޗްޕީއޭ އިން ވަނީ އިލްތިމާސް ކުރައްވާފައެވެ.
Advertisement
This content is created and paid for by advertisers and does not involve Voice Journalists
