އެމްޑީޕީ ކޯލިޝަންގެ ރިޔާސީ ޓީމާއި ވާދަކުރެވޭނެ އެހެން ޓީމެއް ނެތްކަމަށް އެމްޑީއޭގެ ރައީސް އަދި ދ.މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދު ވިދާޅުވެއްޖެއެވެ.

ސިޔާމް މިހެން ވިދާޅުވީ ރޭ އައްޑޫ ސިޓީ ހިތަދޫގައި ކުރިއަށްދިޔަ "އުފާވެރި އައްޑޫ" ޖަލްސާގައި ވާހަކަދައްކަވަމުންނެވެ.

ސިޔާމް ވިދާޅުވީ އެމްޑީޕީ ކޯލިޝަންގައި ތިބީ ސިޔާސީ ގޮތުން އެންމެ ތަޖުރިބާ ކާރު ރައްޔިތުންނަށް އެންމެ ޚިދްމަތްތެރި ބޭފުޅުން ކަމަށެވެ.

ސިޔާމް ވިދާޅުވީ އެމްޑީޕީގެ ރިޔާސީ ޓީމަކީ ރައްޔިތުންދެކެ ލޯބިވާ، ރައްޔިތުންނަށް އޯގާތެރިވާ، ރައްޔިތުން ބޭނުންވާ ކަންކަން އޭގެ އެންމެ ފުރިހަމަ ގޮތުގައި ކޮށްދިނުމަށް އަބަދު މަސައްކަތް ކުރާ ޓީމެއް ކަމަށެވެ.

ސިޔާމް ވިދާޅުވީ މިއަދު އައްޑޫ މިދެކޭ ތަރައްޤީއަކީ އައްޑޫގެ ރައްޔިތުން ފެށުނިއްސުރެ ބޭނުންވެފައި ތިބި ތަރައްޤީ ކަމަށާއި، އައްޑޫގައި ފަތުރުވެރިކަން ފުޅާވެގެންދާނެ ކަމަށް ސިޔާމް ވިދާޅުވިއެވެ.

ސިޔާމް ވިދާޅުވީ ރައީސް ޞާލިޙާއި އެބޭފުޅުން ބޭނުންވަނީ ރާއްޖޭގެ އެއްތަނެއް ތަރައްޤީ ވެ އެއްބަޔަކު މުއްސަނދިވާން ނޫން ކަމަށެވެ.

"އަޅުގަނޑުމެން ބޭނުންވަނީ ކޮންމެ ދިވެހި ރައްޔިތަކީ، އުފަލާއި އަރާމުގައި އުފާވެރި ދިވެހި ރާއްޖެއެއްގައި ދިރިއުޅޭ ބަޔަކަށް ވުމަށް، އަޅުގަނޑުމެން މިގެންދާ ހެޔޮ އިޤްތިޞާދީ އިންޤިލާބީ ބަދަލު، ދިވެހިރާއްޖޭގެ އެންމެހާ ރައްޔިތުންނަށް ލިބިގެންދާނެ" ސިޔާމް ވިދާޅުވިއެވެ.

ސިޔާމް ވިދާޅުވީ ތަންތަނުން ލޯނު ނަގާތީ ޤައުމު ދަރަނީ އޭ ކިޔައި ވާހަކަ ދައްކާ ކަމަށާއި، ދަރަނި ނަގަނީ އެ ދަރަނި 3 އަހަރު ތެރޭގައި އަރަންޏަށް ބަދަލު ކުރެވޭނެ ތީ ކަމަށެވެ. އަދި ދަރަނި އަރަންޏަށް ހެދޭނީ އިޤްތިޞާދު ދަންނަ މީހަކަށް ކަމަށާއި ރައީސް ޞާލިޙަކީ އިޤްތިޞާދު ދަންނަ ބޭފުޅެއް ކަމަށެވެ.