ޤައުމުގެ މިނިވަންކަން ގެއްލިދާހިނދު މިސަރުކާރުން އަލުން ގެންނަން އުޅޭނީ ޣައްދާރުވެފައިވާ ބައެއް ކަމަށް ޝައިޚް ޝަފީޢު ޢަބްދުالله ވިދާޅުވެއްޖެއެވެ.

ޝައިޚް މިހެން ވިދާޅުވީ ދިވެހިރާއްޖެއިން 15 ހެކްޓަރުގެ ބިން، އިންޑިޔާ ސިފައިންނަށް ދިނުމަށް އެދި އިންޑިއާގެ ޚާރިޖީ ވަޒީރު ޑރ.ސުބްރަމަނިޔަން ޖައިޝަންކަރު ރާއްޖޭގެ ޚާރިޖީވަޒީރު އަބްދުالله ޝާހިދަށް ފޮނުއްވާފައިވާ، ސިޓީއެއް ލީކުވެ އެޚަބަރު ފެތުރެމުން ދަނިކޮށެވެ.

އެ ސިޓީގައި އިންޑިޔާގެ ޚާރިޖީ ވަޒީރު ވިދާޅުވެފައިވަނީ ތަމްރީނާއި ކުރިއެރުމާއި އެހީތެރިކަން އެމްއެންޑީއެފްއަށް ފޯރުކޮށްދީ ޤާބިލުކަން އިތުރުކުރުމުގެ ގޮތުން އިންޑިއާއަށް ހދ.ހަނިމާދޫއާއި އައްޑޫ ސިޓީ ގަމުގެ އިންޓަނޭޝަނަލް އެއާޕޯޓު ކައިރިން މަދުވެގެން 15 ހެކްޓަރުގެ ބިން ކުއްޔަށް ދޫކުރަންވާނެ ކަމާއި މި ސިޓީގައި ސާފުކޮށް ބަޔާންކޮށްފައިވާ ގޮތުގައި މި ބިން ދޫކުރަންޖެހެނީ 99 އަހަރުގެ މުއްދަތަށް ކަމަށެވެ.

މިކަމާއި ގުޅިގެން ޝައިޚް ޝަފީޢު ކުރައްވާފައިވާ ޓްވީޓުގައި ވިދާޅުވެފައިވަނީ ޤައުމުގެ މިނިވަންކަމާއި ސިޔާދަތު ގެއްލިގެން ދާ ހިނދު ވެސް، މި ސަރުކާރަށް ތާއީދުކޮށް، އަދިވެސް މި ސަރުކާރުން ގެންނާން އުޅޭނީ ހާދަ ރަޙުމުކުޑަ، އަނިޔާވެރި، ޣަދަރުވެރި ބައެއްކަމަށެވެ.

" ޤައުމާ މެދު ތިޔަބައިމީހުންގެ ހިތުގައި ހަމަ އެއްވެސް މިންވަރެއްގެ ހަމްދަރުދީއެއް ނެތީތޯ؟" ޝެއިޚްގެ ޓްވީޓް ނިންމާލަމުން ސުވާލު ކުރައްވައިފައިވެއެވެ.

އިންޑިޔާގެ ސަރުކާރުން މިފަދަ ސިޓީއެއް ރާއްޖޭގެ ސަރުކާރަށް ފޮނުވި ކަމަށް ޚަބަރު ފެތުރެން ފެށުމާއިއެކު ރާއްޖޭހެ ޚާރިޖީ ވުޒާރާއިން ވަނީ އެކަން ދޮގުކުރައްވައިފައެވެ.

މިކަމާއި ގުޅިގެން ޚާރިޖީ ވުޒާރާއިން ބުނެފައިވަނީ އެސިޓީ އަކީ އެއްވެސް އަސްލެއް ނެތް އަމިއްލައަށް އުފައްދައިފައިވާ ސިޓީއެއް ކަމަށެވެ.