ޔުއެފާ ޔޫރޯ 2004 ކޮލިފައިން މިރޭ، އަމިއްލަ ދަނޑުގައި 2-0 ގެ ނަތީޖާއަކުން އަޔަލެންޑް ބަލިކޮށް ގުރޫޕް ބީގެ އެއްވަނައިގައި ފްރާންސް އިން 9 ޕޮއިންޓްގެ ލީޑެއް ނަގައިފިއެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރީ ފްރާންސް އިންނެވެ. އަދި މިމެޗުގައި ފުރާންސް އިން ލީޑު ހޯދި ލަނޑު ފުރަތަމަ ހާފުގެ 19 ވަނަ މިނެޓުގައި ކާމިޔާބުކޮށްދިނީ އެޓީމުގެ ރެއާލް މެޑްރިޑް މިޑްފީލްޑަރު ޗުއެމިނީ އެވެ. މިއީ އެޓީމުގެ ފޯވާޑް އެމްބާޕޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެއިތުރުން ވެސް މިހާފުގައި އެޓީމުގެ ފޯވާޑް އޮލިވިއޭ ޖިރޫޑްގެ އިތުރުން އެމްބާޕޭ އަށް ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ލިބި ބޭނުންނުކުރެވިފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން ތިންވަނަ މިނެޓުގައި ފްރާންސް އިން ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އިންޓަ މިލާންގެ ފޯވާޑް މާކޯސް ތުރާމް އެވެ.

ފުރާންސްގެ ލަނޑަށްފަހު އަޔަލެންޑުމް ކުރިއަށްޖެހި ލަނޑެއްޖެހޭތޯ ވަރަށް މަސައްކަތް ކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ފަސް މެޗުން ލިބުނު 15 ޕޮއިންޓާއެކު ގްރޫޕް ބީގެ އެއްވަނައިގައި މިވަގުތު އޮތީ ފްރާންސް އެވެ. އަދި މިމެޗުން ބަލިވި އަޔަލެންޑް ކުކުނު ހަތަރު މެޗުން ލިބުނު ތިން ޕޮއިންޓާއެކު މިވަގުތު އޮތީ ގްރޫޕްގެ ފަސް ޓީމު ހިމެނޭ މިގުރޫޕްގެ ހަތަރުވަނައިގައެވެ.