ކުރިއަށް އޮތް ދެދުވަހު ނުނިދައި ކެމްޕޭނުގެ ފޯރި ގަދަކޮށްލައި އެމަނިކުފާނު އިންތިޚާބު ކުރުމަށް އައްޑޫގެ ކެމްޕޭނު ޓީމުތަކަށް ރައީސް ޞާލިޙް ގޮވައިލައްވައިފިއެވެ.

ރައީސް މިހެން ވިދާޅުވެފައި ވަނީ އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި  ހުޅުދޫ ގައި ދެއްކެވި ވާހަކަފުޅުގައެވެ.

"ކެމްޕެއިން ޓީމުތައް އެއް ގިޔަރު މައްޗަށް ޖައްސާލާށޭ، ކުރިއަށް މި އޮތް ދެ ދުވަހު ނިދަން އުޅޭނެ ކަމެއް ނެތް، އަޅުގަނޑުމެންނަށް ދެ ދުވަހު ތިބެވޭނެ ނުނިދާ ވެސް، އިރާދަކުރެއްވިއްޔާ އެއްބުރުން މިކަން ނިމޭނެ،" ރައީސް ޞާލިޙް ވިދާޅުވި އެވެ.

އިއްޔެ ރައީސް ޞާލިޙް އައްޑުއަށް ވަޑައިގަތުމުން ގިނަ ޢަދަދެއްގެ ބަޔަކު ވަނީ ރައީސް ޞާލިޙަށާއި ޓީމަށް މަރުޙަބާ ދެންނެވުމަށް ޖަމާވެފައެވެ.

އެކަމާއި ގުޅުވައިގެން ރައީސް ޞާލިޙް ވިދާޅުވީ އައްޑު އަށް ވަޑައިގަތުމުން ރޭ ފެނިވަޑައިގަތީ ހަޤީޤަތުގައި ވެސް އިންތިޚާބު ނިމި، އެމްޑީޕީ އަށް ކާމިޔާބުވެފައި އޮތް މަންޒަރު ކަމަށާއި ރާއްޖޭގެ އެހެން ރަށްތަކުން ވެސް ފެނުނީ އެ މަންޒަރު ކަމަށް ފާހަގަކުރައްވަމުން ރައީސް ޞާލިޙް ވިދާޅުވީ ހަމަ ހަޤީޤަތުގައިވެސް މިކަން މިއޮތީ ނިމިފައިކަމަށެވެ.

ރައީސް ވިދާޅުވީ ދެވަނަ ދައުރެއް ފެނިވަޑައިގަންނަވަނީ މާ އުފާވެރިކޮށްކަމަށާއި އައްޑު އަށް ވީ ވައުދުތައް ފުރިހަމައަށް ފުއްދަވައި ދެއްވާނެ ކަމަށެވެ.

މީގެ އިތުރުން ރައީސް ޞާލިޙް ވިދާޅުވީ 130،000 130،000 އަށް ވުރެ ގިނަ ވޯޓު އެ މަނިކުފާނަށް ލިބިވަޑައިގަންނަވާނެ ކަމަށެވެ. އަދި މި ޢަދަދަށް ވޯޓު ލިބިވަޑައިގެންފިނަމަ ދެވަނަ ބުރަކަށް ނުގޮސް އިންތިޚާޞު ކާމިޔާބު ވީކަމަށްވެސް ރައީސް ވިދާޅުވިއެވެ.

އައްޑޫ ސިޓީގެ އެކި ރަށްރަށަށް ވަޑައިގެން ރައީސް ދަނީ އެރަށްރަށުގެ ރައްޔިތުންނާއި ބައްދަލު ކުރައްވަމުންނެވެ. މިރޭ "އުފާވެރި އައްޑޫ" ގެ ނަމުގައި ބޮޑު ޖަލްސާއެއް އައްޑޫގައި ބޭއްވުމަށް ވަނީ ހަމަޖެހިފައެވެ.